Elon Musk ពន្យល់ហេតុផលដែលប្តូរឡូហ្គោ Twitter

កាលពីថ្ងៃចន្ទ មហាសេដ្ឋី Elon Musk បានសម្រេចចិត្ត​ប្តូរឈ្មោះ និងឡូហ្គោក្រុមហ៊ុន Twitter ដែលមានរូបបក្សីខៀវ ទៅជាអក្សរ “X” ភ្លាមៗតែម្តង សូម្បីឈ្មោះនៅលើអគារ Twitter ក៏ត្រូវដកចេញផងដែរ ពោលមិនដល់រយៈពេល ២៤ ម៉ោងឡើយ ។

ចំពោះហេតុផលនៃការផ្លាស់ប្តូរនេះ​ មហាសេដ្ឋី Elon Musk បានពន្យល់ថា “ក្រុមហ៊ុនមិនមែនប្តូរឈ្មោះដោយខ្លួនឯងនោះទេ គឺមានការឯកភាពគ្នា ហើយឈ្មោះ Twitter គឺបង្កប់អត្ថន័យនៃការសរសេរតួអក្សរសរុប ១៤០ ដែលសរសេរទៅមកប៉ុណ្ណោះ ដូចជាសត្វចាបកំពុងសរសេរអញ្ជឹង”។

សម្រាប់ការប្តូរឈ្មោះ​ក្រុមហ៊ុន និង​វេបសាយទៅជា X.com វិញគឺលោក​ Musk ចង់ប្រែឲ្យកម្មវិធីមួយនេះសម្រាប់ទំនាក់ទំនងពហុ​ព័ត៌មាន និងមានសមត្ថភាពអាចដឹកនាំពិភពលោកហិរញ្ញវត្ថុទាំងមូល ។

ពាក់ព័ន្ធនឹងបញ្ហានេះដែរ នាយកប្រតិបត្តិថ្មី​របស់ក្រុមហ៊ុនលោកស្រី Linda Yaccarino បាននិយាយថា ឡូហ្គោថ្មី X នេះក៏នឹងរួមបញ្ចូលលក្ខណៈពិសេសនៃប្រព័ន្ធបច្ចេកវិទ្យាហិរញ្ញវត្ថុផងដែរ ។ ម្យ៉ាងទៀត ក្រុមហ៊ុនមានភារកិច្ចក្នុងការស្ដារទំនុកចិត្តជាមួយអ្នកផ្សាយពាណិជ្ជកម្ម និងអ្នកប្រើប្រាស់ដូចគ្នា ។

មុនឈានដល់ការសម្រេចចិត្តដូរឡូហ្គោនេះ Twitter បានខាតបង់ចំណូលផ្សាយពាណិជ្ជកម្មជាងពាក់កណ្តាលនៃចំណូលសរុប ហើយបើតាមអ្នកវិភាគបានឲ្យដឹងថា ការផ្លាស់ប្តូរ​នេះនឹងធ្វើឲ្យបណ្តាញសង្គមមួយនេះ កាន់តែមានភាពទាក់ទាញឡើងវិញ ។

គួរបញ្ជាក់ថា ឡូហ្គោបក្សីពណ៌ខៀវរបស់ Twitter ត្រូវបានរចនាឡើងក្នុងឆ្នាំ ២០១២ ដោយក្រុមមនុស្សចំនួន ៣ នាក់ ខណៈលោក Martin Grasser ដែលជាអ្នករចនាម្នាក់ក្នុងចំណោមអ្នកទាំង ៣ បានឲ្យដឹងថា និមិត្តសញ្ញាចាស់នេះត្រូវបានរចនាឡើងឲ្យមានលក្ខណៈសាមញ្ញ និងអាចមើលបានក្នុងទំហំតូចបំផុត ស្ទើរតែដូចអក្សរ “e” តូច ៕

ប្រែសម្រួល៖ នាង រតនៈ

ប្រភព៖ Economic Times

ចុចអាន ៖ មហាសេដ្ឋី Elon Musk បង្ហាញឡូហ្គោ Twitter ថ្មី ជំនួស​បក្សីពណ៌ខៀវ