៣ថ្ងៃ នៃពិធីបុណ្យអុំទូក អ្នកនៅភ្នំពេញ អាចកម្សាន្តបានក្នុងព្រឹត្តិការណ៍ពិព័រណ៍ធំជាងគេ លើទឹកដីនៃកោះនរា

ដ្បិតឆ្នាំ២០២៥ រាជធានីភ្នំពេញ ផ្អាកការប្រារព្ធព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ប៉ុន្តែមិនកម្សត់ទេសម្រាប់អ្នករស់នៅក្រុងភ្នំពេញ ដោយសារតែ Khmer Streat Night Market បានប្រកាសពីការរៀបចំព្រឹត្តិការណ៍ ពិព័រណ៍ធំជាងគេ លើទឹកដីនៃកោះនរា ដោយមានស្តង់ផលិតផលជាច្រើន ព្រមនឹងទស្សនីយភាពសិល្បៈចម្រុះ និងកម្មវិធីកំសាន្តផ្សេងៗផងដែរ។

បើតាមទំព័រហ្វេសប៊ុកផ្លូវការ Khmer Streat Night Market បញ្ជាក់ថា ក្នុងឱកាសអបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ ឆ្នាំ២០២៥ ពីថ្ងៃទី ៤ – ៥ – ៦ ខែវិច្ឆិកា ខាងមុខនេះ នឹងការរៀបចំព្រឹត្តិការណ៍ ពិព័រណ៍ធំជាងគេ លើទឹកដីនៃកោះនរា នៃរាជធានីភ្នំពេញ ដោយមានស្តង់ជាច្រើនសម្រាប់អាជីវករខ្មែរ ដាក់បង្ហាញផ្សព្វផ្សាយផលិតផលរបស់ខ្លួន។

ក្នុងកម្មវិធីរយៈពេល ៣ថ្ងៃនេះដែរ មានការរៀបចំទស្សនីយភាពសិល្បៈបុរាណចម្រុះផងដែរ ដោយថ្ងៃទី១ មានការបង្ហាញល្ខោនស្រមោលស្បែកធំ, ក្បាច់គុនល្បុកតោ និង ការសម្តែងរបាំបុរាណ។ ឯថ្ងៃទី២ មានការបង្ហាញល្ខោនបុរាណខ្មែរ, កម្មវិធីដើរម៉ូត (Fashion Show) និងការសម្តែងរបាំបុរាណ និងថ្ងៃចុងបញ្ចប់នៃព្រឹត្តិការណ៍បុណ្យអុំទូកវិញ គឺមានល្ខោនស្រមោលស្បែកតូច, ការទស្សនាល្ខោនខោល និងការសម្តែងរបាំបុរាណ។

ដោយឡែក ក៏មានការរៀបចំកម្មវិធីកំសាន្តផ្សេងៗផងដែរដូចជា កម្មវិធីវេចនំអន្សមខ្មែរ , ផ្ទះ Balloon កុមារ , ការស្លៀកពាក់បុរាណខ្មែរជាដើម។