លឹម ពិសុទ្ធ ប្តេជ្ញា​យក​ឈ្នះពានសម្តេចតេជោ​ ជូនវិញ្ញាណក្ខន្ធ​ ឧកញ៉ា ឫទ្ធី សំណាង ក្រោយខកខាន ១៧ឆ្នាំ

ខ្សែប្រយុទ្ធរបស់ក្លិបភ្នំពេញក្រោនកីឡាករ លឹម ពិសុទ្ធ បានបង្ហាញឆន្ទៈ​ក្នុង​ការ​យក​ឈ្នះពានសម្តេចអគ្គមហាសេនាបតីតេជោ ហ៊ុន សែន លើក​ទី​១៨ រដូវកាល ២០២៤-២០២៥ ​ដើម្បី​ឧទ្ទិស​ជូន វិញ្ញាណក្ខន្ធអតីតប្រធានក្លិបលោកឧកញ៉ា ឫទ្ធី សំណាង ដែលបានទទួលមរណភាព​កាល​ពីឆ្នាំ ២០២២ ដោយរាគាពាធ។

លឹម ពិសុទ្ធ បានទម្លាយថា កាលលោកឧកញ៉ា ឫទ្ធី សំណាង នៅមានជីវិត គឺចង់ឱ្យក្រុមលើកពានសម្តេចតេជោ ជូនលោកខ្លាំងមែនទែន បន្ទាប់​ពី​​ក្លិបបានខកខាន​ក្នុង​ការ​ឈ្នះ​ពាននេះអស់រយៈពេល ១៧ ឆ្នាំមកហើយ ពោលគឺបានឈ្នះលើកចុងក្រោយ តាំងពីឆ្នាំ ២០០៩ មកម្ល៉េះ។

ថ្លែងនៅក្នុងសន្និសីទកាសែតមុន​ការ​ប្រកួត​វគ្គផ្តាច់ព្រ័ត្រ ពានសម្តេចតេជោ ហ៊ុន សែន នាព្រឹកថ្ងៃ សៅរិ៍ ទី ២៤ ខែ ឧសភា នេះ លឹម ពិសុទ្ធ បានលើកឡើងថា៖ «យើងដឹងហើយ ភ្នំពេញក្រោន បានខកខានលើកពានសម្តេច​តេជោ​ ហ៊ុន សែន ១៧ ឆ្នាំហើយ។ ប្រសិនបើស្អែកយើងលើកពានមែន គឺយើងមានមោទកភាពសម្រាប់ខ្លួនឯង និងក្រុមភ្នំពេញក្រោន​ទាំងមូល ព្រោះលោកឧកញ៉ា ឫទ្ធី សំណាង កាលនៅមានជីវិត គឺចង់ឱ្យយើងលើកពានសម្តេចជូន​លោក​មែនទែន។ ដូច្នេះថ្ងៃស្អែកយើងនឹងខំប្រឹងឱ្យ​អស់​ពីសមត្ថភាពដើម្បីលើកពានជូន​លោក»។

ក្រុមភ្នំពេញក្រោន ធ្លាប់ឈ្នះពានសម្តេចតេជោ ចំនួន ២ ដង គឺនៅឆ្នាំ ២០០៨ និង ២០០៩ ខណៈកាលពីរដូវកាលមុន ២០២៣-២០២៤ ពួកគេក៏បានឡើងទៅកាន់វគ្គផ្តាច់ព្រ័ត្រពាននេះផងដែរ ប៉ុន្តែ​បានបរាជ័យក្រោមថ្វីជើងក្រុមព្រះខ័នរាជស្វាយរៀង ក្នុងលទ្ធផល ១ ទល់នឹង ០។

គួរបញ្ជាក់ថា ការប្រកួតវគ្គផ្តាច់ព្រ័ត្រពានសម្តេចតេជោ ហ៊ុន សែន នឹងធ្វើឡើងនៅថ្ងៃ អាទិត្យ ទី ២៥ ខែ ឧសភា ស្អែកនេះចាប់ពីម៉ោង ៧ ល្ងាចតទៅនៅពហុកីឡដ្ឋានជាតិមរតកតេជោ៕

អត្ថបទ៖ សេម កុសល