សេដ្ឋកិច្ច

កម្ពុជា-វៀតណាម ប្ដេជ្ញាខិតខំបង្កើនទំហំពាណិជ្ជកម្មទ្វេភាគីដល់ ២០ ពាន់លានដុល្លារ

បានផុស

៤ ខែ មុន

នៅ

ថ្ងៃចន្ទ ៩ កុម្ភៈ ២០២៦

ដោយ

ថ្នាក់ដឹកនាំជាន់ខ្ពស់កម្ពុជា-វៀតណាមបានប្ដេជ្ញាបង្កើនទំហំពាណិជ្ជកម្មទ្វេភាគីឱ្យដល់ ២០ ពាន់លានដុល្លារ នៅពេលឆាប់ៗខាងមុខនេះ ឆ្លុះបញ្ចាំងពីការរីកចម្រើននៃទំនាក់ទនងសហប្រតិបត្តិការរវាងប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្ដេជ្ញាបែបនេះ បានធ្វើឡើងនៅក្នុងជំនួបរវាងសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា ជាមួយលោក តួ ឡឹម អគ្គលេខាធិការបក្សកុម្មនីស្តវៀតណាម កាលពីថ្ងៃសុក្រ ទី ០៦ ខែ កុម្ភៈ ឆ្នាំ ២០២៦។

សេចក្ដីប្រកាសព័ត៌មានរបស់គណបក្សប្រជាជន ស្ដីពីលទ្ធផលនៃកិច្ចប្រជុំលើកបញ្ជាក់ថា ភាគីទាំងពីរប្ដេជ្ញាបន្តជំរុញទំនាក់ទំនងសហប្រតិបត្តិការរវាងស្ថាប័នបក្ស សភា ក្រសួង ស្ថាប័នរបស់រដ្ឋាភិបាល និងអាជ្ញាធរមូលដ្ឋាន។

ភាគីទាំងពីរក៏នឹងបន្តបង្កើនការផ្សារភ្ជាប់ខឿនសេដ្ឋកិច្ច នៃប្រទេសទាំងពីរជាពិសេសការតភ្ជាប់ហេដ្ឋារចនាសម្ព័ន្ធផ្លូវគមនាគមន៍ ទូរគមនាគមន៍ ថាមពលអគ្គិសនី បរិវត្តកម្មឌីជីថល និងខ្សែច្រវាក់ផ្គត់ផ្គង់ឧស្សាហកម្មកែច្នៃ និងកសិកម្ម ដើម្បីទាញយកប្រៀបខ្លាំង និងបំពេញឱ្យគ្នាទៅវិញទៅមក។

សេចក្ដីប្រកាសព័ត៌មាន លើកឡើងថា ភាគីទាំងពីរក៏នឹងបង្កើនសកម្មភាពជំរុញការវិនិយោគ ពាណិជ្ជកម្ម និងទេសចរណ៍ ដោយខិតខំប្រឹងប្រែងបង្កើនទំហំពាណិជ្ជកម្មទ្វេភាគីដល់ ២០ ពាន់លានដុល្លារ នៅពេលឆាប់ៗ ព្រមទាំងបន្តជំរុញនូវការផ្សារភ្ជាប់ការអប់រំ និងការបណ្ដុះបណ្ដាលធនធានមនុស្ស ដើម្បីជាស្ពានតភ្ជាប់រវាងយុវជននៃប្រទេសទាំងពីរ តាមទស្សនវិស័យយូរអង្វែង។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ ទំហំពាណិជ្ជកម្មកម្ពុជា-វៀតណាម សម្រេចបានទឹកប្រាក់ ៧,៧ ពាន់លានដុល្លារ ធ្លាក់ចុះជិត ១% ធៀបនឹងឆ្នាំ ២០២៤ ដែលមានទំហំ ៧,៨។

កម្ពុជានាំចេញទៅវៀតណាមមានទំហំទឹកប្រាក់ប្រមាណ ៣,៧២ ពាន់លានដុល្លារ កើនឡើង ០,៨២% ចំណែកឯវៀតណាមនាំចូលមកវិញ មានតម្លៃ ៤ ពាន់លានដុល្លារ ធ្លាក់ចុះ ២,៥៣%៕

អត្ថបទ៖ ឡេង ដេត