ទ័ពព្រៃកូឡុំប៊ី ចេញមុខប្រកាស ប្រយុទ្ធតតាំងជាមួយអាមេរិក ក្រោយការចាប់ខ្លួនលោក ម៉ាឌូរ៉ូ

ទ័ពព្រៃកូឡុំប៊ី ដែលជាបក្សពួកប្រធានាធិបតីវ៉េណេស៊ុយអេឡា នីកូឡាស ម៉ាឌូរ៉ូ បានចេញមុខប្រកាសថា ពួកគេនឹងងើបតតាំងជាមួយអាមេរិក ក្រោយការចាប់ខ្លួនលោក ម៉ាឌូរ៉ូ។

តាមការផ្សាយរបស់ Arab News កាលពីថ្ងៃអាទិត្យទី៤ខែមករាឆ្នាំ២០២៦ ទ័ពព្រៃ National Liberation Army (ELN) បានអំពាវនាវដល់អ្នកស្នេហាជាតិទាំងអស់ ឲ្យរួបរួមគ្នាប្រឈមមុខនឹងផែន​ការ «អាណានិគមនិយម» ប្រឆាំងនឹងវ៉េណេស៊ុយអេឡា និងប្រជាជននៃតំបន់ខាងត្បូងពិភពលោក។

តាមរយៈការបង្ហោះសារនៅលើបណ្ដាញសង្គម X, ក្រុម ELN លើកឡើងថា៖ «ពួកគេត្រៀមខ្លួនរួចជាស្រេចក្នុងការស្រក់ដំណក់ឈាមចុងក្រោយ ដើម្បីប្រយុទ្ធប្រឆាំងនឹងអាណាចក្រអាមេរិក»។

សូមជម្រាបថា ELN គឺជាកក្រុមឆ្វេងនិយមដ៏មានឥទ្ធិពលបំផុតមួយ ដែលកំពុងធ្វើសកម្មភាពយ៉ាងសកម្មនៅក្នុងប្រទេសកូឡុំប៊ី និងតំបន់ព្រំដែនវ៉េណេស៊ុយអេឡា។

ដោយបង្កើតឡើងនៅឆ្នាំ១៩៦៤ ដោយក្រុមនិស្សិតនិងអ្នកប្រាជ្ញដែលទទួលបានឥទ្ធិពលពីបដិវត្តន៍គុយបា ក្រុមនេះគឺប្រកាន់លទ្ធិម៉ាក្ស-លេនីននិយម ប្រឆាំងនឹងមូលធននិយម និងឥទ្ធិពលរបស់អាមេរិក។

ELN មានមូលដ្ឋានរឹងមាំនៅតាមបណ្តោយព្រំដែន កូឡុំប៊ី-វ៉េណេស៊ុយអេឡា ដែលជាតំបន់សម្បូរទៅដោយធនធានធម្មជាតិ និងផ្លូវដឹកជញ្ជូន។ ក្រុមនេះត្រូវគេដឹងថា រកបានចំណូលពីការជំរិតទារប្រាក់ ការរុករករ៉ែខុសច្បាប់ និងការគ្រប់គ្រងផ្លូវជួញដូរគ្រឿងញៀន។

តាមការប៉ាន់ស្មាន ក្រុមនេះមានកម្លាំងប្រដាប់អាវុធចន្លោះពី ២ ៥០០ ដល់ ៥ ០០០ នាក់៕

អត្ថបទ៖ សុខ សុវណ្ណ