បវរកញ្ញា ឡាវ អះអាងថា ត្បូងមរកតមានដើមកំណើតពី កម្ពុជា ខណៈថៃឡាំប៉ាថា ផ្ទុយប្រវត្តិសាស្ត្រ

សង្គ្រាមនៅក្នុងការប្រកួតសម្រស់បានផ្ទុះឡើងជាថ្មី ខណៈដែល miss Cosmo ឡាវ ឆ្នាំ២០២៥ បវរកញ្ញា Christina Lasasimma បានធ្វើការផ្សាយផ្ទាល់ដោយអះអាងថា ត្បូងមរកតមានដើមកំណើតចេញពីទឹកដីកម្ពុជា ហើយត្រូវបញ្ជូនទៅឡាវ ក្រោយមកស្រាប់តែស្ថិតនៅប្រទេសទី៣ ដោយពុំដឹងមូលហេតុពិតប្រាកដ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទំព័រហ្វេសប៊ុក ASEAN Beauty Pageant នាថ្ងៃពុធ ទី១០ ខែធ្នូ ឆ្នាំ២០២៥ បានចុះផ្សាយអំពីរឿងដ៏ក្តៅគគុកមួយនៅពីក្រោយឆាកនៃការប្រកួត Miss Cosmo 2025 ក្នុងពេលដែលបវរកញ្ញាឡាវ Christina បានផ្សាយផ្ទាល់ការសន្ទនាជាមួយអ្នកគាំទ្រកម្ពុជារបស់នាង ដោយធ្វើការកត់សម្គាល់ទាក់ទងនឹងនិមិត្តសញ្ញាប្រវត្តិសាស្ត្រ និងវប្បធម៌ដ៏រសើប ពោលគឺនាងរ៉ាយរាប់ទាក់ទងនឹងត្បូងមរកតដែលជាវត្ថុដ៏មានតម្លៃមហាសាលបំផុត។

តាមរយៈការផ្សាយបន្តផ្ទាល់នោះ Miss Cosmo Laos 2025 បានអះអាងថា «ត្បូងមរកតមានដើមកំណើតនៅកម្ពុជា បន្ទាប់មកបានទៅឡាវ ហើយឥឡូវនេះត្រូវបានគេបញ្ចូនទៅប្រទេសមួយផ្សេងទៀត (ប្រហែលជាប្រទេសថៃ)។ ដោយសារតែឡាវមានវប្បធម៌ស្រដៀងគ្នាខ្លាំងណាស់ទៅនឹងខ្មែរ កាលណោះព្រះនាងខ្មែរ បានអភិសេកជាមួយព្រះមហាក្សត្រឡាវ ដូច្នេះទើបធ្វើឲ្យប្រទេសទាំងពីរនេះមានបេតិកភណ្ឌវប្បធម៌ដូចគ្នាបែបនេះ»។

ទោះជាយ៉ាងណាក៏ដោយ សេចក្តីអះអាងរបស់នាងបានបង្កឲ្យមានការមិនពេញចិត្តយ៉ាងទូលំទូលាយ ក្នុងចំណោមអ្នកគាំទ្រ និងអ្នកប្រើប្រាស់អ៊ីនធឺណិតក្នុងប្រទេសថៃ ដោយពួកគេស្រែកឡាំប៉ាថា នេះផ្ទុយនឹងកំណត់ត្រាប្រវត្តិសាស្ត្រថៃ និងធ្វើឲ្យខូចអត្តសញ្ញាណជាតិ។

ជាងនេះទៀតដែរ បន្ទាប់ពីការរិះគន់ នាយកជាតិ (ND) នៃម្ចាស់កម្មវិធី Miss Cosmo ដែលជាជនជាតិថៃផ្ទាល់ បានចាត់វិធានការដើម្បីកាត់បន្ថយជម្លោះ ដោយថា នាងបាននិយាយដោយផ្ទាល់ជាមួយ ND ឡាវរួចហើយ។ ជាក់ស្ដែង សូម្បីតែអ្នករៀបចំកម្មវិធីប្រកួតបវរកញ្ញាឡាវ ក៏មានការភ្ញាក់ផ្អើលយ៉ាងខ្លាំងចំពោះសេចក្តីថ្លែងការណ៍របស់រាជិនីសម្រស់ពួកគេដែរ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

តារាថៃ Violette ត្រូវជនជាតិឯងព្រួតរិះគន់ថា ច្រៀងមិនកើត ក្នុងពិធីបើកព្រឹត្តិការណ៍ស៊ីហ្គេម