ព័ត៌មានជាតិ

ពលរដ្ឋកម្ពុជា រំភើបរីករាយជាទីបំផុតចំពោះការដោះលែងវីរកងទ័ពកម្ពុជាទាំង ១៨ រូប មកកាន់មាតុប្រទេសវិញ

បានផុស

៦ ខែ មុន

នៅ

ថ្ងៃពុធ ៣១ ធ្នូ ២០២៥

ដោយ

ប្រជាពលរដ្ឋកម្ពុជា បានសម្ដែងនូវក្តីរីករាយឥតឧបមាចំពោះការដោះលែងវីរកងទ័ពកម្ពុជាទាំង ១៨ រូប ត្រឡប់មកកាន់មាតុប្រទេសវិញ នៅថ្ងៃនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សេង ជី ចៅសង្កាត់វាលវង់ នៃរដ្ឋបាលខណ្ឌ ៧ មករា និង ក្នុងនាមជាប្រជាពលរដ្ឋ ១ រូប មានក្តីរំភើបចិត្តរកអ្វីថ្លែងពុំបានឡើយចំពោះដំណឹងដ៏សែនរីករាយបំផុតនេះ ព្រោះការដោះលែងនេះ ជាអ្វីដែលពលរដ្ឋទូទាំងប្រទេសកម្ពុជារង់ចាំអស់រយៈពេល ១៥៥ ថ្ងៃកន្លងមកហើយ ដោយក្នុងចិត្តម្នាក់ៗ ចង់ឃើញ ចង់ដឹងមករហូតពីសុខទុក្ខ និងសុខសុវត្ថិភាពរបស់វីរកងទ័ពកម្ពុជាទាំង ១៨ រូប។

លោក សេង ជី បន្តទៀតថា វីរភាពរបស់កងទ័ពកម្ពុជាទាំង ១៨ រូប ក៏ដូចជាកងទ័ពកម្ពុជាទាំងអស់ ទាំងកងទ័ពពលីក្នុងសមរភូមិ កងទ័ពរងរបួស និងកងទ័ពកំពុងឈរជើងយ៉ាងរឹងមាំដើម្បីការពារទឹកដី គឺជាវីរបុរសដ៏អង់អាចហានក្លាបំផុតរបស់ប្រទេសជាតិ ហើយការលះបង់ដ៏ធំធេងនេះ នឹងស្ថិតក្នុងការចងចាំរបស់ពលរដ្ឋខ្មែរគ្រប់ៗ គ្នា ដែលមិនអាចលុបចេញពីដួងចិត្តបានឡើយ។

លោកបញ្ជាក់ថា ក្នុងប្រទេសកម្ពុជា ក្រោមការដឹកនាំដោយ សម្ដេចតេជោ ហ៊ុន សែន និង សម្ដេចមហាបវរធិបតី ហ៊ុន ម៉ាណែត ប្រជាជនមានការជឿជាក់យ៉ាងមុតមាំលើ សម្ដេចទាំងទ្វេ ប្រទេសជាតិមានការអភិវឌ្ឍ មានសន្តិភាព។

គួររំលឹកថា វីរកងទ័ពទាំង ១៨ រូប ត្រូវបានកងកម្លាំងយោធាថៃចាប់ខ្លួនកាលពីព្រឹកថ្ងៃទី ២៩ ខែកក្កដា ឆ្នាំ ២០២៥ ក្រោយបទឈប់បាញ់លើកទី ១ រវាងកម្ពុជា-ថៃ បានចូលជាធរមាន។ ក្នុងនោះ ដោយគិតមកត្រឹមថ្ងៃទី ៣១ ខែធ្នូ ឆ្នាំ ២០២៥ នេះ គឺមានរយៈពេល ១៥៥ ថ្ងៃ ហើយ គិតត្រឹមថ្ងៃដោះលែងឲ្យត្រឡប់មកកម្ពុជាវិញ៕

អត្ថបទ ៖ សុភា