ថ្នាក់ដឹកនាំខេត្តកម្ពុជា៦រូប ទៅវៀតណាមចូលរួមអបអរបុណ្យចូលឆ្នាំថ្មី ព្រមទាំងរឹតចំណងមិត្តភាព

ថ្នាក់ដឹកនាំកម្ពុជាចំនួន៦រូប បានអញ្ជើញទៅខេត្តដុងនាយ ប្រទេសវៀតណាម ដើម្បីចូលរួមអបអរសារ និងជូនពរក្នុងឱកាសនៃពិធីបុណ្យចូលឆ្នាំថ្មីប្រពៃណីវៀតណាម ដែលកាន់តែខិតចូលមកដល់នាពេលខាងមុខនេះ។ ការអញ្ជើញចូលរួមនេះ ក៏ជាសកម្មភាពមួយដើម្បីរឹតចំណងមិត្តភាព និងកិច្ចសហប្រតិបត្តិការទ្វេភាគីឱ្យកាន់តែល្អប្រសើរ។

លោក នាង វណ្ណះ អ្នកនាំពាក្យរដ្ឋបាលខេត្តមណ្ឌលគីរី បានឲ្យដឹងថា កាលពីថ្ងៃទី២ខែកុម្ភៈឆ្នាំ២០២៦ អភិបាលខេត្តកម្ពុជាចំនួន៥រូប និងអភិបាលរងខេត្ត១រូប បានអញ្ជើញទៅប្រទេសវៀតណាម ដើម្បីអបអរសាទរនាឱកាសបុណ្យចូលឆ្នាំថ្មីប្រពៃណីវៀតណាម។ បើតាមអ្នកនាំពាក្យរូបនេះ ថ្នាក់ដឹកខេត្តកម្ពុជាទាំងនោះរួមមាន លោក ថង សាវុន អភិបាលខេត្តមណ្ឌលគិរី, លោក វ៉ា ថន អភិបាលខេត្តក្រចេះ, លោក នួន ផារ័ត្ន អភិបាលខេត្តកំពង់ធំ,លោក អ៊ុន ចាន់ដា អភិបាលខេត្តកំពង់ចាម, លោក ប៉ែន កុសល្យ អភិបាលខេត្តត្បូងឃ្មុំ និងលោក ម៉ែន គុជ អភិបាលរងខេត្តស្ទឹងត្រែង ព្រមទាំងមន្រ្តីកម្ពុជាអមដំណើរមួយចំនួនទៀត។

វត្តមានរបស់ថ្នាក់ដឹកនាំកម្ពុជា មានការទទួលស្វាគមន៍យ៉ាងកក់ក្តៅពីលោក វូ ហុងវ៉ាន់ សមាជិកគណៈកម្មាធិការមជ្ឈឹមបក្សលេខាគណៈកម្មាធិការបក្សខេត្ត និងជាប្រធានគណៈប្រតិភូរដ្ឋសភាខេត្តដុងណាយ នៃសាធារណរដ្ឋសង្គមនិយមវៀតណាម។

សូមជម្រាបថា ការចូលរួមរបស់ភាគីកម្ពុជានាពេលនេះមិនមែនជាលើកទីមួយនោះទេសម្រាប់គណៈប្រតិភូ ដោយផ្អែកតាមគោលការណ៍របស់រដ្ឋាភិបាលនៃប្រទេសទាំងពីរ ឱ្យមានតែពិធីបុណ្យជាតិធំៗ ភាគីទាំងពីរតែងតែផ្លាស់ប្តូរទស្សនកិច្ចចូលរួមអបអរសាទរ និងជូនពរក្នុងឱកាសបុណ្យចូលឆ្នាំថ្មី។ ជាក់ស្តែងកន្លងទៅ ខេត្តនៅជាប់ព្រំប្រទល់កម្ពុជា-វៀតណាម​ ថ្នាក់ដឹកនាំខេត្តនៃប្រទេសវៀតណាម តែងតែអញ្ជើញមកកម្ពុជាជួបថ្នាក់ដឹកនាំខេត្តមណ្ឌលគិរី និងខេត្តរតនគិរី
ដើម្បីជូនពរបុណ្យចូលឆ្នាំថ្មី ឬពិធីបុណ្យជាតិធំៗ៕

ដោយ៖ រៀម សុខហេង