អាមេរិក ផ្តល់រង្វាន់ ២៥លានដុល្លារ សម្រាប់ព័ត៌មាន​ឈានដល់ការចាប់ខ្លួនដៃស្តាំលោក ម៉ាឌូរ៉ូ

បន្ទាប់ពីការចាប់ខ្លួនមេដឹកនាំវ៉េណេស៊ុយអេឡា នីកូឡាស់ ម៉ាឌូរ៉ូ កាលពីដើមខែមករា ដោយចោទប្រកាន់ជាមេគ្រឿងញៀន ឥឡូវសហរដ្ឋអាមេរិក បានប្រកាសផ្តល់ប្រាក់រង្វាន់រហូតដល់២៥លានដុល្លារ សម្រាប់ព័ត៌មានឈានដល់ការចាប់ខ្លួនដៃស្តាំរបស់លោក ម៉ាឌូរ៉ូ គឺបុរសម្នាក់មានឈ្មោះ Diosdado Cabello Rondón ដែលបច្ចុប្បន្នកាន់តំណែងជារដ្ឋមន្ត្រីក្រសួងមហាផ្ទៃ យុត្តិធម៌និងសន្តិភាព។

តាមការផ្សាយរបស់ Daily Mail កាលពីថ្ងៃអាទិត្យទី១១ខែមករាឆ្នាំ២០២៦ ក្រសួងការបរទេសអាមេរិកបានចេញ Poster តាមចាប់ខ្លួនលោក Rondón ក្រោមការចោទប្រកាន់ស្រដៀងនឹងលោកម៉ាឌូរ៉ូដែរ។

រដ្ឋាភិបាលទីក្រុងវ៉ាស៊ីនតោន ចោទថា បុរសវ័យ៦២ឆ្នាំម្នាក់នេះគឺជាមេគ្រឿងញៀននិងជាមន្ត្រីកំពូលពុកលួយ ដែលឃុបឃិតគ្នាជាមួយមន្ត្រីជាន់ខ្ពស់វ៉េណេស៊ុយអេឡាផ្សេងទៀត។

ក្នុង Poster តាមចាប់ខ្លួននោះ អាមេរិកអះអាងថា Rondón បានរួមគំនិតក្បត់ក្នុងអំពើភេរវកម្មគ្រឿងញៀន, រួមគំនិតក្បត់ក្នុងការនាំចូលកូកាអ៊ីន និងរួមគំនិតក្បត់ក្នុងការប្រើប្រាស់និងកាន់កាប់កាំភ្លើងយន្ត ព្រមទាំងឧបករណ៍បំផ្លិចបំផ្លាញ ដើម្បីបម្រើដល់បទល្មើសគ្រឿងញៀន។

មិនត្រឹមប៉ុណ្ណឹង អាមេរិកក៏ចោទដែរថា Rondón គឺជាអ្នកគ្រប់គ្រងកងកម្លាំងសន្តិសុខ ដែលបានប្រព្រឹត្តការរំលោភសិទ្ធិមនុស្សយ៉ាងធំធេង រួមមានទាំងការសម្លាប់ប្រជាពលរដ្ឋស៊ីវិល ការរំលោភបំពានផ្លូវភេទលើកុមារីនិងស្ត្រី ព្រមទាំងការដាក់ព័ស្តុតាងនិងអាវុធបង្កាច់បង្ខូចមនុស្សស្លូតត្រង់ផងដែរ។

សូមជម្រាបថា កាលពីឆ្នាំ២០២០ អាមេរិកក៏ផ្តល់រង្វាន់ផងដែរសម្រាប់ការចាប់ខ្លួន Rondón ប៉ុន្តែកាលនោះ ប្រាក់រង្វាន់នៅត្រឹម១០លានដុល្លារប៉ុណ្ណោះ។

យ៉ាងណា កាលពីចុងសប្តាហ៍ អាមេរិកបានដំឡើងប្រាក់រង្វាន់ដល់ទៅ២៥លានដុល្លារ ក្រោយលោកត្រាំ បើកប្រតិបត្តិការនៅទីក្រុងការ៉ាកាស ចាប់ខ្លួនលោកម៉ាឌូរ៉ូនិងភរិយា៕

អត្ថបទ៖ សុខ សុវណ្ណ