រយៈពេល៣ថ្ងៃនៃពិធីបុណ្យអុំទូក មណ្ឌលគិរីទទួលបានភ្ញៀវទេសចរជាង៧ម៉ឺននាក់

រយៈពេល៣ថ្ងៃ គិតចាប់ទី៤ដល់៦ខែវិច្ឆិកាឆ្នាំ២០២៥ ក្នុងឱកាសនៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ខេត្តមណ្ឌលគិរី ទទួលស្វាគមន៍ភ្ញៀវទេសចរជាតិនិងអន្តរជាតិមកកម្សាន្តតាមរមណីយដ្ឋានផ្សេងៗទូទាំងប្រទេសសរុបចំនួន ៧៣ ៦៨៩នាក់ ក្នុងនោះភ្ញៀវទេសចរបរទេស ៤៤៦ នាក់។ ចំនួននេះមានការកើនឡើង ៣៩.៥៨% បើធៀបនៅឆ្នាំ២០២៤ មានភ្ញៀវត្រឹម ៥២ ៧៩៣ នាក់។ នេះបើតាមរបាយការណ៍ពីលោក ស៊ាង សឿន ប្រធានមន្ទីរទេសចរខេត្តមណ្ឌលគិរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះភ្ញៀវទេសចរជាតិ និងអន្តរជាតិបានដើរទស្សនាកម្សាន្តតាមរមណីយដ្ឋានល្បីៗនៅក្នុងខេត្តមណ្ឌលគិរីរួមមាន រមណីយដ្ឋានទឹកជ្រោះប៊ូស្រា ដែលជារមណីយដ្ឋានដ៏ធំជាងគេនៅក្នុងខេត្ត និងភ្នំថ្មយក្សណាមលៀរ រមណីយដ្ឋានអូរផ្លាយ ទឹកធ្លាក់ដំណាក់ស្ដេច មណ្ឌលវប្បធម៌ភ្នំដោះក្រមុំ ទំនប់អូរតេធិបតី វាលស្មៅខៀវបៃតង ចម្ការស្រល់ក្នុងស្រុកអូររាំង និងរមណីដ្ឋានផ្សេងៗជាច្រើនទៀតផងដែរ។

ជាងនេះទៅទៀត ក្នុងពិធីបុណ្យអុំទូក រយៈពេលបីថ្ងៃនោះភ្ញៀវទេសចរបានទៅប្រមូលផ្ដុំគ្នានៅឯ សួនដំរី ដែលទីនោះមានការដាក់តាំងបង្ហាញពិព័រណ៍ ផលិតផលប្រចាំតំបន់ ហើយអ្វីដែលជាភាពលេចធ្លោជាងគេគឺសម្លព្រូងបំពង់ឫស្សីដែលជាអត្តសញ្ញាណជនជាតិដើមភាគតិចដែលមានចំនួន ១ ០០០បំពង់ ដែលដាក់បង្ហាញសម្រាប់ប្រជាពលរដ្ឋ និងភ្ញៀវទេសចរអាចភ្លក្សបានដោយឥតគិតថ្លៃ។

ទន្ទឹមនឹងការដើរកម្សាន្តយ៉ាងសប្បាយរីករាយក្នុងឱកាសនោះ ស្ថានភាពទូទៅនៃសន្តិសុខសណ្ដាប់ធ្នាប់និងអនាម័យតាមតំបន់ទេសចរណ៍ទូទាំងខេត្តមណ្ឌលគិរី ក៏មានភាពល្អប្រសើរ ពោរពេញដោយស្នាមញញឹមក្នុងថ្ងៃឈប់សម្រាកនាឱកាសពិធីបុណ្យអុំទូករយៈពេលបីថ្ងៃ។

លើសពីនេះ រដ្ឋបាលខេត្តបានយកចិត្តទុកដាក់ខ្ពស់លើការគ្រប់គ្រង និងការតាមដានទេសចរណ៍ជាប្រចាំ ដើម្បីធានាខេត្តមណ្ឌលគិរី ជាខេត្តទេសចរណ៍ដែលមានសុខសុវត្ថិភាពសណ្ដាប់ធ្នាប់ល្អជូនភ្ញៀវទេសចរឱ្យបានប្រសើរ និងគួរទាក់ទាញសម្រាប់មកកម្សាន្តនាឱកាសក្រោយៗទៀតផងដែរ៕

អត្ថបទ៖ រៀម សុខហេង