យូនីសេហ្វ កំពុងសហការជាមួយដៃគូ ដើម្បីគាំទ្រផ្លូវចិត្តដល់កុមារនៅជំរុំភៀសសឹក

អង្គការយូនីសេហ្វប្រចាំកម្ពុជា (UNICEF) កំពុងសហការជាមួយនឹងដៃគូនានា ដើម្បីគាំទ្រផ្លូវចិត្តដល់កុមាររាប់ម៉ឺននាក់ដែលកំពុងរស់នៅតាមជំរុំភៀសសឹកជាមួយឪពុកម្តាយ អាណាព្យាបាល ដែលបានគេចចេញពីសង្គ្រាមឈ្លានពានរបស់យោធាថៃមកលើដែនអធិបតេយ្យភាពកម្ពុជា។ អង្គការអន្តរជាតិដែលធ្វើកិច្ចការដើម្បីកុមារគ្រប់រូប បានលើកឡើងថា កុមារដែលបានឆ្លងកាត់ បានឃើញជម្លោះ និងអំពើហិង្សា អាចប្រឈមនឹងផលប៉ះពាល់ផ្នែកផ្លូវចិត្តធ្ងន់ធ្ងរ ដែលអាចអូសបន្លាយរយៈពេលវែង។ កុមារដែលបានភៀសសឹក ជាច្រើនក៏ប្រឈមនឹងហានិភ័យនៃអំពើហិង្សា ការរំលោភបំពាន និងការកេងប្រវ័ញ្ច។

យោងតាមអនុសញ្ញាស្តីពីសិទ្ធិកុមារ កុមារត្រូវតែទទួលបានសិទ្ធិរស់នៅក្នុងបរិយាកាសសុវត្ថិភាព និងការការពារពេញលេញពីអំពើហិង្សា។ ជាមួយនឹងស្ថានភាពចំពោះមុខ យូនីសេហ្វ កំពុងសហការយ៉ាងជិតស្និទ្ធជាមួយនឹងដៃគូ ដើម្បីផ្តល់ការគាំទ្រផ្នែកផ្លូវចិត្តដល់កុមារដើម្បីជួយការពារពួកគេ ជាពិសេសក្នុងអំឡុងពេលដ៏លំបាកនេះ។ក្នុងស្ថានភាពនេះ អង្គការ អំពាវនាវដល់សប្បុរសជនជាតិ និងអន្តរជាតិ ចូលរួមគាំទ្រមូលនិធិជំនួយបន្ទាន់របស់យូនីសេហ្វ ដើម្បីឱ្យខ្លួនអាចផ្តល់នូវការគាំទ្រចាំបាច់ និងទាន់ពេលវេលា ទៅកាន់កុមារដែលរងផលប៉ះពាល់គ្រប់រូប។

កុមារី ណាង ចាន់ណា រៀនថ្នាក់ទី ៧ នៅវិទ្យាល័យតេជោសែនសំរោង ខេត្តឧត្តរមានជ័យ រៀបរាប់ទាំងទឹកភ្នែកចេញពីជំរុំភៀសសឹក​ ថា កន្លែងដែលខ្លួនរស់នៅគេងមិនគ្រប់គ្រាន់ និងខ្វះចំណីអាហារ ជាពិសេសបាត់បង់ឱកាសសិក្សា។ ចាន់ណា និយាយថា៖«នៅនេះខ្ញុំអត់សូវមានអីញាំទេ ហើយដេកពិបាក នៅជាមួយប៉ាម៉ាកខ្ញុំកក់ក្តៅ ដោយសារគាត់ឱ្យខ្ញុំទៅរៀន ហើយនៅទីនេះអត់បានរៀន ខ្ញុំចង់ទៅរៀនវិញ»។

ក្នុងសង្គ្រាមថៃឈ្លានពានដែនអធិបតេយ្យភាពកម្ពុជាគិតចាប់ពីថ្ងៃទី ៧ ខែធ្នូ ឆ្នាំ ២០២៥ មក បណ្តាលឱ្យមានជនភៀសសឹកកើនដល់ ១១៧ ១២០ គ្រួសារ ស្មើនឹងមនុស្ស ៣៩៤ ៧០៦ នាក់។ ក្នុងនោះជនស៊ីវិលកម្ពុជាស្លាប់កើនដល់ ១២នាក់ និងរបួសធ្ងន់ស្រាល ៧៤ នាក់។ នេះបើយោងតាមរបាយការណ៍ក្រសួងមហាផ្ទៃ គិតត្រឹមរសៀលថ្ងៃទី​១៤ ខែធ្នូ ឆ្នាំ ២០២៥៕