ទូតកម្ពុជា និងទូតអង់គ្លេស ប្រចាំសាធារណរដ្ឋកូរ៉េ ជួបពិភាក្សា និងផ្លាស់ប្តូរយោបល់គ្នាលើបញ្ហាតំបន់ និងអន្តរជាតិ

លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានអញ្ជើញជួបសម្តែងការគួរសម និងពិភាក្សាការងារជាមួយលោក Colin James Crooks ឯកអគ្គរាជទូតចក្រភពអង់គ្លេសប្រចាំសាធារណរដ្ឋកូរ៉េ នៅនិវេសនដ្ឋានរបស់ Colin James Crooks ក្នុងទីក្រុងសេអ៊ូល។

ជំនួបដែលធ្វើឡើងកាលពីថ្ងៃទី១៩ ខែកុម្ភៈ ឆ្នាំ២០២៦ ភាគីទាំងពីរបានផ្លាស់ប្តូរយោបល់លើបញ្ហាសេដ្ឋកិច្ច ពាណិជ្ជកម្ម នយោបាយ ការផ្លាស់ប្តូររវាងប្រជាជន និងប្រជាជន បញ្ហាតំបន់ និងអន្តរជាតិ។

ក្នុងឱកាសនោះ លោក ឃួន ផុនរតនៈ បានលើកឡើងអំពីកិច្ចខិតខំប្រឹងប្រែងរបស់រដ្ឋាភិបាលកម្ពុជា ក្នុងការបង្ក្រាបឧក្រិដ្ឋកម្មអនឡាញ​ ដែលកន្លងមករដ្ឋាភិបាលបានចាប់ខ្លួនឧក្រិដ្ឋជនជាច្រើននាក់ និងបញ្ជូនពួកគេត្រលប់ទៅប្រទេសរបស់ពួកគេវិញជាបន្តបន្ទាប់ ដើម្បីកាត់ទោសតាមផ្លូវច្បាប់។

បន្ថែមពីនេះ លោក​ឯកអគ្គរាជទូត​ក៏បានជម្រាប​ ​លោក Colin James Crooks​ ​អំពីបច្ចុប្បន្នភាពលើបញ្ហាព្រំដែនកម្ពុជា-ថៃ និងភាពចាំបាច់ដែលកម្ពុជាចូលជាសមាជិកក្រុមប្រឹក្សាសន្តិភាពដែលបង្កើតឡើងដោយលោកប្រធានាធិបតី Donald Trump ផងដែរ៕