កម្ពុជា បន្តដកតួឯកក្នុងសង្គ្រាម៥ថ្ងៃ ចេញពីព្រំដែនជម្លោះលើកទី២ នៃជំហានទី១ទៅកាន់មូលដ្ឋានដើម ក្រោមក្រសែភ្នែកអ្នកសង្កេតការណ៍អាស៊ាន

កងទ័ពកម្ពុជា នៅវេលាម៉ោង៦÷០០នាទីល្ងាចថ្ងៃទី៨ ខែវិច្ឆិកា ឆ្នាំ២០២៥ បានអនុវត្តការកែសម្រួលអាវុធ និងយុទ្ធោបករណ៍បំផ្លិចបំផ្លាញធុនធ្ងន់ជំហានទី២ នៃដំណាក់កាលទី១ ចេញពីព្រំដែនជម្លោះ នៅស្រុកចុងកាល់ ខេត្តឧត្តរមានជ័យ ចល័តឆ្ពោះទៅកាន់មូលដ្ឋានដើមវិញ។ នេះបើតាមការបញ្ជាក់របស់អ្នកនាំពាក្យក្រសួងការពារជាតិកម្ពុជា លោកស្រី ម៉ាលី សុជាតា ក្នុងសេចក្ដីប្រកាសព័ត៌មានផ្សព្វផ្សាយតាមរយៈបណ្ដាញសង្គមរបស់ក្រសួងកម្ពុជាតិ។

តាមអ្នកនាំពាក្យ ការកែសម្រួលយុទ្ធោបករណ៍ទៅកាន់ទីតាំងដើមវិញរបស់កម្ពុជា ធ្វើឡើងក្នុងពេលដំណាលគ្នាជាមួយនឹងភាគីថៃ ហើយក្រោមការសង្កេតការពារសំណាក់ក្រុមអ្នកសង្កេតការអាស៊ានដូចគ្នា។

អ្នកនាំពាក្យក្រសួងការពារជាតិកម្ពុជា អះអាងថា ការកែសម្រួលអាវុធ និងយុទ្ធោបករណ៍បំផ្លិចបំផ្លាញធុនធ្ងន់នេះ ជាការបង្ហាញពីការប្តេជ្ញាចិត្តរបស់ភាគីកម្ពុជា និងភាគីថៃ ក្នុងការគោរព និងអនុវត្តនូវអ្វីដែលបានឯកភាពគ្នានៅក្នុងសេចក្តីថ្លែងការណ៍រួមទីក្រុងកូឡាឡាំពួរ ស្តីពីកិច្ចព្រមព្រៀងសន្តិភាពរវាងកម្ពុជានិងថៃ ដែលបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ ព្រមទាំងស្មារតីនៃកិច្ចប្រជុំពិសេសលើកទី២ នៃគណៈកម្មាធិការព្រំដែនទូទៅ កម្ពុជា-ថៃ (GBC) ដែលប្រព្រឹត្តទៅនៅប្រទេសម៉ាឡេស៊ី កាលពីថ្ងៃទី២៣ ខែតុលា ឆ្នាំ២០២៥។លោកស្រីឧត្តមសេនីយ៍ឯក

លោកស្រី ឧត្តមសេនីយ៍ឯក ម៉ាលី សុជាតា គូសបញ្ជាក់ថា កម្ពុជាសង្ឃឹមយ៉ាងមុតមាំថា ទាំងភាគីកម្ពុជា និងភាគីថៃនឹងបន្តអនុវត្តឱ្យបានពេញលេញ និងប្រកបដោយប្រសិទ្ធភាពនូវសេចក្តីថ្លែងការណ៍រួមទីក្រុងកូឡាឡាំពួរ ស្តីពីកិច្ចព្រមព្រៀងសន្តិភាពរវាងកម្ពុជានិងថៃ ដោយភាពស្មោះត្រង់ សុច្ឆន្ទៈ និងតម្លាភាព សំដៅចូលរួមចំណែកដល់ការលើកកម្ពស់សន្តិភាព ស្ថិរភាព កិច្ចសហប្រតិបត្តិការ ការអភិវឌ្ឍ និងការវិលត្រឡប់ទៅរកប្រក្រតីភាពឡើងវិញឱ្យបានឆាប់ ដើម្បីជាប្រយោជន៍ដល់ប្រទេស និងប្រជាជនទាំងពីរជាច្រើនជំនាន់តទៅមុខទៀត។

គួរឱ្យដឹងថា កាលពីថ្ងៃទី៣១ ខែតុលា ឆ្នាំ២០២៥ យោធភូមិភាគទី៤ កម្ពុជា និងកងទ័ពភូមិភាគទី២ ថៃ បានឯកភាពគ្នាលើផែនការជាក់លាក់ ក្នុងការសម្រួលយុទ្ធោបករណ៍ និងអាវុធធុនធ្ងន់របស់ភាគីទាំងសងខាងតាមដំណាក់កាល នៅក្រោមការសង្កេត និងការផ្ទៀងផ្ទាត់របស់ AOT សំដៅរួមគ្នាកាត់បន្ថយភាពតានតឹងផ្នែកយោធា។ ការកែសម្រួលអាវុធ និងយុទ្ធោបករណ៍បំផ្លិចបំផ្លាញធុនធ្ងន់សម្រាប់ដំណាក់កាលទី១នេះ ត្រូវធ្វើឡើងចំនួន ០៣ លើក គឺចាប់ពីថ្ងៃទី១ រហូតដល់ថ្ងៃទី២១ ខែវិច្ឆិកា ឆ្នាំ២០២៥។

សូមរម្លឹកថា កម្ពុជា និងថៃ បានអនុវត្តការកែសម្រួលអាវុធ និងយុទ្ធោបករណ៍បំផ្លិចបំផ្លាញធុនធ្ងន់ជំហានទី១ នៃដំណាក់កាលទី១ ម្ដងរួចមកហើយ ដោយទទួលបានជោគជ័យនៅក្រោមការសង្កេត និងផ្ទៀងផ្ទាត់របស់ក្រុមអ្នកសង្កេតការណ៍អាស៊ាន (AOT) កាលពីថ្ងៃទី១ ខែវិច្ឆិកា ឆ្នាំ២០២៥។

កាលណោះ កម្ពុជា បានដកអាវុធ និងយុទ្ធោបករណ៍បំផ្លិចបំផ្លាញធុនធ្ងន់ដូចជាប្រព័ន្ធបាញ់កាំជ្រួចហ្វូង៤០កាណុង និងកាំភ្លើងធំចល័ត ចេញពីតំបន់ជម្លោះតាមបណ្ដោយព្រំដែនក្នុងស្រុកជាំក្សាន្ត និងស្រុករវៀង ខេត្តព្រះវិហារ នៅវេលាម៉ោង ៦:៤៥នាទី ថ្ងៃទី០១ ខែវិច្ឆិកាមកកាន់មូលដ្ឋានដើមវិញ ដោយមួយផ្នែកនៅក្នុងខេត្តកណ្ដាល និងមួយផ្នែកទៀតនៅក្នុងខេត្តកំពង់ស្ពឺ ក្រោមការឃ្លាំមើលពីសំណាក់ក្រុមអ្នកសង្កេតការណ៍អាស៊ាន (AOT) នៅវេលាព្រឹកថ្ងៃទី៤ ខែវិច្ឆិកា៕

ដោយ÷ ង៉ិល ណារ៉ាត់