មុន​ប៉ះ​គ្នា​ថ្ងៃ​អាទិត្យ​នេះ ប្រវត្តិ ១៣ ឆ្នាំចុងក្រោយ ព័រទុយហ្គាល់ មិនធ្លាប់ឈ្នះ អេស្ប៉ាញ ទាល់​តែ​សោះ

ការប្រកួតវគ្គផ្តាច់ព្រ័ត្រពាន UEFA Nations League នៅសល់ត្រឹម ១ ថ្ងៃទៀតប៉ុណ្ណោះ ដែលជាជំនួបដ៏ធំរវាងក្រុមជម្រើសជាតិ អេស្ប៉ាញ ទល់នឹង ព័រទុយហ្គាល់។

ជំនួបនេះ រាប់បានជាជំនួបដ៏ធំប្រចាំប្រវត្តិសាស្ត្រពាន Nations League ដោយសារក្រុមទាំង ២ សុទ្ធតែជាក្រុមខ្លាំង និងសម្បូរទៅដោយធនធានកីឡាករល្អ តាំងពីអ្នកចាំទី រហូតដល់ខ្សែប្រយុទ្ធ។

យ៉ាងណា បើ​ចាប់អារម្មណ៍អំពីប្រវត្តិជួបគ្នារវាងក្រុមទាំង ២ កន្លងមក ឃើញថា ក្រុមអេស្ប៉ាញ មាន​កំណត់ត្រា​ល្អជាង។ ការ​ជួប​គ្នារយៈពេល ១៣ ឆ្នាំចុងក្រោយ រាប់ចាប់ពីឆ្នាំ ២០១២ មក គឺ​ ព័រទុយហ្គាល់ មិនធ្លាប់ឈ្នះទៅលើក្រុមរហស្សនាមគោជល់ទាល់តែសោះ។ ក្នុងនោះការជួបគ្នា ៦ លើក ព័រទុយហ្គាល់ ចាញ់ ២ លើក និងស្មើ ៤ លើក។

ខាងក្រោមនេះ គឺជាប្រវត្តិជួបក្រុមទាំង ៦ លើករបស់ក្រុមទាំង ២ ដោយរាប់ចាប់ពីឆ្នាំ ២០១២៖

• ឆ្នាំ ២០១២ ក្នុងពានរង្វាន់ UEFA European Championship វគ្គពាក់កណ្តាលផ្តាច់ព្រ័ត្រ ព័រទុយហ្គាល់ ចាញ់ អេស្ប៉ាញ ៤-២ បន្ទាប់ពីស្មើគ្នា ០-០
• ឆ្នាំ ២០១៨ ក្នុងពាន FIFA World Cup ព័រទុយហ្គាល់ ស្មើ អេស្ប៉ាញ ៣-៣
• ឆ្នាំ ២០២០ ក្នុងការប្រកួតមិត្តភាព ព័រទុយហ្គាល់ ស្មើ អេស្ប៉ាញ ០-០
• ឆ្នាំ ២០២១ ក្នុងការប្រកួតមិត្តភាព ព័រទុយហ្គាល់ ស្មើ អេស្ប៉ាញ ០-០
• ឆ្នាំ ២០២២ ក្នុងពាន UEFA Nations League ព័រទុយហ្គាល់ ស្មើ អេស្ប៉ាញ ១-១
• ឆ្នាំ ២០២២ ក្នុងពាន UEFA Nations League ព័រទុយហ្គាល់ ចាញ់ អេស្ប៉ាញ ១-០

គួរបញ្ជាក់ថា ការប្រកួតវគ្គផ្តាច់ព្រ័ត្រពាន Nations League រវាងក្រុមជម្រើសជាតិ ព័រទុយហ្គាល់ និងអេស្ប៉ាញ នឹងធ្វើឡើងនៅយប់ថ្ងៃ អាទិត្យ ឈានចូលថ្ងៃ ចន្ទ ទី ៩ ខែ មិថុនា ឆ្នាំ ២០២៥៕

អត្ថបទ៖ សេម កុសល