ថៃ បដិសេធព័ត៌មាន​ដែល​ថា ខ្លួន​ឲ្យ​អាមេរិក​បង្កើតមូលដ្ឋានទ័ព

ក្រសួងការបរទេសថៃបានចេញសេចក្តីថ្លែងការណ៍ផ្លូវការមួយ ដើម្បីបញ្ជាក់​ថា រាល់សេចក្តីរាយការណ៍ដែលថាមានកិច្ចព្រមព្រៀងសម្ងាត់អនុញ្ញាត​ឲ្យ​សហរដ្ឋអាមេរិកបង្កើតមូលដ្ឋានទ័ពនៅក្នុងប្រទេសថៃ គឺជាព័ត៌មានមិនពិតទាំងស្រុង។ នេះ​បើយោង​តាម​ការ​ចុះ​ផ្សាយរបស់ Thai Post កាល​ពី​យប់​ថ្ងៃ​ទី​​៤​​ខែ​មីនា​ឆ្នាំ​២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទសារព័ត៌មាននៅក្រសួងការបរទេស លោក Panidorn Pachimsawat អគ្គនាយករងនៃនាយកដ្ឋានព័ត៌មាន និងជា​អ្នកនាំពាក្យ​រង​ក្រសួង បានឆ្លើយតបទៅនឹងការចែកចាយព័ត៌មានតាមបណ្តាញសង្គមដែលអះអាងថា ថៃបានចុះហត្ថលេខាលើសន្ធិសញ្ញាក្រោមក្របខ័ណ្ឌកិច្ចសហប្រតិបត្តិការឥណ្ឌូប៉ាស៊ីហ្វិក ដែលមានលក្ខខណ្ឌ​ឲ្យ​អាមេរិកមកតាំងមូលដ្ឋានទ័ព។

លោក Panidorn បានសង្កត់ធ្ងន់ថា ពាក្យចចាមអារ៉ាមទាំងនេះគឺផ្ទុយស្រឡះពីគោលនយោបាយជាតិដ៏ច្បាស់លាស់របស់ថៃ ដែលតែងតែលើកកម្ពស់ការកាត់បន្ថយភាពតានតឹង និងស្វែងរកដំណោះស្រាយដោយសន្តិវិធីចំពោះជម្លោះសកល។ ក្រសួងពន្យល់ថា ទោះបីជាថៃរក្សាសម្ព័ន្ធភាពសន្តិសុខដ៏យូរអង្វែងជាមួយ​អាមេរិក និងចូលរួមក្នុងក្របខ័ណ្ឌតំបន់ក៏ដោយ ប៉ុន្តែកិច្ចព្រមព្រៀងទាំងនោះគឺផ្តោតសំខាន់តែលើកិច្ចសហប្រតិបត្តិការសេដ្ឋកិច្ច ការជួយសង្គ្រោះគ្រោះមហន្តរាយ និងបេសកកម្មមនុស្សធម៌ប៉ុណ្ណោះ មិនមែនជាការទទួលកងទ័ពបរទេសមកឈរជើងដើម្បីប្រយុទ្ធគ្នានោះឡើយ។

រដ្ឋាភិបាលបានកត់សម្គាល់ថា ការផ្សព្វផ្សាយព័ត៌មានមិនពិតនេះ កើតឡើងស្របពេលជាមួយនឹងជំនួបនាពេលថ្មីៗនេះរវាងឯកអគ្គរដ្ឋទូតអាមេរិក និងនាយករដ្ឋមន្ត្រីថៃ ព្រមទាំងការធ្វើសមយុទ្ធយោធា Cobra Gold 2026 ដែលកំពុងដំណើរការ។ មន្ត្រីថៃបានពន្យល់ថា វត្តមានរបស់បុគ្គលិកយោធាអាមេរិកសម្រាប់សមយុទ្ធប្រចាំឆ្នាំនេះ គឺមានលក្ខណៈបណ្តោះអាសន្នប៉ុណ្ណោះ និងមិនមែនជាការរៀបចំមូលដ្ឋានទ័ពអចិន្ត្រៃយ៍នោះឡើយ៕

ប្រែសម្រួល៖ ឈាង