នយោបាយ

កងទ័ពចិននឹងជួយគាំទ្រដល់ការធានាបទឈប់បាញ់កម្ពុជា-ថៃ

បានផុស

៤ ខែ មុន

នៅ

ថ្ងៃចន្ទ ២៩ ធ្នូ ២០២៥

ដោយ

កងទ័ពចិននឹងរក្សាទំនាក់ទំនងជាមួយកងទ័ពកម្ពុជា និងថៃ ដើម្បីផ្ដល់ការគាំទ្រសម្រាប់ការធានាដល់បទឈប់បាញ់កម្ពុជា-ថៃ នៅពេលចាំបាច់ និងតាមការស្នើសុំពីប្រទេសកម្ពុជា-ថៃ។ ការធានានេះធ្វើឡើងក្នុងកិច្ចប្រជុំត្រីភាគី ចិន កម្ពុជា ថៃ នៅខេត្តយូណាន សាធារណរដ្ឋប្រជាមានិតចិនថ្ងៃទី២៨ និង២៩ ខែធ្នូ ឆ្នាំ២០២៥។

ក្នុងសេចក្ដីប្រកាសព័ត៌មានអំពីលទ្ធផលនៃកិច្ចប្រជុំត្រីភាគីថ្ងៃទី២៩ ខែធ្នូ ឱ្យដឹងថា អាទិភាពចាំបាច់បន្ទាន់បំផុតនៅពេលនេះគឺបង្រួបបង្រួមបទឈប់បាញ់ ហើយចិនបានត្រៀមខ្លួនរួចជាស្រេចដើម្បីផ្ដល់ជំនួយចាំបាច់ទាំងអស់ដល់កម្ពុជា និងថៃ ក្នុងការជំរុញការបោសសម្អាតមីន រួមទាំងការរក្សាទំនាក់ទំនងយោធាជាមួយប្រទេសកម្ពុជានិងថៃផងដែរ។

ក្នុងសេចក្ដីប្រកាសនោះបានសរសេរថា៖ «កងទ័ពចិននឹងរក្សាការទំនាក់ទំនងជាមួយកងទ័ពកម្ពុជា និងថៃ ដើម្បីផ្ដល់ការគាំទ្រសម្រាប់ការបង្រួបបង្រួមបទឈប់បាញ់ នៅពេលចាំបាច់ និងតាមការស្នើសុំពីទាំងកម្ពុជា និងថៃ»។

គួរឱ្យដឹងផងដែរថាលទ្ធផលនៃកិច្ចប្រជុំនេះកើតចេញពីការជួបគ្នារវាងរដ្ឋមន្ត្រីការបរទេសកម្ពុជាឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសថៃ ស៊ីហាសាក់ ភួងកេតកែវ និងរដ្ឋមន្ត្រីការបរទេសចិនលោក វ៉ាង យី។ ក្រៅពីការធានានូវបទឈប់បាញ់ រដ្ឋមន្ត្រីការបរទេសទាំង៣ប្រទេសបានសម្រេចនូវលទ្ធផលមួយចំនួនទៀតដោយរួមមាន ការធ្វើឱ្យពលរដ្ឋអាចត្រលប់ទៅកាន់ជីវភាពធម្មតាឡើងវិញ ការកសាងទំនុកចិត្តទំនាក់ទំនងទ្វេភាគីរវាងប្រទេសកម្ពុជា-ថៃឡើងវិញ .ការធ្វើប្រក្រតីទូតឡើងវិញ និងប្ដេជ្ញាចិត្តក្នុងការការពារស្ថិរភាពនៅក្នុងតំបន់។

តាមស្មារីតនៃកិច្ចប្រជុំនេះប្រទេសចិន នឹងបន្តដើរតួនាទីស្ថាបនាក្នុងការជួយសម្រួលដល់ការកសាងទំនុកចិត្តឡើងវិញ និងការសម្រេចបាននូវសន្តិភាពយូរអង្វែងរវាងកម្ពុជា និងថៃ តាមរបៀបអាស៊ី ក្នុងគោលបំណងកសាងសហគមន៍ដែលមានវាសនារួមជាមួយប្រទេសជិតខាង៕