មួយឆ្នាំៗ ជនជាតិឥណ្ឌា ជាង ៥០ ០០០នាក់ត្រូវពស់ចឹកស្លាប់

ពិតជាតួលេខដ៏គួរឲ្យភ្ញាក់ផ្អើល ដែលមួយឆ្នាំៗ មានជនជាតិឥណ្ឌាជាង៥០ ០០០នាក់ ត្រូវពស់ចឹកស្លាប់នៅក្នុងប្រទេសនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ BBC ដែលដកស្រង់ការសិក្សាមួយក្នុងឆ្នាំ២០២០, ការប៉ាន់ប្រមាណខ្លះបង្ហាញថា ចំនួនអ្នកស្លាប់អាចមានកម្រិតខ្ពស់ជាងនេះទៅទៀត ពោលគឺចន្លោះឆ្នាំ ២០០០ ដល់ ២០១៩ ប្រទេសឥណ្ឌាអាចមានអ្នកស្លាប់រហូតដល់ ១.២ លាននាក់ ឬជាមធ្យម ៥៨ ០០០ នាក់ឯណោះក្នុងមួយឆ្នាំ។

សេចក្តីរាយការណ៍ខាងលើបានឲ្យដឹងថា កន្លែងជួបគ្រោះថ្នាក់ពស់ចឹកខ្លាំងបំផុតគឺនៅភាគកណ្តាល ដែលជាតំបន់ក្រីក្រ។

ទន្ទឹមនោះដែរ របាយការណ៍ថ្មីមួយពីអង្គការពិនិត្យគ្រោះថ្នាក់ដោយសារពស់ចឹក ហៅកាត់ GST បានបង្ហាញថា ៩៩% នៃបុគ្គលិកសុខាភិបាលនៅក្នុងប្រទេសឥណ្ឌា កំពុងប្រឈមមុខនឹងឧបសគ្គធំៗ ក្នុងការផ្ដល់ថ្នាំបន្សាបពិស។

ងាកទៅមើលឆ្នាំ២០១៧ អង្គការសុខភាពពិភពលោក (WHO) បានបញ្ចូលគ្រោះថ្នាក់ពស់ចឹកទៅក្នុងបញ្ជី «ជំងឺតំបន់ក្ដៅដែលត្រូវបានគេមើលរំលង និងជាអាទិភាពខ្ពស់បំផុត» ដោយសារតែចំនួនមនុស្សស្លាប់ដ៏ច្រើនលើសលប់បង្កឡើងដោយសារវា។

យោងតាម WHO, ជាមធ្យមមានមនុស្សប្រមាណ ៥.៤ លាននាក់នៅទូទាំងពិភពលោក ត្រូវបានពស់ចឹកជារៀងរាល់ឆ្នាំ ហើយក្នុងនោះមានមនុស្សជាង ១០០,០០០ នាក់បានបាត់បង់ជីវិត។

នេះមានន័យថា គ្រាន់តែមនុស្សស្លាប់ដោយសារពស់ចឹកនៅប្រទេសឥណ្ឌាក្នុងមួយឆ្នាំៗ គឺស្មើនឹងជាងពាក់កណ្តាលទៅឲ្យបើធៀបនឹងមនុស្សស្លាប់ដោយសារពស់ចឹង ទូទាំងពិភពលោក៕

អត្ថបទ៖ សុខ សុវណ្ណ