កីឡា

វឿន វាសនា ត្រូវជួយ ក្រុម Win Streak ធ្វើការធ្ងន់២ប្រកួតថ្ងៃសៅរ៍-អាទិត្យ

បានផុស

៧ ខែ មុន

នៅ

ថ្ងៃសៅរ៍ ១១ តុលា ២០២៥

ដោយ

ក្រុមបាល់ទះ Win Streak ដែលជាផ្ទះរបស់កីឡាករជម្រើសជាតិកម្ពុជា វឿន វាសនា ត្រូវលេងពីរប្រកួតនៅថ្ងៃសៅរ៍-អាទិត្យ ទី១១-១២ ខែតុលា ឆ្នាំ ២០២៥ ក្នុងលីគបាល់ទះអាជីពតៃវ៉ាន់។

នៅថ្ងៃសៅរ៍ វេលាម៉ោង ៥:៣០នាទីល្ងាច ក្រុម Win Streak ទំនងជាមិនសូវធ្វើការធ្ងន់ទេដោយត្រូវជួបក្រុម Taoyuan Leopards ដោយសារពួកគេបានយកឈ្នះដោយលទ្ធផល ៣-០ កាលពីសប្តាហ៍មុន។

ប៉ុន្តែនៅថ្ងៃអាទិត្យ វេលាម៉ោង ២:០០រសៀល ក្រុម Win Streak ច្បាស់ជាធ្វើការធ្ងន់មិនខានដោយត្រូវជួបនឹងក្រុមខ្លាំង TSG Sky Hawks។ កាលពីសប្តាហ៍មុន ក្រុមរបស់ វឿន វាសនា ទទួលបានជ័យជម្នះយ៉ាងលំបាកលើក្រុមមួយនេះ។ ពេលនោះ Sky Hawks បានយកឈ្នះ ២សិតដំបូង ទើប Win Streak បានវាយបកយកឈ្នះ ៣សិតចុងក្រោយ ដើម្បីបញ្ចប់ដោយលទ្ធផល ៣-២។

ឆ្លងកាត់ ៣ ប្រកួតកន្លងទៅ ក្រុម Win Streak បានឈ្នះ Taipei East Power ៣-០, ឈ្នះ Taoyuan Leopards ៣-០ និងឈ្នះ TSG Sky Hawks ៣-២ ដើម្បីរកបាន ៨ ពិន្ទុ កំពុងឈរលើកំពូលតារាង។

កីឡាករគួរឲ្យចាប់អារម្មណ៍បំផុតក្នុងការប្រកួតរបស់ក្រុម Win Streak គឺគ្មានអ្នកផ្សេងក្រៅពី វឿន វាសនា ឡើយ ដែលបានពិន្ទុច្រើនជាងគេបំផុតសម្រាប់ការប្រកួត ៣ លើកកន្លងមក។ កីឡាករកម្ពុជា រកបាន ១៩ពិន្ទុ សម្រាប់ការប្រកួតទី១, រកបាន ១៦ពិន្ទុសម្រាប់ការប្រកួតទី២ និងរកបាន ៣៤ពិន្ទុសម្រាប់ការប្រកួតទី៣ ហើយបានក្លាយជាកីឡាករល្អជាងគេប្រចាំការប្រកួតទាំង ៣ លើកជាប់គ្នា។

សូមបញ្ជាក់ថា លីគបាល់ទះកំពូលតៃវ៉ាន់ មានតែ ៤ ក្រុមប៉ុណ្ណោះចូលរួមប្រកួតនៅក្នុងរដូវកាលនេះ បន្ទាប់ពីពួកគេបានអភិវឌ្ឍខ្លួនឲ្យក្លាយជាលីគបាល់ទះអាជីពតៃវ៉ាន់ ខណៈរដូវកាលមុនមាន ៦ ក្រុម។ ទោះបីជាយ៉ាងណា ក្រុមនីមួយៗសុទ្ធតែពង្រឹងខ្លួនបានល្អតាមរយៈការនាំចូលកីឡាករបរទេសជាច្រើន។

វឿន វាសនា ទំនងជានឹងវិលត្រឡប់មកកម្ពុជា នៅពេលលីគបាល់ទះតៃវ៉ាន់សម្រាក ដើម្បីចូលរួមហ្វឹកហាត់ជាមួយក្រុមបាល់ទះជម្រើសជាតិកម្ពុជាត្រៀមការប្រកួតអន្តរជាតិ។ ជាពិសេសកីឡាស៊ីហ្គេម ចុងឆ្នាំនេះនៅប្រទេសថៃ៕