តម្លៃស្វាយកែវមៀតធ្លាក់ចុះ ១៧០ រៀល ក្នុងមួយគីឡូក្រាម

លោក វង្ស សម្បត្តិ កសិករនៅភូមិភ្នំប្រាំពីរ ឃុំបួរ ស្រុកភ្នំព្រឹក ខេត្តបាត់ដំបងបានប្រាប់ថា តម្លៃស្វាយកែវរមៀតបានធ្លាក់ចុះ​យ៉ាងគំហុកនៅមួយរយៈចុងក្រោយនេះ។ លោកបានដាំដំណាំស្វាយកែវមៀតប្រមាណ ៥០០ ដើម កំពុងហុចផលល្អ ប៉ុន្តែតម្លៃទីផ្សារបានធ្លាក់ចុះ។

តម្លៃស្វាយកែវរមៀតលក់បានតែ ១៧០ រៀល ក្នុងមួយគីឡូក្រាម ហើយនៅក្នុងតម្លៃនេះគឺឈ្មួញចម្រាញ់យកផ្លែស្វាយ​ណា​ដែលមានទំហំ ២ផ្លែ ឬ ៣ផ្លែ ស្មើមួយគីឡូក្រាម បើផ្លែតូចគឺគេមិនទិញនោះឡើយ ដូច្នេះក្នុងមួយចំការត្រូវចម្រាញ់​រើសយកតែផ្លែធំទៅលក់ទើបគេទិញ ហើយយើងដែលជាម្ចាស់ស្វាយត្រូវដឹកស្វាយនោះទៅដល់ទីតាំងដែលគេចាំទិញ​ថែមទៀត ដូច្នេះបើកាច់កិនទៅនឹងថ្លៃសាំងឬម៉ាស៊ូត និងថ្លៃកម្លាំងពលកម្ម ក៏សឹងតែអស់ទៅហើយប៉ុន្តែមិនដឹងធ្វើយ៉ាងម៉េច បើវាដល់រដូវដែលត្រូវប្រមូលផលទៅហើយនោះ។

កសិកររូបនេះ សំណូមពរដល់ក្រសួងពាក់ព័ន្ធមេត្តាធ្វើយ៉ាងណាជួយសម្របសម្រួល រកទីផ្សារផ្លែស្វាយកែវរមៀតឲ្យបានតម្លៃខ្ពស់ជាងនេះបន្តិច ព្រោះកសិករពឹងផ្អែកលើកសិកម្ម និងដំណាំផ្សេងៗ។

ក្រសួងពាណិជ្ជកម្ម​ កាលពីពេលថ្មីៗនេះ បានបន្ត​សម្របសម្រួល​ដោះស្រាយ​ការកកស្ទះ​កសិផល ដែលបណ្តាលមកពីការមិនអាចស្រូបចូលទៅទីផ្សារបានទាន់ពេលវេលា ជាពិសេស ក្នុង​អំឡុង​រដូវកាលប្រមូលផល ​សំដៅធានាស្ថិរភាពទីផ្សារ ​និង​ការពារផលប្រយោជន៍​របស់កសិករ៕

អត្ថបទ៖ សោ និយមរ័ត្ន