កីឡា

កីឡាការិនី ហ្គូវ សុគន្ធធីតា និយាយពីគុណប្រយោជន៍លេងកីឡាវាយកូនឃ្លីលើតុជិត ៥ឆ្នាំមកនេះ

បានផុស

៤ ខែ មុន

នៅ

ថ្ងៃអង្គារ ៣០ ធ្នូ ២០២៥

ដោយ

កីឡាការិនីវាយកូនឃ្លីលើតុ ហ្គូវ សុគន្ធធីតា ចូលហ្វឹកហាត់កីឡាមួយនេះជាជិត ៥ឆ្នាំមកហើយ និងទទួលបានគុណប្រយោជន៍ច្រើនលើសុខភាពរស់នៅប្រចាំថ្ងៃ មានឱកាសបានប្រកួតប្រជែងមេដាយទាំងថ្នាក់ជាតិ និងលើឆាកអន្តរជាតិផងដែរ។

កីឡាការិនីថ្នាល ហ្គូវ សុគន្ធធីតា

កីឡាការិនី ហ្គូវ សុគន្ធធីតា ការចូលហ្វឹកហាត់កីឡាវាយកូនឃ្លីលើតុ ឬហៅសាមញ្ញាថាប៉េងប៉ុងនេះបានប្រហែលជិត៥ឆ្នាំមកហើយ។ លេងកីឡាមួយនេះហាក់ពិបាកបន្តិច ប៉ុន្តែសប្បាយចំពោះខ្លួនទាំងការហ្វឹកហាត់ និងការប្រកួត។

កីឡាវាយកូនឃ្លីលើតុនេះបានធ្វើឲ្យអ្នកហាត់មានភាពឆ្លាតវៃដោយត្រូវការប្រើប្រាស់ការគិតច្រើនផង និងកម្លាំងកាយសម្បទាផង។ ការហ្វឹកាហាត់ពីមួយថ្ងៃទៅមួយថ្ងៃបានធ្វើឲ្យខ្លួនមានសុខភាពល្អ កាយសម្បទារហ័សរហួន និងមានកម្លាំងផងដែរ។

ហ្គូវ សុគន្ធធីតា ពេលបំពាក់មេដាយប្រាក់

កីឡាការិនីខាងលើនេះបន្ថែមទៀតថា ក្ដីស្រមៃក្នុងអាជីពកីឡាវាយកូនឃ្លីលើតុនៅពេលខាងមុខចង់ចូលរួមការប្រកួតលើឆាកអន្តរជាតិឲ្យបានច្រើន និងចង់ឈ្នះមេដាយជូនជាតិមាតុភូមិដើម្បីបង្ហាញមុខមាត់របស់សហព័ន្ធផង និងបង្ហាញពីសក្ដានុពលកីឡារបស់កម្ពុជាផង។

សកម្មភាពប្រកួតជើងឯកថ្នាក់ជាតិ

បញ្ជាក់ដែរថា កីឡាការិនី ហ្គូវ សុគន្ធធីតា បានហ្វឹកហាត់កីឡាវាយកូនឃ្លីលើតុប្រហែលជិត ៥ឆ្នាំហើយ និងកំពុងជាជម្រើសជាតិផ្នែកនារីរបស់សហព័ន្ធផងដែរ។ ចំពោះការប្រកួតជ្រើសរើសជើងឯកថ្នាក់ជាតិប្រចាំឆ្នាំ២០២៥ នេះគឺរូបគេឈ្នះមេដាយប្រាក់ ១គ្រឿងលេងលើ ១វិញ្ញាសាដែលរៀបចំឡើងដោយសហព័ន្ធ និងទើបបិទបញ្ចប់កាលពីថ្ងៃទី២៩ ខែធ្នូ នេះ៕

អត្ថបទដោយ៖ នួន ស៊ីណា

Related Topics:កីឡាវាយកូនឃ្លីលើតុ