កីឡា

ជាម អាដាំ ជឿជាក់ថ្ងៃខាងមុខមានកីឡាករល្អដូច សុខ ធី ពេជ្រ សម្បត្តិ ច្រើន

បានផុស

៨ ខែ មុន

នៅ

ថ្ងៃពុធ ២៧ សីហា ២០២៥

ដោយ

អតីតអ្នកប្រដាល់ល្បីឈ្មោះ និងជាម្ចាស់ខ្សែក្រវាត់ K Cement លោក ជាម អាដាំ ជឿជាក់ថានៅថ្ងៃខាងមុខនឹងមានកីឡាករល្អដូចជា សុខ ធី នុិងកីឡាករ ពេជ្រ សម្បត្តិ ច្រើនទៀត ព្រោះសហព័ន្ធបានបណ្ដុះថ្នាលគុនខ្មែរបានច្រើនសំបូរធនធាន។

លោក ជាម អាដាំ និងសិស្ស

លោក ជាម អាដាំ បានឲ្យដឹងថា កីឡាប្រដាល់ក៏ដូចជាការរៀនសូត្រអីចឹងដែរ ពោលម្នាក់ៗរៀនរាប់ឆ្នាំទើបចប់ ឬក្លាយជាអ្នកពូកែយកចំណេះដឹងទៅប្រើប្រាស់បាន។ ចំណែកការហាត់ប្រដាល់ក៏ដូចគ្នា អ្នកដែលចាប់ហ្វឹកហាត់តាំងពីតូចមកហើយគឺនឹងល្អមានសមត្ថភាពខ្លាំងពូកែ។

សម្បត្តិ និង សុខ ធី

ម្ចាស់ខ្សែក្រវាត់ K Cement រូបនេះលើកឡើងទៀតថា អ្វីដែលលោកបានឃើញជាក់ស្ដែងសហព័ន្ធបណ្ដុះធនធានថ្នាលបានច្រើន។ ក្មេងៗបានហ្វឹកហាត់តាំងពីតូចដូចនេះទម្រាំដល់ធំនឹងសំបូរជើងខ្លាំងដូចជាប្រភេទ សុខ ធី ពេជ្រ សម្បត្តិ ឬអាចល្អជាងនេះទៀតផង។ បច្ចុប្បន្នក្មេងៗភាគច្រើនវាយបែបក្បាច់ស្នៀតល្អៗ។ ការហាត់ពីក្មេងទៅធ្វើឲ្យរាងកាយរឹងមាំ និងសមស្រប រហ័សរហួន។

លោក ខូវ ឆាយ

បញ្ជាក់ដែរថា សុខ ធី ពេជ្រ សម្បត្តិ គឺជាលំដាប់កីឡាករជួរមុខ និងមានកេរ្តិ៍ឈ្មោះល្បីជាខ្លាំងនាពេលបច្ចុប្បន្ននេះ។ ជាមួយគ្នានេះដែរបន្ទាប់ពីលោក ខូវ ឆាយ ចូលកាន់តំណែងជាប្រធានសហព័ន្ធប្រដាល់គុនខ្មែរគេមើលឃើញថាមានសកម្មភាពច្រើនពិសេសការចុះទៅតាមបណ្ដាក្លឹបប្រដាល់នានា ជ្រោមជ្រែងការបង្កើតក្លឹបថ្មីៗ និងឧបត្ថម្ភ លើកទឹកចិត្តលើការបណ្ដុះបណ្ដាលយុវជនថ្នាលបន្តវេនផងដែរ៕

អត្ថបទដោយ៖ នួន ស៊ីណា