កីឡា

សហព័ន្ធគុនខ្មែរអន្តរជាតិត្រៀមជួបជជែកជាមួយ សហព័ន្ធគុនខ្មែរហើយ

បានផុស

១ year មុន

នៅ

ថ្ងៃអង្គារ ១៨ កុម្ភៈ ២០២៥

ដោយ

បន្ទាប់ពីមានការខ្វែងគំនិតរវាងសហព័ន្ធប្រដាល់គុនខ្មែរ និងសហព័ន្ធគុនខ្មែរអន្តរជាតិមួយរយៈពេលចុងក្រោយ ពេលនេះតំណាងសហព័ន្ធគុនខ្មែរអន្តរជាតិគ្រោងនឹងជួបជជែកគ្នាផ្ទាល់ជាមួយសហព័ន្ធគុនខ្មែរដើម្បីរកដំណោះស្រាយរួមគ្នា។

លោក មាម រ៉ា ប្រធានសហព័ន្ធគុនខ្មែរអន្តរជាតិ បានប្រាប់សារព័ត៌មាន«កម្ពុជាថ្មី»កាលពីល្ងាចថ្ងៃទី១៧ ខែកុម្ភៈ ឆ្នាំ២០២៥ថា ៖«ខាងអគ្គលេខាធិការរបស់សហព័ន្ធយើងបានរៀបចាត់ចែងការងារនេះហើយ។ យើងរួមគ្នាដើម្បីអភិរក្ស និងអភិវឌ្ឍវប្បធម៌ប្រពៃណីខ្មែរ និងមរតកដូនតាយើង។ បាក់បែកគ្នាមិនចំណេញអីទេ នឹងនាំឲ្យជិតខាងគេមើលងាយយើង»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី១៥ ខែកុម្ភៈ ២០២៥ សហព័ន្ធប្រដាល់អន្តរជាតិ បានចេញគោលការណ៍ថ្មីដោយតម្រូវឲ្យគ្រប់កម្មវិធីប្រកួតទាំងក្នុងស្រុក និងក្រៅប្រទេសត្រូវស្នើសុំច្បាប់រៀបចំការប្រកួតត្រឹមត្រូវពីសហព័ន្ធប្រដាល់គុនខ្មែរអន្តរជាតិ ប្រសិនបើកម្មវិធីនោះមានកីឡាករ កីឡាការិនីចាប់ពី៥ប្រទេសឡើង។ មិនត្រឹមតែប៉ុណ្ណោះ កីឡាករ កីឡាការិនីគុនខ្មែរទាំងជាតិ និងអន្តរជាតិ ដែលចូលរួមប្រកួតជាលក្ខណៈអន្តរជាតិ ត្រូវមានអាជ្ញាប័ណ្ណ (Fighter License) ពីសហព័ន្ធគុនខ្មែរអន្តរជាតិ ទើបអាចចូលរួមប្រកួតជាផ្លូវការរបស់សហព័ន្ធគុនខ្មែរអន្តរជាតិបាន។

មួយថ្ងៃក្រោយមក ពោលគឺនៅថ្ងៃទី១៦ ខែកុម្ភៈ ឆ្នាំ២០២៥ សហព័ន្ធប្រដាល់គុនខ្មែរជាតិ បានចេញសេចក្តីប្រកាសពីគោលជំហររបស់ខ្លួនថា សហព័ន្ធកីឡាប្រដាល់គុនខ្មែរមានបុព្វសិទ្ធិ និងស្វ័យភាពពេញលេញ ក្នុងការផ្សព្វផ្សាយ និងរៀបចំរាល់ការប្រកួតកីឡាប្រដាល់គុនខ្មែរគ្រប់ទម្រង់ ទាំងក្នុងប្រទេស និងក្រៅប្រទេស ដោយមិនអនុញ្ញាតឲ្យសហព័ន្ធគុនខ្មែរអន្តរជាតិមកជ្រៀតជ្រែកជាដាច់ខាត។

ការចេញគោលការណ៍រៀងៗខ្លួនបែបនេះបានធ្វើមហាជនមានការចាប់អារម្មណ៍យ៉ាងខ្លាំង និងរិះគន់បែបនេះ បែបនោះ ហើយរឹតតែធ្វើឲ្យស្ថានភាពកាន់តែធំ។ អ្នកខ្លះបានលើកឡើងឲ្យភាគីទាំងពីរបានជួបពិភាក្សាគ្នាផ្ទាល់ដើម្បីរកដំណោះស្រាយរួមគ្នាឆ្ពោះទៅរកការអភិវឌ្ឍគុនខ្មែរដែលជាកីឡាអត្តសញ្ញាណជាតិខ្មែរ៕