រថភ្លើងបុកគ្នានៅអេស្ប៉ាញ ស្លាប់មនុស្ស២១នាក់ និងជាង១០០នាក់ រងរបួស

ប្រទេសអេស្ប៉ាញបានកើតសោកនាដកម្មមួយ ដោយរថភ្លើងល្បឿនលឿន២គ្រឿងបើកបុកគ្នាបណ្តាលឲ្យមនុស្សចំនួន២១នាក់ស្លាប់ និងជាង១០០នាក់ទៀតរងរបួស ក្នុងនោះមាន៧៣នាក់របួសធ្ងន់។

តាមការផ្សាយរបស់ BBC, ហេតុការណ៍ដ៏រន្ធត់នេះកើតឡើងនៅម៉ោង ៦:៥០នាទីល្ងាចថ្ងៃអាទិត្យទី១៨ខែមករាឆ្នាំ២០២៦ ក្បែរតំបន់ Adamuz នៃទីក្រុង Cordoba ភាគខាងត្បូងប្រទេសអេស្ប៉ាញ។

ក្រុមហ៊ុនគ្រប់គ្រងផ្លូវដែក Adif បានឲ្យដឹងថា រថភ្លើងមួយគ្រឿងជារបស់ក្រុមហ៊ុន Iryo បានធ្វើដំណើរចេញពីទីក្រុង Málaga ឆ្ពោះទៅ Madrid បានបើកធ្លាក់ផ្លូវ រួចក៏ចូលទៅគន្លងរបស់រថភ្លើងមួយទៀត ​ជារបស់ក្រុមហ៊ុន Renfe ដែលបើកមកក្នុងទិសដៅបញ្ច្រាស់គ្នា បណ្តាលឲ្យបុកគ្នាពេញទំហឹងតែម្តង។

ក្រុមហ៊ុន Iryo បញ្ជាក់ថា ពេលកើតហេតុ មានមនុស្សប្រមាណ៣០០នាក់ ជិះក្នុងរថភ្លើងរបស់ខ្លួន។

ជុំវិញសោកនាដកម្មនេះ នាយករដ្ឋមន្ត្រីអេស្ប៉ាញ Pedro Sánchez និយាយថា រដ្ឋាភិបាលកំពុងសហការជាមួយក្រុមសង្គ្រោះបន្ទាន់ ដើម្បីជួយដល់ជនរងគ្រោះ។

ទន្ទឹមនោះ អាជ្ញាធរអេស្ប៉ាញ ក៏កំពុងបើកការស៊ើបអង្កេតផងដែរ ដើម្បីរកមូលហេតុពិតនៃសោកនាដកម្មនេះ ខណៈមានក្តីបារម្ភថា តួលេខមនុស្សស្លាប់ប្រហែលកើនឡើង ព្រោះនៅមានអ្នករបួសធ្ងន់ច្រើន៕

អត្ថបទ៖ សុខ សុវណ្ណ