កីឡា

បឹងកេត ជួប ទ័ព ជាគូមិនគួររំលង ក្រៅពី វិសាខា ប៉ះ ព្រះខ័នរាជស្វាយរៀង

បានផុស

៨ ខែ មុន

នៅ

ថ្ងៃសុក្រ ១២ កញ្ញា ២០២៥

ដោយ

ការជួបគ្នារបស់ម្ចាស់ផ្ទះ បឹងកេត ទទួលភ្ញៀវ កងយោធពលខេមរភូមិន្ទ ម៉ោង៦ល្ងាច ថ្ងៃអាទិត្យ ទី១៤ ខែកញ្ញា ឆ្នាំ ២០២៥ នៅពហុកីឡដ្ឋានជាតិអូឡាំពិក សប្តាហ៍ ទី៤ លីគកំពូលកម្ពុជា ជាគូគួរឲ្យចាប់អារម្មណ៍។

គូប្រកួតសប្តាហ៍ទី៤ អ្នកគាំទ្រចាប់អារម្មណ៍ខ្លាំងចំពោះ វិសាខា ប៉ះ ព្រះខ័នរាជស្វាយរៀង ប៉ុន្តែបើផ្អែកលើទម្រង់លេងនៅដើមរដូវកាលថ្មី ការជួបគ្នារវាង បឹងកេត និង កងយោធពលខេមរភូមិន្ទ គឺរឹតតែគួរឲ្យចាប់អារម្មណ៍ខ្លាំង។

ក្រុមរបស់លោកគ្រូ ភា សុភក្ត្រា មាន ៥ ពិន្ទុ កំពុងស្ថិតលេខ ៣ នៃតារាង បន្ទាប់ពីឈ្នះ វិសាខា ២-១, ស្មើ ណាហ្គាវើលដ៍ ១-១ និងស្មើ ភ្នំពេញក្រោន ១-១ ដោយមិនទាន់ស្គាល់បរាជ័យឡើយ។

ក្រុមកងយោធពលខេមរភូមិន្ទ ត្រូវបានមើលឃើញពីតំបន់ការពារដ៏រឹងមាំដែលដៃគូពិបាកទម្លាយឈានចូលប្រអប់គ្រោះថ្នាក់។ អ្វីដែលពិសេស ពួកគេប្រើក្បាច់ការពារ និងវាយបកដ៏មានប្រសិទ្ធភាពតាមរយៈកីឡាករវ័យក្មេងល្អៗដូចជា ខន ណារ៉ុង និងខ្សែប្រយុទ្ធជប៉ុន។

ដោយឡែក បឹងកេត មាន ៤ ពិន្ទុ ឈរលេខ ៤ បន្ទាប់ពីឈ្នះ ឡាយហ្វ ព្រះសីហុន ៣-២, ស្មើ ភ្នំពេញក្រោន ០-០ និង ចាញ់ ព្រះខ័នរាជស្វាយរៀង ៣-០។

ក្រុមរបស់លោក Conor Nestor មានកីឡាករបរទេសល្អគួរឲ្យកត់សំគាល់សម្រាប់រដូវកាលនេះ ប៉ុន្តែ ៣ ប្រកួតកន្លងមក ពួកគេនៅមិនទាន់បង្ហាញអ្វីគួរឲ្យចាប់អារម្មណ៍ខ្លាំងទេ។ នៅតំបន់ការពារ និងប្រយុទ្ធត្រូវការយល់ចិត្តគ្នាបន្ថែមទៀត ខណៈតំបន់បម្រើកណ្តាលល្អ ប៉ុន្តែជាសំណាងអាក្រក់ កីឡាករអង់គ្លេស Charlie Scott បានរបួស ត្រូវព្យាបាលហោចណាស់ ៣ ខែ។

ទោះបីជាយ៉ាងណា បើប្រៀបធៀបគ្នាគឺ បឹងកេត សំបូរកីឡាករមានគុណភាពល្អជាង ប៉ុន្តែទម្រង់លេងមិនលើសខ្វះគ្នាប៉ុន្មានឡើយ។ ប្រសិនបើ បឹងកេត ព្យាយាមសម្រុកខ្លាំង នោះច្បាស់ជាចន្លោះប្រហោងសម្រាប់ កងយោធពលខេមរភូមិន្ទវាយបកគ្រោះថ្នាក់មិនខាន។

ជួបគ្នា ១១ លើកចុងក្រោយ ទាំងក្នុងលីគ និងពានសម្តេចតេជោ បឹងកេត បានឈ្នះ ៦ លើក កងយោធពលខេមរភូមិន្ទ ឈ្នះ ៣ លើក និងស្មើគ្នា ២ លើក។ បឹងកេត បានឈ្នះក្នុងដី ៣ លើក និងក្រៅដី ៣ លើក ខណៈ កងយោធពលខេមរភូមិន្ទ ឈ្នះ ក្នុងដី ១ លើក និងក្រៅដី ២ លើក។