ត្រាំ ធ្វើឲ្យអង់គ្លេសក្តៅស្លឹកត្រចៀក ដែលនិយាយ​ថា​ ទាហានណាតូ មិនហ៊ានទៅជួរមុខ ក្នុងសង្គ្រាម​អាហ្វហ្គានីស្ថាន

ជាថ្មីម្តងទៀត ប្រធានាធិបតីអាមេរិក ដូណាល់ ត្រាំ បានបង្កភាពចម្រូងចម្រាស ដោយលើកនេះលោកធ្វើឲ្យចក្រភពអង់គ្លេស ក្តៅស្លឹកត្រចៀកតាមរយៈការស្តីបន្ទោសថា ទ័ពណាតូ មិនហ៊ានទៅខ្សែត្រៀមជួរមុខក្នុងសង្គ្រាមនៅអាហ្វហ្គានីស្ថាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍ជាមួយ Fox News កាលពីថ្ងៃព្រហស្បតិ៍ទី២២ខែមករាឆ្នាំ២០២៦ លោកត្រាំ បានរិះគន់អង្គការណាតូ ដោយលើកឡើងថា លោកមិនច្បាស់ទេថាសម្ព័ន្ធភាពនេះនឹងជួយអាមេរិក ប្រសិនបើអាមេរិកត្រូវការ។ កងទ័ពណាតូ បានបញ្ជូនទៅអាហ្វហ្គានីស្ថាន ប៉ុន្តែពួកគេនៅឆ្ងាយបន្តិចពីខ្សែត្រៀមជួរមុខ។

ដ្បិតនិយាយពីណាតូ ប៉ុន្តែសម្តីលោកត្រាំ បង្កឲ្យមានការខឹងសម្បាយ៉ាងខ្លាំង ពីសំណាក់ទីក្រុងឡុងដ៍ ​ព្រោះអង់គ្លេសជាប្រទេសមានទាហានពលីច្រើនជាងគេលំដាប់ទី ២ ក្នុងសង្គ្រាមនេះ។

លោកស្រី Emily Thornberry មកពីគណបក្សពលករ ចាត់ទុកសម្តីលោកត្រាំថាជា «ការប្រមាថយ៉ាងធ្ងន់ធ្ងរ» ដល់គ្រួសារទាហានអង់គ្លេសទាំង ៤៥៧នាក់ ដែលពលីជីវិត។

ចំណែកលោក Sir Ed Davey មេដឹកនាំគណបក្សសេរីប្រជាធិបតេយ្យ បានវាយបកទៅវិញ លោក ត្រាំ ខ្លួនឯងហ្នឹង ធ្លាប់បានគេចវេសពីការបម្រើយោធាដល់ទៅ ៥ ដងក្នុងសង្គ្រាមវៀតណាម។

រីឯលោក Ben Obese-Jecty សមាជិកសភាអភិរក្សនិយម និងជាអតីតទាហាន បានលើកឡើងថា លោកឃើញផ្ទាល់ភ្នែកនូវការលះបង់និងការរងគ្រោះថ្នាក់បំផុតនៅសមរភូមិ Sangin ហើយវាជារឿងសោកស្តាយដែល ប្រធានាធិបតីអាមេរិកបែរជាមើលងាយការលះបង់នេះទៅវិញ។

សូមជម្រាបថា អាមេរិកបានបើកប្រតិបត្តិការក្នុងខែតុលាឆ្នាំ២០០១ ដើម្បីផ្ដួលរំលំរបបតាលីបង់ ដោយចោទថា បានផ្ដល់ជម្រកឲ្យ អូសាម៉ា ប៊ិនឡាដិន និងបុគ្គលសំខាន់ៗដទៃទៀតនៃក្រុមអាល់កៃដា ដែលជាប់ពាក់ព័ន្ធនឹងអំពើភេរវកម្មថ្ងៃទី១១ ខែកញ្ញា។

គិតត្រឹមឆ្នាំ២០២១ នៅពេលសហរដ្ឋអាមេរិកបានដកទ័ពចេញពីអាហ្វហ្គានីស្ថាន ទាហានចម្រុះជាង ៣ ៥០០ នាក់បានបាត់បង់ជីវិត ដែលក្នុងនោះប្រហែលពីរភាគបីគឺជាទាហានអាមេរិក។

ចក្រភពអង់គ្លេស គឺជាប្រទេសដែលរងគ្រោះថ្នាក់ដោយមានចំនួនទាហានស្លាប់ច្រើនជាងគេលំដាប់ទីពីរនៅក្នុងជម្លោះនេះ បន្ទាប់ពីសហរដ្ឋអាមេរិក ដែលមានចំនួនអ្នកស្លាប់ ២ ៤៦១ នាក់៕

អត្ថបទ៖ សុខ សុវណ្ណ