សេដ្ឋកិច្ច

ចំណូលលក់សំបុត្រចូលទស្សនាអង្គរបានជាង $១៣ លាន ធ្លាក់ចុះ ៣០% នៅត្រីមាសទី១

បានផុស

៣ ខែ មុន

នៅ

ថ្ងៃពុធ ១ មេសា ២០២៦

ដោយ

ភ្ញៀវទេសចរអន្តរជាតិចំនួនជាង ២ សែន ៧ ម៉ឺននាក់ (២៧០ ៩១១) បានទិញសំបុត្រចូលទស្សនារមណីយដ្ឋានអង្គរនៅក្នុងរយៈពេល ៣ ខែ (មករា-មីនា) ២០២៦ ដែលនាំឱ្យកម្ពុជារកចំណូលបានជាង ១៣ លានដុល្លារ (១៣ ១០៣ ៩៧៧) ធ្លាក់ចុះ ៣០% ធៀបនឹងរយៈពេលដូចគ្នា នៅក្នុងឆ្នាំ ២០២៥។ នេះបើយោងតាមរបាយការណ៍របស់គ្រឹះស្ថានអង្គរចេញផ្សាយនៅថ្ងៃពុធ ទី ១ ខែមេសា ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រឹះស្ថានអង្គរបញ្ជាក់ថា គិតត្រឹមតែរយៈពេលមួយខែមីនា ២០២៦ មានភ្ញៀវទេសចរចំនួន ៨២ ០២៦ នាក់ បានទិញសំបុត្រចូលទស្សនារមណីយដ្ឋានអង្គរ និងរកចំណូលបានជិត ៤ លានដុល្លារ (៣ ៩២៨ ៧០៧) ធ្លាក់ចុះ ២៩,២២% ធៀបនឹងខែមីនា ឆ្នាំ ២០២៥។

លោក ខៀវ ធី ប្រធានសមាគមមគ្គុទ្ទេសក៍អង្គរខេត្តសៀមរាប យល់ឃើញថា បញ្ហាសង្គ្រាមព្រំដែនកម្ពុជា-ថៃបានធ្វើឱ្យភ្ញៀវទេសចរចូលមកទស្សនាខេត្តសៀមរាបធ្លាក់ចុះ។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) មានប្រសាសន៍ថា កម្ពុជារងសម្ពាធធ្ងន់ធ្ងរនៅក្នុងឆ្នាំ ២០២៥ បន្ទាប់ពីជំងឺកូវីដ១៩ ដោយសារការចោទប្រកាន់ពីការឆបោកអនឡាញ និងការឈ្លានពានពីប្រទេសថៃ។

លោក ធួន ស៊ីណាន យល់ឃើញថា៖ «ភូមិសាស្ត្រនយោបាយកំពុងកើតមានឡើងនៅលើពិភពលោក ពិភពលោកបានដើរដល់ផ្លូវទាល់ ដែលយើងគ្រប់គ្នាស្មានមិនត្រូវ អ្វីក៏អាចកើតមានឡើងគ្រប់ពេលវេលា យើងអត់ដឹងថា តើថ្ងៃស្អែកមានអ្វីកើតឡើងទៀតទេ»។

យោងតាមគ្រឹះស្ថានអង្គរ នៅក្នុងឆ្នាំ ២០២៥ កម្ពុជារកចំណូលបានជិត ៤៥ លានដុល្លារ ពីការលក់សបុត្រចូលទស្សនារមណីយដ្ឋានអង្គរ ធ្លាក់ចុះ ៦,៥១% ប្រៀបធៀបនឹងឆ្នាំ ២០២៤។

នៅឆ្នាំ ២០២៥ កម្ពុជាទទួលបានភ្ញៀវទេសចរអន្តរជាតិចំនួន ៥,៥៧ លាននាក់ ធ្លាក់ចុះ ១៦,៩% ប្រៀបធៀបនឹងឆ្នាំ ២០២៤ និងទេសចរជាតិប្រមាណ ២៥ លាននាក់ ខណៈចំណូលទេសចរណ៍សម្រេចបានប្រមាណ ៣,៧ ពាន់លានដុល្លារ កើន ៣%៕

អត្ថបទ៖ ឡេង ដេត