អត្រាក្រុមហ៊ុនថៃគ្មានលទ្ធភាពសងបំណុល កើនដល់កម្រិតខ្ពស់បំផុតក្នុងរយៈពេល ២៥ ឆ្នាំ

ក្រុមហ៊ុនស្ទង់មតិថៃ TRIS Rating ​បាន​ឱ្យដឹងក្នុងរបាយការណ៍មួយ​ថា អត្រាក្រុមហ៊ុនថៃ ដែលគ្មានលទ្ធភាពសងបំណុលទាន់ពេល និងពន្យារពេលសងបំណុល បាន​កើនឡើងដល់ប្រមាណ ៥,៨% ក្នុងឆ្នាំ ២០២៥ ដែលជាកម្រិតខ្ពស់បំផុតរាប់តាំងពីឆ្នាំ ២០០០​។ នេះបើតាមការចុះផ្សាយរបស់កាសែត The Nation កាលពីថ្ងៃចន្ទ។

ភាពផុយស្រួយនៃឥណទានសាជីវកម្មនៅក្នុងប្រទេសថៃ ត្រូវបានគេមើលឃើញកាន់តែច្បាស់នៅឆ្នាំ ២០២៥ ដោយក្នុងវិស័យមួយចំនួន បញ្ហា​គ្មានលទ្ធភាព ឬពន្យារពេល​សងបំណុល​ កើនឡើងយ៉ាប់យឺនជាងឆ្នាំ ១៩៩៧ ទៅទៀត។

វិស័យ​សំខាន់ៗ​ ដូចជាសេវាកម្មប្រើប្រាស់​ ការអភិវឌ្ឍអចលនទ្រព្យ និងសំណង់ និងវិស្វកម្ម ចំនួនករណី​គ្មានលទ្ធភាពសងបំណុលទាន់ពេល​ និងការពន្យារពេលសងបំណុល គឺខ្ពស់ជាងក្នុងអំឡុងពេលវិបត្តិហិរញ្ញវត្ថុអាស៊ីឆ្នាំ ១៩៩៧ ទៅទៀត​។ នេះបង្ហាញថា ​ហានិភ័យប្រមូលផ្តុំខ្លាំង​ក្នុងអាជីវកម្មដែលប្រើប្រាស់ដើមទុនច្រើន ដែលពឹងផ្អែកជាចម្បងលើតម្រូវការក្នុងស្រុក ចំពេល​ដែល​សេដ្ឋកិច្ចថៃស្ទុះងើបឡើងវិញយឺតយ៉ាវ ​ហើយ​បន្ទុកលើប្រាក់ចម្ចីខ្ពស់ជាប់លាប់។

ក្នុងរបាយការណ៍ដដែល​ TRIS Rating បាននិយាយថា ការ​គ្មានលទ្ធភាពសងបំណុលទាន់ពេល​ និងការពន្យារពេលសងបំណុលក្នុងចំណោមក្រុមហ៊ុនថៃ បានកើនឡើងយ៉ាងខ្លាំង​ក្នុងឆ្នាំ ២០២៥។ ក្រុមហ៊ុនចេញមូលបត្របំណុលចំនួន ៦ បានខកខានសងបំណុល ​ហើយក្រុមហ៊ុន ៦ ផ្សេងទៀត បាន​ចេញការ​ទូទាត់យឺតយ៉ាវ ដែលធ្វើឱ្យចំនួនសរុបកើនឡើងដល់ ១២ ក្នុងឆ្នាំ ២០២៥ ធៀបនឹង ៨ ​ក្នុងឆ្នាំ ២០២៤។

អត្រានៃគ្មានលទ្ធភាពសងបំណុលមិនទាន់ពេល​ បានកើនឡើងដល់ ២,៩% ​នៅឆ្នាំ ២០២៥ ពីត្រឹម ០,៩% នៅឆ្នាំ ២០២៤ ​ ខណៈ​ពេលបូកបញ្ជូនគ្នា ការខកបំណុល និងការពន្យារពេលសងបំណុល បានកើនឡើងដល់ ៥,៨% ពី ២,៩% នៅឆ្នាំ ២០២៤។ TRIS បាននិយាយថា នេះគឺជាកម្រិតខ្ពស់បំផុតចាប់តាំងពីឆ្នាំ ២០០០ ដែលបង្ហាញពីសម្ពាធកាន់តែខ្លាំងឡើងលើអ្នកខ្ចីប្រាក់។

TRIS ក៏បានកត់សម្គាល់ផងដែរថា ការខកបំណុលថ្មីៗនេះ មិនមាន​តែចំពោះក្រុមហ៊ុនដែលមានចំណាត់ថ្នាក់វិនិយោគទាបៗនោះទេ។ លក្ខខណ្ឌឥណទានតឹងតែង កំពុងរីករាលដាល​ពីអ្នកខ្ចីប្រាក់ដែល​​ប្រឈម​ហានិភ័យខ្ពស់​ជា​ប្រពៃណី ទៅដល់​ក្រុមហ៊ុនដែល​គេធ្លាប់ចាត់ទុកថាមានស្ថានភាពហិរញ្ញវត្ថុរឹងមាំ​ ហើយនេះ​ជាសញ្ញានៃកំណើន​ហានិភ័យ​ចំពោះស្ថិរភាពឥណទានសាជីវកម្ម​របស់ប្រទេសថៃទាំងមូល៕