អាហ្វហ្គានីស្ថាន អះអាងថា បានសម្លាប់ទាហានប៉ាគីស្ថាន ៥០នាក់

តាមប្រភពពីក្រុមតាលីបង់, ក្នុងការប្រយុទ្ធគ្នាថ្មី អាហ្វហ្គានីស្ថាន បានសម្លាប់ទាហានប៉ាគីស្ថានចំនួន៥០នាក់ ដ្បិតព័ត៌មាននេះ អះអាងតែម្ខាងក៏ដោយ។

អ្នកនាំពាក្យក្រុមតាលីបង់ Zabiullah Mujahid ប្រាប់ BBC នៅថ្ងៃសុក្រទី២៧ខែកុម្ភៈថា ក្រៅពីសម្លាប់ទាហានហើយនោះ អាហ្វហ្គានីស្ថាន ក៏កម្ទេចប៉ុស្តិ៍ព្រំដែនប៉ាគីស្ថាននៅ១៩ទីតាំង និងចាប់បានឈ្លើយសឹកជាច្រើននាក់ថែមទៀតផង។

យ៉ាងណា ដ្បិតមិនបញ្ជាក់ច្បាស់ ប៉ុន្តែខាងប៉ាគីស្ថានឯណោះ ក៏អះអាងដែរថា ខ្លួនសម្លាប់កងកម្លាំងក្រុមតាលីបង់អស់ច្រើនណាស់ ហើយនិងកម្ទេចប៉ុស្តិ៍ព្រំដែនអាហ្វហ្គានីស្ថាននៅ២៧ទីតាំង។

សូមជម្រាបជាថ្មី រដ្ឋមន្ត្រីការពារជាតិប៉ាគីស្ថាន Khawaja Asif បានប្រកាស «សង្រ្គាមបើក​ចំហ» លើ អាហ្វហ្គានីស្ថាន នា​ព្រឹកថ្ងៃសុក្រ​ទី​២៧​ខែ​កុម្ភៈ​ បន្ទាប់ពីកងទ័ពប៉ាគីស្ថានបើកការវាយប្រហារតាមអាកាសលើមូលដ្ឋានយោធាអាហ្វហ្គានីស្ថានក្នុងទីក្រុងកាប៊ុល ខេត្ត Kandahar និង Paktia។

ការវាយប្រហារនេះ គឺដើម្បីឆ្លើយតបទៅនឹងការឆ្មក់វាយរបស់ក្រុមតាលីបង់នៅតាមព្រំដែនកាលពីថ្ងៃព្រហស្បតិ៍ ដែលបានសម្លាប់ទាហានប៉ាគីស្ថានពីរនាក់។

លោក Asif បានបញ្ជាក់ថា ការអត់ធ្មត់របស់ប៉ាគីស្ថានបានអស់កំណត់ហើយ ចំណែក​ឯ​​នាយករដ្ឋមន្ត្រី Shehbaz Sharif បានប្តេជ្ញាផ្តល់ «ការឆ្លើយតបយ៉ាងចាស់ដៃ» ចំពោះរាល់ការឈ្លានពានលើអធិបតេយ្យភាពជាតិ។

យ៉ាងជុំវិញអំពើហិង្សានេះ អង្គការសហប្រជាជាតិ បានអំពាវនាវឲ្យ ភាគីទាំងពីរបន្ធូរបន្ថយភាពតានតឹងនិងគោរពច្បាប់អន្តរជាតិ។

អគ្គលេខាធិការ UN លោក Antonio Guterres បានជំរុញឲ្យភាគីទាំងពីរគោរពកាតព្វកិច្ចរបស់ខ្លួននៅក្រោមច្បាប់អន្តរជាតិឲ្យបានខ្ជាប់ខ្ជួន ដោយផ្ដោតការយកចិត្តទុកដាក់ជាពិសេសលើច្បាប់មនុស្សធម៌អន្តរជាតិ។

ចំណែកមេផ្នែកសិទ្ធិមនុស្សលោក Volker Türk ក៏អំពាវនាវដល់អាហ្វហ្គានីស្ថាននិងប៉ាគីស្ថាន ឲ្យចូលមកកាន់តុចរចា ដើម្បីស្វែងរកដំណោះស្រាយចំពោះការប្រយុទ្ធគ្នាថ្មីៗនេះផងដែរ៕

អត្ថបទ៖ សុខ សុវណ្ណ