ភេសជ្ជៈ ៥ មុខ កាត់បន្ថយអាស៊ីតអ៊ុយរិក និងសន្លាក់ហ្គោដ ក្នុងរដូវត្រជាក់

ទឹកក្រូចឆ្មាក្តៅឧណ្ហៗ ទឹកដូង និងតែខ្ញីជួយបំពេញជាតិទឹកដល់រាងកាយ បន្សាបទឹកនោម និងបង្កើនការបញ្ចេញអាស៊ីតអ៊ុយរិក ដើម្បីចៀសវាងការប្រមូលផ្តុំដែលបណ្តាលឲ្យមានការផ្ទុះឡើងនៃជំងឺសន្លាក់ហ្គោដនៅរដូវត្រជាក់។

ជំងឺរលាកសន្លាក់ហ្គោដគឺជាជំងឺមេតាបូលីសរ៉ាំរ៉ៃ ដែលត្រូវបានកំណត់លក្ខណៈដោយការកើនឡើងនៃអាស៊ីតអ៊ុយរិកនៅក្នុងឈាម ដែលបណ្តាលឲ្យមានការប្រមូលផ្តុំគ្រីស្តាល់អ៊ុយរ៉េតនៅក្នុងសន្លាក់ និងជាលិកាជុំវិញ។ ជំងឺនេះបណ្តាលឲ្យមានជំងឺរលាកសន្លាក់ស្រួចស្រាវធ្ងន់ធ្ងរ វិវត្តទៅជាជំងឺរលាកសន្លាក់រ៉ាំរ៉ៃ ការខូចទ្រង់ទ្រាយសន្លាក់ ការបង្កើតគ្រាប់។

ជំងឺរលាកសន្លាក់ហ្គោដច្រើនតែកើតឡើងវិញនៅរដូវរងា ដោយសារតែផលប៉ះពាល់នៃអាកាសធាតុត្រជាក់។ សីតុណ្ហភាពទាបបង្កើនហានិភ័យនៃការគ្រីស្តាល់អ៊ុយរ៉េតនៅសន្លាក់ ជាពិសេសនៅទីតាំងឆ្ងាយៗដូចជាម្រាមដៃ និងម្រាមជើង ដែលបណ្តាលឲ្យរលាក និងការចាប់ផ្តើមនៃការឈឺចាប់ស្រួចស្រាវ។ ទម្លាប់នៃការញ៉ាំអាហារសម្បូរសារធាតុ purine ច្រើននៅរដូវរងាដូចជាសាច់ក្រហម និងអាហារសមុទ្រក៏រួមចំណែកដល់ហានិភ័យកើនឡើងនៃការផ្ទុះឡើងនៃជំងឺសន្លាក់ហ្គោដផងដែរ។

ទឹកក្រូចឆ្មារក្តៅឧណ្ហៗ

ទឹកក្រូចឆ្មារមានសមត្ថភាពជួយទ្រទ្រង់តុល្យភាព កាត់បន្ថយកម្រិតអាស៊ីតអ៊ុយរិក ដោយសារមាតិកាវីតាមីន C របស់វា។ នៅពេលព្រឹក ឬក្រោយពេលញ៉ាំអាហារ អ្នកជំងឺអាចច្របាច់ក្រូចឆ្មារពាក់កណ្តាលចូលទៅក្នុងកែវទឹកក្តៅឧណ្ហៗមួយកែវ បន្ថែមខ្ញីបន្តិច ឬស្លឹកជីអង្កាមពីរបីសន្លឹកដើម្បីជួយរំលាយអាហារ។ អ្នកដែលមានជំងឺក្រពះគួរតែផឹកវាបន្ទាប់ពីញ៉ាំអាហារ ដើម្បីកំណត់ការរលាក។

ទោះបីជាវាមានអត្ថប្រយោជន៍ជាច្រើនក៏ដោយ ទឹកក្រូចឆ្មារមិនមែនជាការព្យាបាលសម្រាប់ជំងឺរលាកសន្លាក់ហ្គោដទេ។ ការផឹកទឹកក្រូចឆ្មារច្រើនពេក ធ្វើឲ្យស្រទាប់ធ្មេញខូចដោយសារតែ pH ទាប ក្រូចឆ្មារមានជាតិអាស៊ីត ដែលនាំឲ្យមានការចង្អោរ និងក្រហាយទ្រូង។

តែខ្ញី

ខ្ញីមានប្រសិទ្ធភាពប្រឆាំងនឹងការរលាក និងបំបាត់ការឈឺចាប់តាមបែបធម្មជាតិ បំបាត់ការឈឺចាប់ និងរឹង។ អ្នកកិន ឬហាន់ខ្ញីស្រស់ពីរបីចំណិត ដាំឲ្យពុះជាមួយទឹកមួយកែវ ផឹកក្តៅឧណ្ហៗ។ បន្ថែមទឹកឃ្មុំសម្រាប់ផឹកងាយស្រួលនៅពេលព្រឹក។ វាមិនគួរប្រើពេលពោះទទេទេ ជាពិសេសចំពោះអ្នកដែលមានជំងឺក្រពះ ក្តៅក្នុងខ្លួន និងច្រាលក្រពះ។

តែបៃតងក្តៅ

តែបៃតងមានផ្ទុកសារធាតុ catechins ជាច្រើន ជាពិសេស EGCG – ជាសារធាតុប្រឆាំងអុកស៊ីតកម្មដែលមានលក្ខណៈសម្បត្តិប្រឆាំងនឹងការរលាក កាត់បន្ថយការហើម និងឈឺចាប់ក្នុងសន្លាក់អំឡុងពេលមានជំងឺរលាកសន្លាក់ហ្គោដ។ តែបៃតងក៏មានប្រសិទ្ធភាពបញ្ចុះទឹកនោមស្រាលផងដែរ ដោយបង្កើនការបញ្ចេញទឹកនោម និងជួយជំរុញការបញ្ចេញអាស៊ីតអ៊ុយរិកចេញពីរាងកាយ។

អ្នកដែលមានជំងឺសន្លាក់ហ្គោដគួរតែផឹកតែបៃតងអតិបរមា ១-២ ពែងក្នុងមួយថ្ងៃ ចៀសវាងការញ៉ាំវាឲ្យខាប់ពេក ដើម្បីកុំឲ្យរលាកក្រពះ ឬបង្កើនចង្វាក់បេះដូង។ វាត្រូវបានណែនាំឲ្យញ៉ាំតែជាមួយទឹកក្តៅប្រហែល ៧០-៨០ អង្សាសេ ដើម្បីរក្សាមាតិកា catechin ដែលមានប្រយោជន៍។ តែបៃតងមិនគួរផឹកពេលពោះទទេ ឬភ្លាមៗបន្ទាប់ពីអាហារដែលមានប្រូតេអ៊ីនខ្ពស់ទេ ព្រោះវាអាចប៉ះពាល់ដល់ការស្រូបយកសារធាតុចិញ្ចឹម។

ទឹកដូង

ទឹកដូងសម្បូរទៅដោយអេឡិចត្រូលីត ដែលប៉ូតាស្យូមដើរតួនាទីយ៉ាងសំខាន់ក្នុងការជួយរក្សាតុល្យភាពសារធាតុរាវ ដោយជួយជំរុញសកម្មភាពច្រោះរបស់តម្រងនោម។ ក្នុងរដូវត្រជាក់ អ្នកដែលមានជំងឺសន្លាក់ហ្គោដ គួរតែផឹកទឹកដូងនៅសីតុណ្ហភាពបន្ទប់ជំនួសឲ្យទឹកត្រជាក់ ដើម្បីចៀសវាងការមិនស្រួលក្រពះពោះវៀន។

អ្នកដែលមានជំងឺសន្លាក់ហ្គោដផឹកទឹកដូងស្រស់ប្រហែលមួយកែវក្នុងមួយថ្ងៃ ដោយផ្តល់អាទិភាពដល់ទឹកដូងសុទ្ធ ដោយមិនបន្ថែមជាតិស្ករ។ វាគួរតែត្រូវបានប្រើឆ្លាស់គ្នាជាមួយទឹកចម្រោះ ដើម្បីធានាតុល្យភាពអេឡិចត្រូលីត ដែលជួយដំណើឲ្យរការបញ្ចេញអាស៊ីតអ៊ុយរិកមានប្រសិទ្ធភាព។

ទឹកក្តៅឧណ្ហៗដែលបានច្រោះ

ការផឹកទឹកក្តៅឧណ្ហៗដែលបានច្រោះជួយកាត់បន្ថយកម្រិតអាស៊ីតអ៊ុយរិកចំពោះអ្នកជំងឺដែលមានជំងឺរលាកសន្លាក់ហ្គោដ។ នៅរដូវត្រជាក់ ទឹកក្តៅឧណ្ហៗគួរតែត្រូវបានផ្តល់អាទិភាពជំនួសឲ្យទឹកត្រជាក់ ដែលរក្សាសីតុណ្ហភាពរាងកាយ ជំរុញចរន្តឈាម និងធ្វើឲ្យប្រសើរឡើងនូវការរំលាយអាហារ។

អ្នកដែលមានជំងឺសន្លាក់ហ្គោដគួរតែផឹកទឹក ១.៥-២ លីត្រក្នុងមួយថ្ងៃ ដោយបែងចែកស្មើៗគ្នាច្រើនដងក្នុងមួយថ្ងៃជំនួសឲ្យការផឹកក្នុងពេលតែមួយ។ ចាប់ផ្តើមពេលព្រឹកជាមួយទឹកក្តៅឧណ្ហៗមួយកែវ ដើម្បីជំរុញប្រព័ន្ធរំលាយអាហារ បង្កើនការបញ្ចុះទឹកនោមធម្មជាតិ។ ការផឹកទឹកឲ្យបានទៀងទាត់ពេញមួយថ្ងៃ រួមផ្សំជាមួយនឹងរបបអាហារដែលមានជាតិ purine ទាបជួយឲ្យរាងកាយរក្សាកំហាប់អាស៊ីតអ៊ុយរិកឲ្យមានស្ថេរភាព កាត់បន្ថយហានិភ័យនៃការកើតឡើងវិញនៃជំងឺសន្លាក់ហ្គោដ។៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

រាងកាយអ្នកនឹងមានអាការបែបណា ពេលទទួលទានស្លឹកខ្ទឹមជាប្រចាំ?