Pedri ថា Yamal មានចំណុចមួយ ធ្វើឱ្យខ្លួនមានអារម្មណ៍ដូចមាន Messi ក្នុងក្រុម

ខ្សែបម្រើ និងជាអ្នកនាំលេងដ៏សំខាន់របស់ Barcelona កីឡាករ Pedri បានបង្ហាញការកោតសរសើរជាខ្លាំង លើមិត្តរួមក្រុមរបស់ខ្លួន​គឹ​កីឡាករ Lamine Yamal ដែល​បាន​ប្រៀបធៀបយុវជនវ័យ ១៧ ឆ្នាំរូបនេះ ជាមួយវីរបុរស Lionel Messi។

Yamal បច្ចុប្បន្នកំពុងក្លាយជាកម្លាំងស្នូលមិនអាចខ្វះបានម្នាក់របស់ក្រុមដែលមានមូលដ្ឋាននៅតំបន់ កាតាឡាន់។ ជាក់ស្តែងនៅរដូវកាលនេះ រូបគេកំពុងតែបង្ហាញសមត្ថភាពបានយ៉ាងល្អ និងកំពុងជួយជ្រោម​ជ្រែង Barcelona នៅក្នុងពានរង្វាន់ ៣ ដូចជា La Liga, Copa del Rey និង UEFA Champions League។

យ៉ាងណា បើនិយាយអំពីសមត្ថភាពផ្ទាល់ខ្លួនវិញ កីឡាករសញ្ជាតិ អេស្ប៉ាញ រូបនេះ គឺពិតជាមានភាពប៉ិនប្រសប់​មែនទែន ជាមួយនឹងការញាក់បាល់នៅទីលាន ហើយភាគច្រើន នៅក្នុងស្ថានភាព ១ ទល់នឹង ១ ជាមួយខ្សែការពារក្រុមគូប្រកួត គឺគេពិតជាពិបាកដណ្តើមបាល់ពីគាត់ខ្លាំងណាស់។

កត្តានេះហើយ ទើបធ្វើឱ្យ Pedri លើកឡើងដោយមិនស្ទាក់ស្ទើរ ថា នៅពេលក្នុងក្រុមមានវត្តមានគេ គឺប្រៀបដូចក្នុងក្រុមកំពុងមាន Leo Messi អ៉ីចឹងដែរ។ ដកស្រង់ពាក្យសម្តីដើមពីអ្នកកាសែត អ៉ីតាលី លោក Fabrizio Romano ខ្សែបម្រើវ័យ ២២ ឆ្នាំបាននិយាយយ៉ាងដូច្នេះថា ៖ «ជាមួយ Lamine គឺធ្វើឱ្យមានអារម្មណ៍ស្រដៀងគ្នា ដូចពួកយើងមាន Messi នៅក្នុងក្រុមអ៉ីចឹងដែរ។ នៅពេល Lamine ទទួលបានបាល់ អ្នកដឹងទេ គាត់គឺអាចទៅមុខ ដោយញាក់គូប្រកួតដំបូងបានយ៉ាងងាយស្រួល…»៕

ប្រែសម្រួលអត្ថបទ៖ សេម កុសល
ប្រភព៖ Fabrizio Romano