វិសាខា នាំចូលខ្សែប្រយុទ្ធកម្ពស់ខ្ពស់ ជាអតីតកីឡាករលេងនៅលីគកំពូល ស៊ែប៉ី

ក្លិបបាល់ទាត់ វិសាខា បានប្រកាសនាំចូលខ្សែប្រយុទ្ធថ្មីម្នាក់ នាព្រឹកថ្ងៃ ពុធ ទី ១៧ ខែ ធ្នូ ឆ្នាំ ២០២៥ គឺកីឡាករសញ្ជាតិ ស៊ែប៉ី Pavle Ivelja ដែលធ្លាប់មានប្រវត្តិលេងនៅលីគកំពូល ស៊ែប៉ី ផ្ទាល់តែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសនេះ បានធ្វើឡើងរំលង ១ ថ្ងៃ បន្ទាប់ពីពួកគេប្រកាសចែកផ្លូវគ្នាជាមួយខ្សែប្រយុទ្ធសញ្ជាតិ កេនយ៉ា Benson Ochieng កាលពីថ្ងៃទី ១៦ ខែ ធ្នូ ។ ដូច្នេះការមកដល់របស់កីឡាករ Pavle Ivelja នឹងក្លាយជាអ្នកជំនួសតំណែងរបស់ Benson Ochieng ដែលទើបចាកចេញ។

កីឡាករ Pavle Ivelja បច្ចុប្បន្នមានវ័យ ២៧ ឆ្នាំ លេងតួនាទីជាខ្សែប្រយុទ្ធប្រអប់ជួរ​មុខ។ ខ្សែប្រយុទ្ធកម្ពស់ ១.៩៣ ម៉ែត្ររូបនេះ មានបទពិសោធច្រើនលេងនៅលីគកំពូល ស៊ែប៉ី ដែលស្ថិតក្នុងប្រទេសរបស់ខ្លួន ដូចជានៅក្លិប Javor-Matis, Radnicki Nis និង Radnicki 1923។ ចុងក្រោយ រូបគេបានទៅចូលរួមជាមួយក្លិប Cheonan City នៃលីគទី ២ កូរ៉េខាងត្បូង បានកន្លះរដូវកាល មុនពេលផ្លាស់មកចូលរួមជាមួយ វិសាខា ។

ក្រឡេកទៅមើលស្ថិតិផ្ទាល់ខ្លួនវិញ Pavle Ivelja បង្ហាញខ្លួននៅលើទីលានគ្រប់ក្លិបទាំងអស់ចំនួន ១២៣ ប្រកួត ក្នុងនោះរូបគេរកបានគ្រាប់បាល់បានចំនួន ៣៣ គ្រាប់ និង ៦ បញ្ជូន (assist)៕

អត្ថបទ៖ សេម កុសល