ព័ត៌មានអន្ដរជាតិ

ចិនប្រហារជីវិតលើកទី២លើមេខ្លោងនៃក្រុមឆបោកអនឡាញពីមីយ៉ាន់ម៉ា

បានផុស

៣ ខែ មុន

នៅ

ថ្ងៃចន្ទ ២ កុម្ភៈ ២០២៦

ដោយ

តុលាការចិនឱ្យដឹងកាលពីថ្ងៃចន្ទថា ប្រទេសចិនបានប្រហារជីវិតមេខ្លោងឧក្រិដ្ឋកម្មឆ្លងដែន ចំនួន៤នាក់បន្ថែមទៀត នៃក្រុមអ្នកឆបោកដែលមានមូលដ្ឋាននៅមីយ៉ាន់ម៉ា។ ការធ្វើបែបនេះ គឺជាលើកទីពីរក្នុងរយៈពេលមិនដល់មួយសប្តាហ៍ ខណៈដែលទីក្រុងប៉េកាំងបង្កើនការបង្ក្រាប លើការក្លែងបន្លំទូរគមនាគមន៍ឆ្លងព្រំដែន។

ទីភ្នាក់ងារព័ត៌មានបារាំង AFP បានឱ្យដឹងថា សមាសធាតុនៃការក្លែងបន្លំដែលអ្នកបោកប្រាស់ បានទាក់ទាញអ្នកប្រើប្រាស់អ៊ីនធឺណិតឱ្យចូលទៅក្នុងទំនាក់ទំនងស្នេហាក្លែងក្លាយ និងការវិនិយោគរូបិយប័ណ្ណគ្រីបតូ រីកដុះដាលនៅទូទាំងអាស៊ីអាគ្នេយ៍។

ដំបូងឡើយ ក្រុមឧក្រិដ្ឋជនដែលនៅពីក្រោយរឿងនេះ ផ្តោតសំខាន់ទៅលើអ្នកចេះនិយាយភាសាចិន បន្ទាប់មកពង្រីកប្រតិបត្តិការជាច្រើនភាសា ដើម្បីបោកលុយរាប់ពាន់លានដុល្លារពីជនរងគ្រោះ ជុំវិញពិភពលោក។

លើសពីនេះ ពួកគេបានប្រើប្រាស់ពលករបរទេសរាប់ពាន់នាក់ ខ្លះដោយស្ម័គ្រចិត្ត និងខ្លះត្រូវបានជួញដូរ ដើម្បីអនុវត្តការឆបោក។

ក្នុងរយៈពេលប៉ុន្មានឆ្នាំចុងក្រោយនេះ ទីក្រុងប៉េកាំងបានបង្កើនកិច្ចសហប្រតិបត្តិការជាមួយរដ្ឋាភិបាលក្នុងតំបន់ ជាពិសេសមនុស្សរាប់ពាន់នាក់ត្រូវបានគេធ្វើមាតុភូមិនិវត្តន៍ និងប្រឈមមុខនឹងការកាត់ក្តីក្នុងប្រព័ន្ធយុត្តិធម៌របស់ប្រទេសចិន។

ក្នុងសេចក្តីប្រកាសចុងក្រោយបំផុតបានធ្វើឡើងប៉ុន្មានថ្ងៃ បន្ទាប់ពីតុលាការនៅទីក្រុង Wenzhou ភាគខាងកើតប្រទេសចិន ប្រកាសថា ខ្លួនបានប្រហារជីវិតមនុស្ស ១១នាក់ ដែលពាក់ព័ន្ធនឹងប្រតិបត្តិការបោកប្រាស់តាមទូរគមនាគមន៍ជាមួយ «ក្រុមឧក្រិដ្ឋជនគ្រួសារ Ming» ។

តុលាការប្រជាជនក្រុង Shenzhen បាននិយាយនៅក្នុងសេចក្តីថ្លែងការណ៍មួយថា មនុស្សបួននាក់ចុងក្រោយដែលត្រូវបានប្រហារជីវិតត្រូវបានផ្សារភ្ជាប់ជាមួយនឹង «ក្រុមឧក្រិដ្ឋជនគ្រួសារ Bai»។

ចំណែកឧក្រិដ្ឋកម្មរបស់ពួកគេរួមមាន «ការក្លែងបន្លំ ការសម្លាប់មនុស្សដោយចេតនា របួសដោយចេតនា ការចាប់ជំរិត ការជំរិតទារប្រាក់ […] និងពេស្យាកម្មដោយបង្ខំ» ក្នុងចំណោមអ្នកផ្សេងទៀត។

យោងតាមតុលាការ ក្រុមនេះបានរត់ការក្លែងបន្លំក្នុងតំបន់ Kokang ភាគខាងជើងប្រទេសមីយ៉ាន់ម៉ា ដែលសកម្មភាពរបស់ពួកគេបាននាំឱ្យមានការសម្លាប់ពលរដ្ឋចិនចំនួន ៦ នាក់ និងរបួសដល់មនុស្សជាច្រើនផ្សេងទៀត។

គួរឱ្យដឹងថា អ្នកទាំងបួននោះត្រូវបានកាត់ទោសប្រហារជីវិត កាលពីខែវិច្ឆិកា ឆ្នាំ២០២៥ ៕

ប្រែសម្រួល៖ ណឺ មិនា