សេដ្ឋកិច្ច

អ្នកជំនាញអះអាង តម្លៃប្រេងពិភពលោក រួមទាំងកម្ពុជា នឹងកើនឡើង ដោយសារសង្គ្រាមអ៊ីស្រាអ៊ែល-អ៊ីរ៉ង់

បានផុស

៤ ខែ មុន

នៅ

ថ្ងៃចន្ទ ២ មីនា ២០២៦

ដោយ

លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា មើលឃើញពីផលប៉ះពាល់ចំនួន ៣ ដែលអាចនឹងជះឥទ្ធិផលមកកាន់ប្រទេសកម្ពុជា តាមរយៈសង្គ្រាមរវាងអ៊ីស្រាអែល និងអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់«កម្ពុជាថ្មី» នៅថ្ងៃទី០២ ខែមិនា ឆ្នាំ២០២៦ នេះ លោកបណ្ឌិត គី សេរីវឌ្ឍន៍ បានមានប្រសាសន៍ថា ចំពោះសង្គ្រាមរវាងអ៊ីស្រាអែល និងអ៊ីរ៉ង់ ដែលកំពុងតែកើតមានឡើងនាពេលនេះអ្វីដែលយើងគិតទុក គឺអាចនឹងមានផលប៉ះពាល់មួយចំនួនមកដល់ប្រទេសកម្ពុជា។ ទី១ ប៉ះពាល់ដល់ការចេញទំនិញទៅកាន់ទីក្រុងឌូបៃ ហើយជំរុញឱ្យតម្លៃប្រេងកើនឡើង ម្យ៉ាងទៀតសង្គ្រាមនេះនឹងជះឥទ្ធិផលអតិផរណាមកលើប្រទេសកម្ពុជា។

យោងតាមក្រសួងពាណិជ្ជកម្ម តម្លៃប្រេងសាំងធម្មតា លក់ចេញក្នុងតម្លៃ ៣៨៥០ រៀល ក្នុងមួយលីត្រ កើនឡើង ១០០ រៀល ចាប់ពីថ្ងៃទី ០១ ខែមីនា ឆ្នាំ ២០២៦ ដល់ថ្ងៃទី ១០ ខែមីនា។

យោងតាមប្រព័ន្ធផ្សព្វផ្សាយបរទេស តម្លៃប្រេងអន្តរជាតិបានហក់ឡើងខ្លាំងជិត ១០ ដុល្លារ ពេលបើកការជួញដូរលើទីផ្សារអាស៊ីនាព្រឹកថ្ងៃចន្ទ (២ មីនា) នេះ ដោយសារតែជម្លោះមជ្ឈិមបូព៌ា ដែលផ្ទុះឡើងក្រោយអ៊ីស្រាអែល និងអាមេរិករួមដៃគ្នាវាយប្រហារអ៊ីរ៉ង់ទ្រង់ទ្រាយធំ ដែលបង្កការវាយបកសងសឹកខ្លាំង និងប៉ះពាល់ដល់លំហូរប្រេងចេញពីតំបន់៕

យោងតាមក្រសួងពាណិជ្ជកម្ម ទំហំពាណិជ្ជកម្មកម្ពុជា អេមីរ៉ាតអារ៉ាប់រួម នៅក្នុងឆ្នាំ២០២៥ សម្រេចបានប្រមាណជិត១០០ លានដុល្លារ កាលពីឆ្នាំ ២០២៥ ក្នុងនោះកម្ពុជានាំចេញទៅអេមីរ៉ាតអារ៉ាប់រួមមានតម្លៃប្រមាណ ៧៤ លានដុល្លារ កើនឡើង ៩,៨១% ចំណែកឯអេមីរ៉ាតអារ៉ាប់រួមនាំចូលមកវិញមានតម្លៃ ២៤,៤៣ លានដុល្លារ កើន ៤,៥៧% ប្រៀបធៀបនឹងឆ្នាំ ២០២៤។

កម្ពុជាបានធ្វើការនាំចេញនូវសម្លៀកបំពាក់ ស្បែកជើង កាបូប កៅស៊ូធម្មជាតិ និងទំនិញផ្សេងៗទៀតទៅកាន់ទីផ្សារអារ៉ាប់រួម និងនាំចូលមកវិញនូវរ៉ែប្រើជាគ្រឿងចំហេះ ផលិតផលប្លាស្ទិក ថ្នាំជក់ កៅស៊ូសំយោគ និងទំនិញផ្សេងទៀត៕