គួរប្រាប់អ្នកស៊ែរព័ត៌មានក្លែងក្លាយបែបណា កុំឱ្យគេអន់ចិត្ត?

ធ្លាប់ទេ ឃើញមនុស្សដែលខ្លួនស្គាល់ដូចជា គ្រួសារ សាច់ញាតិឬមិត្តភក្តិ ចុចស៊ែរ (Share) ព័ត៌មានដែលមិនពិតនិងប្រឌិតនៅលើបណ្តាញសង្គម? តើអ្នកត្រូវប្រាប់និងពន្យល់ពួកគេបែបណា ដើម្បីឱ្យសមហេតុផលនិងមិនបាត់បង់ទំនាក់ទំនងនោះ?

យោងតាមការចុះផ្សាយរបស់សារព័ត៌មានអង់គ្លេសល្បី BBC បានឱ្យដឹងថា ការចាប់ផ្តើមសន្ទនាទៅកាន់មនុស្សដែលអ្នកស្គាល់ហាក់បីដូចជាចម្លែកនៅពេលនិយាយដល់រឿងព័ត៌មានក្លែងក្លាយ។ ប៉ុន្តែមនុស្សគ្រប់រូបត្រូវតែមានចិត្តក្លាហានបញ្ចេញយោបល់និងណែនាំនៅពេលនរណាម្នាក់ចែករំលែកព័ត៌មានមិនពិត។ ដូច្នេះដើម្បីបង្ការកុំឱ្យបាត់បង់ទំនាក់ទំនងនោះអ្នកអាចសាកល្បងតាមវិធីដូចតទៅនេះ៖

១.សាកសួរពីប្រភពព័ត៌មាន

ស៊ើបសួរពីប្រភពព័ត៌មានដែលពួកគេបានចែករំលែកមក និងព្យាយាមបង្ហាញថា គណនីឬប្រភពព័ត៌មាននោះមិនអាចទុកចិត្តបានឡើយ។ បើសិនជាអ្នកដឹងពីប្រភពព័ត៌មានច្បាស់ការ ត្រូវពន្យល់ណែនាំទៅកាន់ពួកគេឱ្យតាមដានព័ត៌មានពីប្រភពទាំងនោះ។

២.ក្រើនរំលឹកពីផលវិបាក

ពេលខ្លះបើមនុស្សដែលអ្នកស្គាល់នោះស៊ែរព័ត៌មានប្រឌិត ឬមានប្រភពមិនច្បាស់លាស់ញឹកញាប់ សូមក្រើនរំលឹកពីផលវិបាកចំពោះមុខ។ កុំព្យាយាមធ្វើដូចជាគ្រូបង្រៀន តែធ្វើជាអ្នកប្រឹក្សាឬផ្តល់ដំណឹងជំនួសក្នុងនាមជាមនុស្សស្គាល់គ្នា។ កាលណាអ្នកធ្វើចេះពេក នោះពួកគេអាចមានចិត្តខឹងគិតថា អ្នកគិតថាពួកគេល្ងង់មិនចេះ ជាដើម។

៣.ព្យាយាមជួយកែតម្រូវដោយអត់ធ្មត់

ចង់កែតម្រូវកំហុសនរណាម្នាក់ ចំនុចសំខាន់បំផុតគឺការអត់ធ្មត់និងដោយគោរព។ ព្យាយាមបង្ហាញនូវក្តីព្រួយបារម្ភ និងទឹកចិត្តល្អ ព្រោះពួកគេអាចមានបំនងល្អចែករំលែកចំណេះដឹងឬព័ត៌មានគ្រាន់តែខ្វះចន្លោះមិនពិនិត្យឱ្យជាក់លាក់ប៉ុណ្ណោះ។ នេះគឺជាឱកាសដ៏ល្អមួយសម្រាប់ឱ្យអ្នកហ៊ានចេញមុខលុបបំបាត់ព័ត៌មានក្លែងក្លាយ ព្រោះអ្វីក៏ដោយត្រូវចាប់ផ្តើមពីខ្លួនអ្នក៕

ចុចអាន៖ គួរធ្វើយ៉ាងណា ពេលឃើញព័ត៌មានក្លែងក្លាយអំពីជំងឺកូវីដ-១៩?