សេដ្ឋកិច្ច

ARDB បានបញ្ចេញទុនពិសេសជិត ២០ លានដុល្លារហើយ នៃកញ្ចប់ទុនសរុប ដើម្បីប្រមូលទិញស្រូវពីកសិករ

បានផុស

៨ ខែ មុន

នៅ

ថ្ងៃពុធ ១៩ វិច្ឆិកា ២០២៥

ដោយ

ទុនពិសេស ៤០ លានដុល្លារ ដែលរាជរដ្ឋាភិបាលកម្ពុជាទម្លាក់ដើម្បីជួយដោះស្រាយបញ្ហាស្រូវធ្លាក់ថ្លៃមកទល់ពេលបច្ចុប្បន្ននេះ ធនាគារអភិវឌ្ឍន៍ជនបទ និងកសិកម្ម (ARDB) បានបញ្ចេញទុនអស់ជិត ២០ លានដុល្លារហើយ ដើម្បីប្រើប្រាស់ក្នុងការប្រមូលទិញស្រូវពីប្រជាកសិករ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កៅ ថាច អគ្គនាយក ARDB បានបញ្ជាក់ប្រាប់«កម្ពុជាថ្មី» នៅថ្ងៃទី១៩ ខែវិច្ឆិកានេះថា សម្រាប់ទុនពិសេសដែលរាជរដ្ឋាភិបាលកម្ពុជាទើបតែបានទម្លាក់ដើម្បីជាទុនបន្ថែមទៅដល់បណ្តារោងម៉ាស៊ីនកិនស្រូវក្នុងស្រុកក្នុងការប្រមូលទិញស្រូវពីកសិករ ក៏ដូចជារក្សាតម្លៃស្រូវឱ្យមានស្ថិរភាព មកទល់ពេលនេះបានប្រើប្រាស់អស់ជិត ២០ លានដុល្លារហើយ ។

ក្នុងនោះដែរ រោងម៉ាស៊ីនដែលបានចូលរួមនៅក្នុងការប្រើប្រាស់កញ្ចប់ទុននេះមានប្រមាណជាង ២០ រោងម៉ាស៊ីនកិនស្រូវហើយ ដែលភាគច្រើន រោងម៉ាស៊ីនទាំងអស់នោះបានធ្វើការប្រមូលទិញនូវប្រភេទស្រូវផ្ការំដួលពីកសិករ។

លោក ក៏បានបញ្ជាក់ដែរថា៖« រោងម៉ាស៊ីនកិនស្រូវទាំងជាង ២០ រោងម៉ាស៊ីននេះសុទ្ធសឹងតែជាសមាជិករបស់សហព័ន្ធស្រូវអង្ករកម្ពុជា ហើយនិងរោងម៉ាស៊ីនដែលមានកិច្ចសហការជាមួយក្រសួងកសិកម្ម រុក្ខាប្រមាញ់ និងនេសាទ»។

ជាមួយគ្នានេះ បើតាមលោកឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជា ក៏បានឱ្យដឹងដែរថា បច្ចុប្បន្ន រោងម៉ាស៊ីនកិនស្រូវដែលជាសមាជិករបស់ខ្លួន និង ដែលបានសហការជាមួយក្រសួងកសិកម្ម និងប្រើប្រាស់នូវកញ្ចប់ថវិការបស់រាជរដ្ឋាភិបាល បាននិងកំពុងប្រមូលទិញស្រូវពីកសិករប្រចាំថ្ងៃ ដោយជាមធ្យមក្នុងរង្វង់ ១ ម៉ឺន ៥ ពាន់តោន។