សេដ្ឋកិច្ច

ភ្ញៀវទេសចរនៅខេត្តសៀមរាបធ្លាក់ចុះ ដោយសារសង្គ្រាមថៃឈ្លានពានកម្ពុជា

បានផុស

៧ ខែ មុន

នៅ

ថ្ងៃអង្គារ ១៦ ធ្នូ ២០២៥

ដោយ

លោក ខៀវ ធី ប្រធានសមាគមមគ្គុទ្ទេសក៍អង្គរខេត្តសៀមរាប បានឱ្យដឹងថា ការអូសបន្លាយនៃសង្គ្រាមថៃឈ្លានពានមកលើកម្ពុជា បានធ្វើឱ្យភ្ញៀវទេសចរចូលមកទស្សនាខេត្តសៀមរាបធ្លាក់ចុះ ដែលតំបន់អង្គរធ្លាប់តែអូរអរ ប៉ុន្តែពេលនេះប្រែមកជាស្ងប់ស្ងាត់ខុសពីរាល់ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខៀវ ធី ប្រាប់កម្ពុជាថ្មី នៅថ្ងៃទី ១៦ ខែធ្នូ ឆ្នាំ ២០២៥ថា ចំពោះបញ្ហាបុណ្យឆ្លងឆ្នាំសាកល ២០២៥-២០២៦ គឺប្រហែលជាពុំមានភ្ញៀវទេសចរមកលេងកម្សាន្តច្រើននោះទេ។ ប៉ុន្តែយើងក៏នៅរង់ចាំមើលកិច្ចប្រជុំរដ្ឋមន្ត្រីការបរទេសអាស៊ានដែលនឹងត្រូវធ្វើឡើងនៅថ្ងៃទី ២២ ខែឆ្នូ ខាងមុខនេះ ប្រសិនបើលទ្ធផលនៃកិច្ចប្រជុំអាចទទួលបានផលវិជ្ជមាន នោះឆ្លងឆ្នាំខាងមុខអាចនឹងមានភ្ញៀវទេសចរចូលមកលេងកម្សាន្តច្រើនកុះករវិញ។

លោក ខៀវ ធី យល់ឃើញថា៖ «ប្រសិនបើកិច្ចប្រជុំនៅថ្ងៃទី២២ ទទួលបានលទ្ធផលអវិជ្ជមានថៃនៅតែបន្តរឹងទទឹងមិនព្រមទទួលយកបទឈប់បាញ់ជាមួយកម្ពុជាទេនោះ នោះសម្រាប់បុណ្យឆ្លងឆ្នាំខាងមុខនឹងមិនមានការរៀបចំកម្មវិធីធំឱ្យមានភាពគគ្រឹកគគ្រេងនោះទេ»។

លោក ខៀវ ធី បន្ថែមថា បច្ចុប្បន្នភ្ញៀវទេសចរដែលចូលមកលេងខេត្តសៀមរាប គឺចាប់ផ្តើមមានការធ្លាក់ចុះជាបណ្តើរៗហើយ ក្នុងនោះការកក់ថ្មីៗ ក៏លែងមាន ហើយការកក់ចាស់ៗ ក៏ចាប់ផ្តើមលុបជាបណ្តើរៗ ចាប់តាំងពីសង្គ្រាមផ្ទុះឡើងសារជាថ្មី ដែលយោធាថៃបានបើកការវាយប្រហារមកលើកម្ពុជា កាលពីថ្ងៃទី០៧ ខែធ្នូ កន្លងមក។

យោងតាមគ្រឹះស្ថានអង្គរ ភ្ញៀវទេសចរអន្តរជាតិចំនួនជាង ៨៦ ម៉ឺននាក់ (៨៦៧ ១៩៥) បានទិញសំបុត្រចូលទស្សនារមណីយដ្ឋានអង្គរ ដែលនាំឱ្យកម្ពុជារកចំណូលបាន ៤០ ៤៨០៩៤៥ ដុល្លារ នៅក្នុងរយៈពេល ១១ ខែ ឆ្នាំ ២០២៥ ធ្លាក់ចុះ ៣,៤១% ប្រៀបធៀបនឹង រយៈពេលដូចគ្នានៅឆ្នាំ ២០២៤៕