ក្រុមខ្លាំង ៣២ បើកយុទ្ធនាការ Club World Cup ថ្ងៃ​ស្អែកជា​មួយ​ប្រាក់​រង្វាន់​សរុប១​ពាន់លាន​ដុល្លារ

នៅសល់ត្រឹមរយៈពេល ១ ថ្ងៃទៀតប៉ុណ្ណោះ ពោលគឺនៅថ្ងៃទី ១៤ ខែ មិថុនា ឆ្នាំ ២០២៥ ការប្រកួតពានរង្វាន់ FIFA Club World Cup នឹងឈានចូលមកដល់ ខណៈមានក្រុមចំនួន ៣២ នឹងត្រូវចូលរួមប្រកួតប្រជែងក្នុងពាននេះ។

ក្រុមទាំង ៣២ មកពី ៦ ទ្វីបផ្សេងគ្នា នឹងត្រូវធ្វើការប្រកួតប្រជែងក្នុងពាន FIFA Club World Cup ចាប់ពីថ្ងៃទី ១៤ ខែ មិថុនា ដល់ថ្ងៃទី ១៣ ខែ កក្កដា ឆ្នាំ ២០២៥។ ក្រុម​ទាំង​អស់​សុទ្ធ​តែ​ជម្រើស​​ខ្លាំង​ៗ​មក​ពី​ទ្វីប​ទាំង​៦។

ក្រុមនីមួយៗគឺបានបែងចែកពូលរួចរាល់ហើយ ដោយពូល A មាន Palmeiras, Porto, Al Ahly និង Inter Miami។ ពូល B មាន PSG, Atletico Madrid, Botafogo, Seattle Sounders FC។ ពូល C មាន Bayern Munich, Auckland City, Boca Juniors និង Benfica។ ពូល D មាន Flamengo, Esperance de Tunis, Chelsea និង Los Angeles FC។

ពូល E មាន River Plate, Urawa Red Diamonds, Monterrey និង Inter Milan។ ពូល F មាន Fluminense, Dortmund, Ulsan HD និង Mamelodi Sundowns។ ពូល G មាន Manchester City, Wydad AC, Al Ain និង Juventus។ ចុងក្រោយពូល H មាន Real Madrid, Al-Hilal, Pachuca និង Red Bull Salzburg។

ងាកមកមើលអំពីរូបមន្តប្រកួតវិញ ការប្រកួតនេះ គឺបានបែង​ចែកជា ៨ ពូល ក្នុង​១​ពូល​មាន​៤​ក្រុម​។ ពីរក្រុម ដែលឈរ​លេខ ១ និង​លេខ​ ២ ប្រចាំពូលនីមួយៗ ឡើង​ទៅ​កាន់​វគ្គ​១៦​ក្រុម​ចុង​ក្រោយ ដើម្បី​ប្រកួត​បន្ត​បន្ទាប់​ទៀត​រហូតដល់​វគ្គ​ផ្តាច់​ព្រ័ត្រ​។ ការប្រកួតវគ្គ ៨ ក្រុមចុងក្រោយ​នៅ​ថ្ងៃទី ៤ និងទី ៥ ខែ កក្កដា។ វគ្គពាក់កណ្តាលផ្តាច់ព្រ័ត្រ នៅថ្ងៃទី ៨ និងទី ៩ ខែ កក្កដា ហើយវគ្គផ្តាច់ព្រ័ត្រ​នៅថ្ងៃទី ៨ ខែ កក្កដា ឆ្នាំ ២០២៥។

គួរបញ្ជាក់ថា ការប្រកួតប្រកួត FIFA Club World Cup ឆ្នាំ ២០២៥ ​បាន​បង្កើនប្រាក់រង្វាន់សរុប​១​ពាន់​លាន​ដុល្លារ​អាមេរិក។ ក្រុម​ដែល​បាន​ចូល​រួម​ប្រកួត​នឹង​ទទួល​បាន​ប្រាក់​រង្វាន់​តាម​ការ​ឈ្នះ​ ឬ​ស្មើ ​ចាប់​ពី​វគ្គ​សន្សំពិន្ទុ​ឡើងទៅ។ ចំពោះ​ ក្រុម​ជើងឯក​នឹង​ទទួលបានប្រាក់រង្វាន់ចំនួន ៤០ លានដុល្លារ បូករួមទាំងប្រាក់រង្វាន់​រាប់​ពី​វគ្គ​សន្សំពិន្ទុ​ក្នុង​ពូលរហូតដល់វគ្គផ្តាច់ព្រ័ត្រ សរុបគឺចំនួន ១២៥ លានដុល្លារអាមេរិក៕

អត្ថបទ៖ សេម កុសល