លោក Vance៖ បើ​អ៊ីរ៉ង់​អាច​ផលិតអាវុធ​នុយក្លេអ៊ែរ រដ្ឋអារ៉ាប់ផ្សេង​ទៀត​នឹងប្រជែង​គ្នា​​ធ្វើ​តាម

អនុប្រធានាធិបតី​អាមេរិក​ លោក JD Vance បានលើកឡើងនូវសេណារីយ៉ូដ៏គួរ​ឲ្យ​ព្រួយបារម្ភមួយសម្រាប់មជ្ឈិមបូព៌ា ដោយព្រមានថា អាវុធនុយក្លេអ៊ែររបស់អ៊ីរ៉ង់នឹងក្លាយជាភ្លើងបញ្ឆេះ​ឲ្យ​មានការប្រណាំងប្រជែងសព្វាវុធនុយក្លេអ៊ែរភ្លាមៗពាសពេញតំបន់។

តាម​ការ​ចុះ​ផ្សាយ​របស់ Washington Examiner នាថ្ងៃទី៤ខែ​កុម្ភៈ​ឆ្នាំ​២០២៦ លោក Vance បានព្យាករថា បើទីក្រុងតេហេរ៉ង់ឈានដល់កម្រិតផលិត​អាវុធនុយក្លេអ៊ែរ នោះអារ៉ាប៊ីសាអូឌីត និងរដ្ឋអារ៉ាប់ផ្សេងទៀតក្នុងតំបន់ឈូងសមុទ្រ នឹងប្រញាប់ប្រញាល់បង្កើតឃ្លាំងអាវុធផ្ទាល់ខ្លួន «នៅថ្ងៃបន្ទាប់» ភ្លាម។ ការព្រមាននេះ ធ្វើឡើងក្នុង​អំឡុង​ពេលដ៏សំខាន់បំផុត ខណៈដែលបេសកជនអាមេរិក លោក Steve Witkoff កំពុងត្រៀមខ្លួនសម្រាប់ជំនួបជាមួយមន្ត្រីអ៊ីរ៉ង់នៅប្រទេសអូម៉ង់នាថ្ងៃសុក្រសប្ដាហ៍​នេះ។

ស្របពេល​ដែល​​គោលនយោបាយ​«America First»នៅតែផ្តោតសំខាន់លើការបញ្ឈប់ការរីកសាយភាយអាវុធ​ជា​សកល លោក Vance បានបញ្ជាក់ច្បាស់ៗថា ប្រធានាធិបតីត្រាំគ្មានបំណង ក្នុងការធ្វើ​ឲ្យ​មានកំហុសយោធាដដែលៗដូចសម័យសង្គ្រាមអ៊ីរ៉ាក់នោះទេ។ ផ្ទុយទៅវិញ រដ្ឋបាល​លោក​កំពុងលេងល្បែងយុទ្ធសាស្ត្រ «តើពួកគេនឹងធ្វើ ឬមិនធ្វើ» ដោយលោកត្រាំ រក្សាជម្រើសគ្រប់ផ្លូវក្នុងដៃ ស្របពេលកំពុងព្រមានជាសាធារណៈដល់មេដឹកនាំកំពូលអ៊ីរ៉ង់ លោក Ayatollah Ali Khamenei ថាគួរតែ«បារម្ភឲ្យមែនទែន»។ យោងតាមលោក Vance គោលដៅគឺដោះស្រាយភាពទាល់ច្រកតាមរយៈមធ្យោបាយមិនមែនយោធា ប៉ុន្តែលោកក៏បានកត់សម្គាល់ចំៗថា បើយោធាក្លាយជាជម្រើសតែមួយគត់ នោះលោកប្រធានាធិបតីក៏ត្រៀមខ្លួនរួចជាស្រេចក្នុងការប្រើប្រាស់វា។

សូម​ជម្រាប​ថា យុទ្ធសាស្ត្ររបស់រដ្ឋបាលអាមេរិកកំពុងជួបឧបសគ្គធំមួយ គឺ​វិវាទលើរបៀបវារៈនៃកិច្ចពិភាក្សា។ អាមេរិកចង់ដោះស្រាយបញ្ហាឃ្លាំងមីស៊ីលរបស់ទីក្រុងតេហេរ៉ង់ តែ​អ៊ីរ៉ង់បានទទូចថានឹងពិភាក្សាតែអំពីកម្មវិធីនុយក្លេអ៊ែររបស់ខ្លួនប៉ុណ្ណោះ៕

ប្រែសម្រួល៖ ឈាង