កីឡា

អបអរសាទរ! ក្រុម Esports កម្ពុជា ទាំងបុរស និងនារី ទទួលបានមេដាយ ប្រាក់ពិភពលោក

បានផុស

៥ ខែ មុន

នៅ

ថ្ងៃចន្ទ ៨ ធ្នូ ២០២៥

ដោយ

ក្រុមកីឡាករ កីឡាការិនីអេឡិចត្រូនិកជម្រើសជាតិកម្ពុជា ទទួលបានមេដាយប្រាក់ដូចគ្នា សម្រាប់ការប្រកួតកីឡា Esports ជើងឯកពិភពលោក ឆ្នាំ ២០២៥ (IESF World Esports Championship) នៅប្រទេសម៉ាឡេស៊ី ដែលនេះជាកំណត់ត្រាថ្មីសម្រាប់វិស័យកីឡាអេឡិចត្រូនិកកម្ពុជាលើឆាកអន្តរជាតិ។

ក្រុមនារីកម្ពុជាធ្វើបានយ៉ាងល្អដោយទទួលបានចំណាត់ថ្នាក់លេខ ១ ក្នុងពូល C បន្ទាប់ពីបានឈ្នះលើក្រុមនារី ម៉ុងហ្គោលី និងកូឡុំប៊ី។ នៅវគ្គ៨ក្រុមចុងក្រោយ ក្រុមនារីកម្ពុជា បានចាញ់ ក្រុមនារីឥណ្ឌូណេស៊ី ដោយលទ្ធផល ០-២ នៅវគ្គ Upper Bracket ប៉ុន្តែនៅវគ្គ Lower Bracket ក្រុមនារីកម្ពុជាបានយកឈ្នះក្រុមនារីតួកគី ដោយលទ្ធផល ២-១ ដើម្បីឡើងទៅវគ្គពាក់កណ្តាលផ្តាច់ព្រ័ត្រ Lower Bracket ដែលវគ្គនេះ ក្រុមនារីកម្ពុជា បានទម្លាក់ក្រុមម្ចាស់ផ្ទះ ម៉ាឡេស៊ី ដោយលទ្ធផល ២-០ ឡើងទៅ វគ្គ៣ក្រុមចុងក្រោយ។

នៅវគ្គ ៣ ក្រុមចុងក្រោយ ក្រុមនារីកម្ពុជា បានយកឈ្នះក្រុមនារី អេហ្ស៊ីប ដោយលទ្ធផល ២-០ ដើម្បីឡើងទៅកាន់វគ្គផ្តាច់ព្រ័ត្រជួប ឥណ្ឌូណេស៊ី ជាថ្មី។ ក្រុមនារីកម្ពុជា បានចាញ់ ឥណ្ឌូណេស៊ី នៅវគ្គផ្តាច់ព្រ័ត្រ ដោយលទ្ធផល ០-៣ ដើម្បីទទួលបានមេដាយប្រាក់ អមដោយប្រាក់រង្វាន់ ១០៥០០ដុល្លារអាមេរិក ខណៈម្ចាស់មេដាយមាស ឥណ្ឌូណេស៊ី ទទួលបានប្រាក់រង្វាន់ ១៧៥០០ដុល្លារ ហើយ អេហ្ស៊ីប ទទួលបានមេដាយសំរិទ្ធ អមដោយប្រាក់រង្វាន់ ៧០០០ដុល្លារ។

ចំណែកក្រុមបុរសកម្ពុជាធ្វើបានល្អបំផុតជាលើកដំបូងនៅក្នុងប្រវត្តិសាស្ត្ររបស់ខ្លួនដោយឈានដល់វគ្គផ្តាច់ព្រ័ត្រ និងទទួលបានជើងឯករង។ នៅវគ្គសន្សំពិន្ទុក្នុងពូល ក្រុមបុរសកម្ពុជា បានឈ្នះក្រុមនេប៉ាល់ បេឡារុស្ស៊ី និងដូមីនិក ដើម្បីទទួលបានចំណាត់ថ្នាក់លេខ ១ ក្នុងពូល ហើយឡើងទៅកាន់វគ្គ ៨ ក្រុមចុងក្រោយ។

នៅវគ្គ ៨ ក្រុមចុងក្រោយ ក្រុមបុរសកម្ពុជាបានយកឈ្នះលើក្រុម កាហ្សាស្ថាន ដោយលទ្ធផល ២-០ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ ដែលវគ្គនេះ ក្រុមបុរសកម្ពុជាបានយកឈ្នះ តួកគី ដោយលទ្ធផល ២-០ ទៀតដើម្បីឡើងវគ្គផ្តាច់ព្រ័ត្រ។ នៅវគ្គផ្តាច់ព្រ័ត្រ ក្រុមបុរសកម្ពុជា បានចាញ់ក្រុមម្ចាស់ផ្ទះ ម៉ាឡេស៊ី ដោយលទ្ធផល ០-៣ ដើម្បីទទួលបានចំណាត់ថ្នាក់លេខ២។

ក្នុងនាមជាម្ចាស់មេដាយប្រាក់ ក្រុមបុរសកម្ពុជា ទទួលបានប្រាក់រង្វាន់ ១៩៥០០ដុល្លារអាមេរិក ខណៈម៉ាឡេស៊ីជាម្ចាស់ជើងឯកទទួលបាន ៣២៥០០ដុល្លារ ហើយតួកគី ទទួលបានមេដាយសំរិទ្ធអមដោយប្រាក់រង្វាន់ ១៣០០០ដុល្លារអាមេរិក៕

អត្ថបទ៖ វីរបុត្រ

Related Topics:កីឡាអេឡិចត្រូនិក