ព័ត៌មានអន្ដរជាតិ

អនុទីន ប្រាប់ថា រដ្ឋាភិបាលថៃ នឹងស្តាប់តាមពលរដ្ឋ រឿងបើកព្រំដែនជាមួយកម្ពុជា

បានផុស

៧ ខែ មុន

នៅ

ថ្ងៃអាទិត្យ ២ វិច្ឆិកា ២០២៥

ដោយ

ក្រោយវិលត្រឡប់ពីកិច្ចប្រជុំកំពូល APEC នៅប្រទេសកូរ៉េខាងត្បូង, នាយករដ្ឋមន្ត្រីថៃ អនុទីន ឆានវីរៈគុល បានថ្លែងទៅកាន់អ្នកសារព័ត៌មាន ដោយបញ្ជាក់យ៉ាងច្បាស់ថា រឿងបើកព្រំដែនឡើងវិញជាមួយកម្ពុជា រដ្ឋាភិបាលទីក្រុងបាងកកត្រូវតែស្ដាប់តាមប្រជាពលរដ្ឋថៃ។

នាយករដ្ឋមន្ត្រីថៃ អនុទីន ឆានវីរៈគុល (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ The Nation នៅថ្ងៃអាទិត្យទី២ខែវិច្ឆិកាឆ្នាំ២០២៥, លោកអនុទីន អះអាងថា «ខ្ញុំមិនដែលពិភាក្សារឿងបើកព្រំដែនជាមួយកម្ពុជាវិញឡើយ។ ប្រសិនបើខ្ញុំនៅតែមានតំណែងក្នុងរដ្ឋាភិបាល នោះច្រកព្រំដែននឹងមិនបើកឡើងវិញទេបើគ្មានការយល់ព្រមពីសាធារណជន។ រដ្ឋាភិបាលត្រូវតែស្ដាប់ប្រជាពលរដ្ឋជាមុនសិនហើយធានាថា មិនមានហានិភ័យដល់សន្តិសុខជាតិ»។

ពាក់ព័ន្ធរឿងនេះដែរ លោកអនុទីន ធ្លាប់ច្រានចោលរួចហើយចំពោះរបាយការណ៍ដែលថា ថៃនឹងបើកច្រកព្រំដែនជាមួយកម្ពុជាឡើងវិញនៅខែវិច្ឆិកា។

លោកបានបញ្ជាក់កាលពីថ្ងៃចន្ទទី២៧ខែតុលាថា ត្រូវតែអនុវត្តលក្ខខណ្ឌទាំងបួនដែលមានចែងក្នុងកិច្ចព្រមព្រៀងសន្តិភាពនាពេលថ្មីៗនេះសិន មុនពេលទំនាក់ទំនងធម្មតាអាចចាប់ផ្តើមវិញបាន។

សូមជម្រាបជាថ្មី ព្រំដែនដែលជាចំណុចស្នូលនៃជម្លោះទឹកដីកម្ពុជា-ថៃអស់ជាច្រើនទសវត្សរ៍មកហើយនោះ ត្រូវបានបិទកាលពីខែមិថុនាឆ្នាំ២០២៥ បន្ទាប់ពីមានភាពតានតឹងកាន់តែខ្លាំងឡើង រួមទាំងការប៉ះទង្គិចប្រដាប់អាវុធក្នុងខែកក្កដា។

ការបិទព្រំដែនបានជះឥទ្ធិពលអវិជ្ជមានដល់អាជីវកម្មដែលពឹងផ្អែកលើការដឹកជញ្ជូនឆ្លងកាត់ព្រំដែន។ លោក Kriengkrai Thiennukul ប្រធានសហព័ន្ធឧស្សាហកម្មថៃ (FTI) បានកត់សម្គាល់ថា ការរំខាននេះបានបង្កើនតម្លៃខ្សែសង្វាក់ផ្គត់ផ្គង់។ រដ្ឋាភិបាលថៃត្រូវបានជំរុញឲ្យផ្តល់ជំនួយផ្នែកហិរញ្ញវត្ថុដល់អាជីវកម្មដែលរងផលប៉ះពាល់ ខណៈដែលការចរចាកំពុងបន្ត៕

អត្ថបទ៖ សុខ សុវណ្ណ

ចុចអាន៖ Anutin ដួលផ្កាប់មុខ ពេលចុះពីឧទ្ធម្ភាគចក្រ នៅខេត្ត Phichit