ព័ត៌មានអន្ដរជាតិ

ត្រាំ ព្រមានដាក់ពន្ធខ្ពស់លើប្រទេសណាដែលដកខ្លួនចេញពីកិច្ចព្រមព្រៀងពាណិជ្ជកម្មបដិការ

បានផុស

៣ ខែ មុន

នៅ

ថ្ងៃអង្គារ ២៤ កុម្ភៈ ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃចន្ទ (២៣ កុម្ភៈ) បានព្រមានថានឹងដាក់ពន្ធខ្ពស់លើប្រទេសផ្សេងៗដោយប្រើច្បាប់ពាណិជ្ជកម្មខុសៗគ្នា ប្រសិនបើពួកគេហ៊ានដកខ្លួនចេញពីកិច្ចព្រមព្រៀងពាណិជ្ជកម្មដែលសម្រេចឡើងថ្មីៗក្រោមបរិបទពន្ធបដិការរបស់អាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការគំរាមរបស់លោក ត្រាំ យ៉ាងដូច្នេះ ធ្វើឡើងបន្ទាប់ពីតុលាការកំពូលអាមេរិកកាលពីសប្ដាហ៍មុន បានសម្រេចថា ប្រធានាធិបតីរូបនេះបានបំពានអំណាចរបស់ខ្លួនចំពោះការដាក់ពន្ធបដិការលើទំនិញនាំចូលពីបណ្ដាប្រទេសនៅជុំវិញពិភពលោក ដោយខុសច្បាប់ច្បាប់អំណាចសេដ្ឋកិច្ចបន្ទាន់អន្តរជាតិ (IEEPA) ឆ្នាំ ១៩៧៧។

ការណ៍នេះកំពុងបង្កើនភាពស្រពេចស្រពិលនៃគោលនយោបាយពន្ធគយជាថ្មីសម្រាប់ពាណិជ្ជកម្មសកល ក៏ដូចជាកិច្ចព្រមព្រៀងពាណិជ្ជកម្មរវាងបណ្ដាប្រទេសផ្សេងៗ និងសហរដ្ឋអាមេរិក ដែលបង្កើតឡើងដោយសារតែគំនាបពន្ធរបស់លោក ត្រាំ។

លោក ត្រាំ សរសេរបង្ហោះនៅលើបណ្ដាញសង្គមយ៉ាងដូច្នេះថា៖ «ប្រទេសណាក៏ដោយ ដែលចង់ល្បងនឹងការសម្រេចចិត្តដ៏គួរឱ្យអស់សំណើចរបស់តុលាការកំពូល ជាពិសេសប្រទេសដែល «បឺតជញ្ជក់ប្រយោជន៍» ពីសហរដ្ឋអាមេរិកអស់រយៈពេលជាច្រើនឆ្នាំ ឬក៏រាប់ទសវត្សរ៍មកហើយនោះ នឹងរងនូវការដាក់ពន្ធកាន់តែខ្ពស់ និងអាក្រក់ជាងមុន ជាងអត្រាដែលពួកគេបានយល់ព្រមទទួលថ្មីៗនេះ។ សូមប្រយ័ត្នឱ្យមែនទែន»។

ប្រធានាធិបតីដដែលបានគូសបញ្ជាក់ថា ទោះបីជាតុលាការបានសម្រេចចិត្តលុបចោលពន្ធគយរបស់លោកក្រោមច្បាប់ IEEPA ក៏ដោយ ប៉ុន្តែលោកអាចដាក់ពន្ធក្រោមច្បាប់ផ្សេងទៀត «តាមរបៀបដ៏មានឥទ្ធិពល និងអាក្រក់ខ្លាំង ដោយមានភាពប្រាកដប្រជាផ្នែកច្បាប់» ជាងពន្ធគយចាស់ ដែលរាប់បញ្ជូលទាំងពន្ធគយបដិការ។

គួររំឭកថា ក្រោយតុលាការចេញការសម្រេចនៅថ្ងៃសុក្រ លោក ត្រាំ បានប្រកាសពីការដាក់ពន្ធថ្មី ១៥% លើទំនិញពីគ្រប់ប្រទេសទាំងអស់ក្រោមច្បាប់ពាណិជ្ជកម្មឆ្នាំ ១៩៧៤ ដែលអនុញ្ញាតឱ្យប្រធានាធិបតីដាក់ពន្ធរយៈពេល ១៥០ ថ្ងៃ៕