Facebook គាំង១ម៉ោង តើក្រុមហ៊ុន Meta ខាតលុយប៉ុន្មាន?

កាលពីយប់ថ្ងៃអង្គារទី៥ខែមីនា Facebook, Instagram និង Messenger ត្រូវគាំងទូទាំងពិភពលោកដោយសារបញ្ហាបច្ចេកទេស ដែលធ្វើឲ្យអ្នកប្រើប្រាស់មិនអាច Log in ផ្ញើឬទទួលសារបាន ហើយបើយោងតាមគេហទំព័រ GBN, ក្រុមហ៊ុនមេគឺ Meta ដែលដឹកនាំដោយ លោក Mark Zuckerberg បានធ្លាក់តម្លៃ១,៥% ពោលគឺក្រុមហ៊ុនត្រូវខាតលុយប្រមាណ១៨ពាន់លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុននេះរកបានប្រាក់ចំណូលភាគច្រើន តាមរយៈការផ្សាយពាណិជ្ជកម្ម ដូចនេះគ្មានអ្វីត្រូវសង្ស័យឡើយដែលថា ចំណូលរបស់ខ្លួនត្រូវទាញទម្លាក់ដោយសារតែបញ្ហានេះ។

មនុស្សមួយចំនួនដែលជួបប្រទះការជាប់គាំង ដំបូងគិតថា គណនីរបស់ពួកគេអាចត្រូវបានគេ Hack ប៉ុន្តែមានការបង្ហោះជាង ៨០ ០០០ ផូសនៅលើបណ្តាញសង្គម X ដែលអះអាងថា Facebook និង Instagram កំពុងគាំង។

ភ្លាមៗនោះ លោក Andy Stone អ្នកនាំពាក្យក្រុមហ៊ុន Meta បានបញ្ជាក់នៅលើ X ថា “បញ្ហាបច្ចេកទេស បណ្តាលឲ្យមនុស្សពិបាកចូលប្រើប្រាស់សេវាកម្មមួយចំនួនរបស់យើង។ យើងនឹងដោះស្រាយបញ្ហាឲ្យបានលឿនតាមលទ្ធភាព សម្រាប់អ្នកគ្រប់គ្នាដែលរងផលប៉ះពាល់ ហើយយើងសូមអភ័យទោសចំពោះការរអាក់រអួល”។

សូមបញ្ជាក់ថា នៅយប់ថ្ងៃអង្គារទី៥ខែមីនា Facebook ក្នុងប្រទេសកម្ពុជា ត្រូវជួបបញ្ហាជាប់គាំងរយៈពេល១ម៉ោងពោលគឺចាប់ពីម៉ោង ១០ និង ៣០នាទីយប់ រហូតដល់ម៉ោង ១១ និង ៣០នាទីយប់ ទើបដំណើរដូចប្រក្រតីវិញ។

សម្រាប់បញ្ហានេះ បណ្ដាញសង្គម Facebook ហាក់ដូចលុបចោលនូវគណនីអ្នកប្រើប្រាស់ ធ្វើឲ្យអ្នកប្រើប្រាស់មិនអាចចូលគណនីរបស់ពួកគេបានឡើយ។ ចំណែក Instagram ហាក់លុបទិន្នន័យរបស់អ្នកប្រើប្រាស់ដូចជារូបថត និងវីដេអូឃ្លីប ជាដើម៕

អត្ថបទ៖ សុខ សុវណ្ណ

ចុចអាន៖ ដោយសារបញ្ហាដាច់ចរន្តអគ្គិសនីជាសកល ទើប Facebook និង Instagram មិនអាចដំណើរការ