អ្នក​ស្លាប់កើនដល់​៥​នាក់ និង​៤៥០នាក់របួស ព្រោះ​រញ្ជួយដី៥,៥រ៉ិចទ័រវាយប្រហារបង់ក្លាដែស

យោង​តាម BBC ការរញ្ជួយដីកម្រិត៥,៥រ៉ិចទ័របានវាយប្រហារប្រទេសបង់ក្លាដែសកាលពីថ្ងៃសុក្រ​ទី​២១​ខែ​វិច្ឆិកា​ឆ្នាំ​២០២៥ ដែលបានសម្លាប់មនុស្សយ៉ាងតិច៥នាក់ និងបានធ្វើ​​ឲ្យ​មនុស្សជាង៤៥០នាក់រងរបួស។

ចំណុចកណ្តាលនៃរញ្ជួយដីស្ថិតនៅក្បែរស្រុកណាស៊ីងឌី ចម្ងាយប្រមាណ៣០គីឡូម៉ែត្រពីទីក្រុងដាកា ជាទីដែលអគារបានរង្គើយ៉ាងខ្លាំង ហើយប្រជាពលរដ្ឋបានសម្រុកចេញទៅតាមផ្លូវ។ សំណង់បណ្ដោះអាសន្នបានបាក់រលំ ហើយយ៉ាងហោចណាស់និស្សិតសាកលវិទ្យាល័យដាកា១០នាក់បានរងរបួសនៅក្នុងការរត់ជាន់គ្នា ខណៈដែលពួកគេបានរត់គេចចេញពីថ្នាក់រៀន។

អ្នកស្រី សៃយីដា រីហ្សវ៉ាណា ហាសាន់ (Syeda Rizwana Hasan) ទីប្រឹក្សាបរិស្ថានរបស់រដ្ឋាភិបាល បាននិយាយថា «យើងមិនធ្លាប់ជួបប្រទះការរញ្ជួយដីដ៏ខ្លាំងក្លាបែបនេះក្នុងរយៈពេល៥ឆ្នាំចុងក្រោយទេ»។

ស្នងការរងនគរបាលលោក ម៉ាលីក អាហ្សង់ អ៊ូឌីន សាមី (Mallik Ahsan Uddin Sami) បានប្រាប់​ថា មនុស្ស៣នាក់បានស្លាប់នៅក្នុងតំបន់ Armanitola នៃទីក្រុងដាកា នៅពេលដែលរបងដែក និងកម្ទេចកម្ទីបានធ្លាក់ពីលើអគារ៥ជាន់។

នាយកដ្ឋានគ្រប់គ្រងគ្រោះមហន្តរាយបានរាយការណ៍ថា មានអ្នករបួសចំនួន៤៦១នាក់នៅទូទាំងប្រទេស ក្នុង​នោះ​គ្រាន់​តែ​នៅក្នុងតំបន់ហ្គាហ្សីពួរ (Gazipur) តែ​ឯង​មាន​អ្នក​របួស​​ដល់​ទៅ​២៥២នាក់។ នាយកផ្នែកត្រួតពិនិត្យលោក នីតៃ ច័ន្ទរ៉ា ដេ សារកា (Nitai Chandra De Sarkar) បានប្រាប់​ថា «កិច្ចការចម្បងរបស់យើងនៅពេលនេះគឺវាយតម្លៃពីចំនួនអ្នកស្លាប់ និងការខូចខាត»។

ប្រជាពលរដ្ឋបានពណ៌នាអំពីការរញ្ជួយនេះថា ខ្លាំងខុសពីធម្មតា។ លោក សាដម៉ាន់ សាគីប (Sadman Sakib) ដែលបាននិយាយជាមួយទីភ្នាក់ងារសារព័ត៌មាន Reuters បានរៀបរាប់​ថា «ខ្ញុំមិនដែលមានអារម្មណ៍ថាមានការរញ្ជួយបែបនេះក្នុងរយៈពេល៣០ឆ្នាំនៃជីវិតរបស់ខ្ញុំទេ»។ អ្នកស្រុកម្នាក់ទៀតដែលជាសិស្សឈ្មោះ អាប់ឌុលឡាហ៍ (Abdullah) បានលើកឡើង​ថា «អគារទាំងមូលកំពុងរង្គើ» នៅពេលដែលការរញ្ជួយដីកើតឡើង។

ការរញ្ជួយដី​នេះ​ក៏​បាន​​ប៉ះពាល់​ទៅ​ដល់​​តំបន់មួយចំនួននៃភាគខាងកើតប្រទេសឥណ្ឌាផងដែរ ប៉ុន្តែ​មិនមានការខូចខាតធំដុំណាមួយត្រូវបានរាយការណ៍ទេ៕

ប្រែសម្រួល៖ ឈាង