កីឡា

ជំនួបមិនគួររំលង! បឹងកេត ប៉ះ ព្រះខ័នរាជស្វាយរៀង នៅកណ្តាលក្រុងភ្នំពេញ

បានផុស

៧ ខែ មុន

នៅ

ថ្ងៃព្រហស្បតិ៍ ២៥ ធ្នូ ២០២៥

ដោយ

បន្ទាប់ពីរង់ចាំអស់កន្លះរដូវកាល ដល់ពេលដែលក្លិប បឹងកេត បើកទ្វារពហុកីឡដ្ឋានជាតិអូឡាំពិកទទួលក្រុមខ្លាំង ព្រះខ័នរាជស្វាយរៀង បន្ទាប់ពីពួកគេបានត្រៀមខ្លួនគួរឲ្យកត់សំគាល់សម្រាប់ជើងទី២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វេលាម៉ោង ៦ ល្ងាច ថ្ងៃសៅរ៍ ទី២៧ ខែធ្នូ ឆ្នាំ ២០២៥ ជាជំនួបសប្តាហ៍ ទី១៣ នៃលីគបាល់ទាត់កំពូលកម្ពុជា នៅពហុកីឡដ្ឋានជាតិអូឡាំពិក កណ្តាលរាជធានីភ្នំពេញ ជាកន្លែងដែលអ្នកគាំទ្រប្រមូលផ្តុំដើម្បីទទួលយកភាពរីករាយ រំជើបរំជួល និងធ្វើជាសក្ខីកម្មសម្រាប់ក្រុមទាំងពីរថាតើក្រុមណាទទួលបាន ៣ ពិន្ទុ បន្ទាប់ពីជើងទី១ បឹងកេត បាត់បង់ ៣ ពិន្ទុ នៅពហុកីឡដ្ឋានជាតិមរតកតេជោ។

ព្រះខ័នរាជស្វាយរៀង ធ្វើបានយ៉ាងល្អដោយបន្តឈរលើកំពូលតារាងតាំងពីដើមរដូវកាល តាមរយៈការឈ្នះ ១១ ប្រកួត និងចាញ់ ១ ប្រកួត រកបាន ៣៣ ពិន្ទុ។ ចំណែក បឹងកេត មិនពេញចិត្តនឹងលទ្ធផល ១២ ប្រកួតកន្លងមក ដោយសារពួកគេទទួលបានជ័យជម្នះ ៥ ប្រកួត ស្មើ ៤ ប្រកួត និងចាញ់ ៣ ប្រកួត រកបាន ១៩ ពិន្ទុ កំពុងឈរចំណាត់ថ្នាក់លេខ ៤ ។

បឹងកេត ត្រៀមខ្លួនគួរឲ្យកត់សំគាល់សម្រាប់ជើងទី២ ដោយបានបញ្ចេញខ្សែប្រយុទ្ធ Louis Willy ទៅឲ្យគិរីវង់សុខសែនជ័យ ខ្ចីជើង ប៉ុន្តែបាននាំចូលសមាជិកបរទេសថ្មី ២ រូបគឺខ្សែប្រយុទ្ធអូស្ត្រាលី Cyrus Dehmie និងខ្សែប្រយុទ្ធនូវែលសេឡង់ Myer Bevan។ ខ្សែប្រយុទ្ធទាំងពីររូបនេះបានបង្ហាញខ្លួនមួយប្រកួតហើយទល់នឹង ភ្នំពេញក្រោន កាលពីសប្តាហ៍មុន ដោយទទួលបានការចាប់អារម្មណ៍ខ្លាំងពីអ្នកគាំទ្រ បើទោះបីជាពួកគេបានចាញ់ ០-១ ក៏ដោយ។ បន្ថែមលើនេះ ពួកគេបានខ្ចីជើងកីឡាករ សេត រ៉ស៊ីប ពីព្រះខ័នរាជស្វាយរៀង ដែលធ្វើឲ្យពួកគេរឹតតែរឹងមាំ។

កីឡាករ Cyrus Dehmie (ឆ្វេង) កីឡាករ Park Yi-young (កណ្តាល) និងកីឡាករ Faris Hammouti (ស្តាំ)

ងាកទៅ ក្រុមការពារជើងឯកឆ្នាំចាស់ ព្រះខ័នរាជស្វាយរៀង មិនមានការផ្លាស់ប្តូរអ្វីធំដុំគួរឲ្យចាប់អារម្មណ៍ខ្លាំងទេ។ ពួកគេបានចែកផ្លូវគ្នាជាមួយខ្សែប្រយុទ្ធសញ្ជាតិឡាវ Bounphachan Bounkong ប៉ុន្តែដាក់បញ្ចូលខ្សែការពារសញ្ជាតិ ម៉ារ៉ុក Faris Hammouti ដើម្បីពង្រឹងតំបន់ការពារ។ ក្បាច់នេះមានផលចំណេញច្រើន ដោយសារកីឡាករម៉ារ៉ុកមានកម្ពស់ខ្ពស់ជួយច្រើននៅតំបន់ការពារ និងការលេងបាល់លើ។

កីឡាករដែលគួរឲ្យចាប់អារម្មណ៍សម្រាប់ ព្រះខ័នរាជស្វាយរៀង គឺខ្សែប្រយុទ្ធសញ្ជាតិហ្គាណា Kwame Peprah ដែលកំពុងជា Top Scorer ខណៈកីឡាករគួរឲ្យចាប់អារម្មណ៍របស់ បឹងកេត គឺខ្សែប្រយុទ្ធថ្មី Cyrus Dehmie។

កីឡាករព្រះខ័នរាជស្វាយរៀង អបអរពេលស៊ុតចូល បឹងកេត

តាមការត្រៀមខ្លួនបានល្អរបស់ បឹងកេត ជាមួយកីឡាករជាសះស្បើយពីរបួសដែលមើលទៅពេញជើងល្អ។ ស្របពេល ព្រះខ័នរាជស្វាយរៀង មានទម្រង់លេងរឹងមាំស្រាប់តាំងពីដើមរដូវកាលមកគឺច្បាស់ណាស់ថា ជំនួបនេះគឺពិតជាជក់ចិត្តដិតអារម្មណ៍ខ្លាំង ដូច្នេះជាពេលវេលាដែលអ្នកគាំទ្រមិនគួររំលងឡើយសម្រាប់ការប្រកួតនៅកណ្តាលទីក្រុងភ្នំពេញ៕