កីឡា

សិក្ខាសាលាគ្រូបច្ចេកទេសត្រៀមពានសម្តេចធិបតីលើកទី២បញ្ចប់ដោយជោគជ័យ

បានផុស

១ year មុន

នៅ

ថ្ងៃចន្ទ ១៣ មករា ២០២៥

ដោយ

វគ្គបណ្តុះបណ្តាលបច្ចេកទេសគ្រូបង្វឹកកីឡាយុទ្ធគុនចម្រុះលើកទី១ ដើម្បីត្រៀមព្រឹត្តិការណ៍ប្រកួតកីឡាយុទ្ធគុនចម្រុះខ្មែរបុរាណពានរង្វាន់ សម្តេចបវរធិបតី លើកទី២ បញ្ចប់ទៅដោយភាពជោគជ័យ កាលពីល្ងាចថ្ងៃទី១១ ខែមករា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សិក្ខាកាមចំនួន៧០រូប រួមមានគ្រូបង្វឹកមកពីបណ្តាខេត្តចំនួនឆ្ងាយៗ ចំនួន៣០រូប និងនៅរាជធានីភ្នំពេញ ព្រមទាំងខេត្តកណ្តាល ចំនួន៤០រូប បានចូលរួមក្នុងសិក្ខាសាលាបច្ចេកទេសនៃក្បាច់គុនចម្រុះខ្មែរបុរាណលើកទី១ ក្នុងគោលបំណងបំប៉នបច្ចេកទេស ក្រមសីលធម៌ដល់គ្រូបង្វឹកកីឡាយុទ្ធគុនចម្រុះ ដើម្បីពង្រឹងសមត្ថភាព និងគុណភាពរបស់យុទ្ធគុនខ្មែរ ជាព្រលឹងជាតិខ្មែរ។

នៅក្នុងពិធីបិទបញ្ចប់វគ្គបណ្តុះបណ្តាលបច្ចេកទេសគ្រូបង្វឹកកីឡាយុទ្ធគុនចម្រុះ លោក វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា បាននិយាយថា ៖«ធនធានមនុស្សសំខាន់ក្នុងការប្រកួតកីឡានីមួយៗគឺគ្រូបង្វឹក។ ធនធានមនុស្សទី១ ត្រូវពង្រឹងសមត្ថភាពគឺគ្រូបង្វឹក។ ក្រោយចប់វគ្គនេះគ្រូបង្វឹក គាត់អាចយកអ្វីដែលគាត់បានរៀនបាន៣ថ្ងៃនេះ យកទៅបង្ហាត់កីឡាករ កីឡាការិនី ដែលជាកូនសិស្សផ្ទាល់ ដើម្បីពង្រឹងបន្ថែមទាំងផ្នែកកម្លាំងកាយ បច្ចេកទេស ចិត្តសាស្រ្ដនិងស្មារតី»។

ចំពោះវគ្គបណ្តុះបណ្តាលបច្ចេកទេសគ្រូបង្វឹកកីឡាយុទ្ធគុនចម្រុះលើកទី១ ជាការយកគិតគូរយ៉ាងយកចិត្តទុកដាក់ពីសម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

គោលបំណងសំខាន់ក្នុងការរៀបចំវគ្គបណ្តុះបណ្តាលគឺដើម្បីចូលរួមចំណែកអភិវឌ្ឍនក្រុមជំនាញកីឡាយុទ្ធគុនចម្រុះក្នុងសហព័ន្ធកីឡាគុនចម្រុះកម្ពុជាទាំងអស់ ក្នុងការដាស់ស្មារតីឲ្យមានការខិតខំប្រឹងប្រែងក្នុងការធ្វើការងារ ដោយមានការទទួលខុសត្រូវខ្ពស់ឲ្យចេញជាលទ្ធផលជាក់ស្តែង ដើម្បីត្រៀមចូលរួមក្នុងព្រឹត្តិការណ៍ប្រកួតកីឡាយុទ្ធគុនចម្រុះខ្មែរបុរាណពានរង្វាន់ សម្តេចបវរធិបតី លើកទី២ នឹងប្រព្រឹត្តិទៅនៅថ្ងៃទី១៦ ដល់ថ្ងៃទី១៩ ខែ តុលា ឆ្នាំ២០២៥ ដែលត្រូវធ្វើឡើងនៅពហុកីឡដ្ឋានជាតិមរតកតេជោ។

នេះជាវគ្គបណ្តុះបណ្តាលលើកទី១ និងនៅមាន៤វគ្គទៀតគឺ វគ្គបណ្តុះបណ្តាលអាជ្ញាកណ្តាល-ចៅក្រម ក្នុងខែមីនា, វគ្គបណ្តុះបណ្តាលបច្ចេកទេសយុទ្ធគុនចម្រុះខ្មែរបុរាណ ក្នុងខែឧសភា និងវគ្គបណ្តុះបណ្តាលអាជ្ញាកណ្តាល-ចៅក្រម ក្នុងខែសីហា៕