សម្ដេចតេជោសរសើរសកម្មជននៅអាមេរិក ដែលរក្សាបានឆន្ទៈរួមរស់ជាមួយគណបក្សប្រជាជនកម្ពុជា

នៅព្រឹកថ្ងៃទី៤ ខែកុម្ភៈ ឆ្នាំ២០២៦ សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា អញ្ជើញជួបសំណេះសំណាលជាមួយពលរដ្ឋ ដែលជាថ្នាក់ដឹកនាំសាខាបក្ស និងយុវជនគណបក្សប្រជាជនកម្ពុជា មកពីបណ្តារដ្ឋនានានៅតំបន់ឆ្នេរខាងលិច សហរដ្ឋអាមេរិក។ សម្ដេចតេជោ បានសរសើរដល់សកម្មជននៅអាមេរិក ដែលរក្សាបានឆន្ទៈរួមរស់ជាមួយគណបក្សប្រជាជនកម្ពុជា ក៏ដូចជារាជរដ្ឋាភិបាលកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចតេជោ ហ៊ុន សែន បានសម្តែងនូវការសរសើរ និងវាយតម្លៃខ្ពស់ចំពោះស្មារតីសាមគ្គីភាព និងការខិតខំប្រឹងប្រែងរបស់ថ្នាក់ដឹកនាំសាខាបក្ស និងយុវជនគណបក្សប្រជាជនកម្ពុជា នៅតំបន់ឆ្នេរខាងលិច សហរដ្ឋអាមេរិក ទោះបីជាត្រូវរស់នៅឆ្ងាយពីមាតុភូមិ តែនៅតែរក្សាបាននូវមនសិការស្នេហាជាតិ និងចូលរួមយ៉ាងសកម្មជាមួយរាជរដ្ឋាភិបាលកម្ពុជាក្នុងការថែរក្សាសុខសន្តិភាព និងការអភិវឌ្ឍ។

សម្តេចតេជោ ក៏បានអរគុណដល់ថ្នាក់ដឹកនាំសាខាបក្ស យុវជនបក្ស ដែលបានជួយដល់ប្រជាពលរដ្ឋភៀសសឹក នៅតាមព្រំដែន តាមរយៈការយកជាអំណោយ ជារបស់របរប្រើប្រាស់ និងថវិកា ទោះតិចក្តីច្រើនក្តីរបស់ពួកគាត់ មកជូនដល់ប្រជាពលរដ្ឋភៀសសឹកនៅតាមព្រំដែន ដែលនេះសម្ដេចតេជោ ថា គឺជាការបង្ហាញពីការឈឺឆ្អាលរបស់ពលរដ្ឋខ្មែរក្រៅប្រទេសចំពោះការលំបាករបស់ជនភៀសសឹក បើទោះបីជាពួកគាត់រស់នៅឯនាយសមុទ្រក្តីក៏ប៉ុន្តែពួកគាត់ស្ថិតនៅជាប់ជាមួយនឹងជាតិសាសន៍កម្ពុជាជានិច្ច។

សម្តេចតេជោ បានផ្តាំផ្ញើឱ្យពលរដ្ឋទាំងអស់ បន្តរឹតចំណងសាមគ្គីភាពក្នុងចំណោមខ្មែរនិងខ្មែរនៅក្រៅប្រទេសឱ្យកាន់តែរឹងមាំ និងជួយសម្រួលដល់ប្រជាពលរដ្ឋផ្សេងទៀត តាមរយៈសកម្មភាពមនុស្សធម៌ និងការងារសង្គមផ្សេងៗ។

តាមរយៈជំនួបសំណេះសំណាលនេះដែរ ក៏បានបង្ហាញពីបរិយាកាសដ៏ស្និទ្ធស្នាល និងពោរពេញដោយសាមគ្គីភាព ដែលជាការបង្ហាញពីការយកចិត្តទុកដាក់របស់សម្តេចតេជោចំពោះសុខទុក្ខពលរដ្ឋខ្មែរ ដែលរស់នៅឯក្រៅប្រទេស ជាពិសេសសកម្មជនគណបក្ស ដែលតែងតែលះបង់កម្លាំងកាយចិត្ត ក្នុងការគាំទ្រ និងការងារអង្គការចាត់តាំងនៅបណ្តារដ្ឋនានានៃតំបន់ឆ្នេរខាងលិចសហរដ្ឋអាមេរិក៕