គ្រូបង្វឹក និងអត្តពលិក៤នាក់ចូលប្រកួតជម្រុះតេក្វាន់ដូ នៅ ហ្សកដានី

ភ្នំពេញ៖ ខេមរសហព័ន្ធតេក្វាន់ដូ​ WT នឹងបញ្ជូនគ្រូបង្វឹក និងកីឡាករ-កីឡាការិនី​ចំនួន៤នាក់ទៅចូលរួមការប្រកួតវគ្គជម្រុះកីឡាតេក្វាន់ដូ WT នៃព្រឹត្តិការណ៍ប្រកួតកីឡាអូឡាំពិកតូក្យូទ្វីបអាស៊ី “Asia qualification Tournament for Tokyo 2020 Olympic Game” នៃប្រទេសជប៉ុននៅប្រទេស ហ្សកដានី ដែលប្រព្រឹត្តចាប់ពីថ្ងៃទី១៧ ដល់ថ្ងៃទី២៥ ខែឧសភា ឆ្នាំ២០២១។

គ្រូបង្វឹក និងកីឡាករ-កីឡាការិនីចំនួន ៤នាក់នោះ រួមមានលោក ឆយ យ៉ុងសុក ជាគ្រូបង្វឹក លោកគ្រូ Tubbs Gregory Allan ជាគ្រូជំនួយ ចំណែកកីឡាការិនី ថិប កាសាន់ទ្រីនីកូល កូនខ្មែររស់នៅសហរដ្ឋអាមេរិកប្រកួតក្នុងប្រភេទទម្ងន់ក្រោម ៥៧គីឡូក្រាម និងកីឡាករ វ៉ា មិថុនា ប្រកួតក្នុងប្រភេទទម្ងន់ក្រោម ៨០គីឡូក្រាម។

លោក គង់ សក្កដា អគ្គលេខាធិការរងនៃខេមរសហព័ន្ធតេក្វាន់ដូ WT បានប្រាប់តាមប្រព័ន្ធអនឡាញថា ក្រោមការដឹកនាំរបស់លោក ហង់ជួន ណារ៉ុន ជាប្រធានខេមរសហព័ន្ធតេក្វាន់ដូ WT នាពេលបច្ចុប្បន្នមានការរីកចម្រើនខ្លាំងទំាងបច្ចេកទេស និងសមត្ថភាព ដោយពេលថ្មីៗក្រោយពីប្រជុំសមាជិកប្រតិបត្តិ បានបញ្ជូនគ្រូបង្វឹក និងកីឡាករ-កីឡាការិនីចំនួន៤នាក់ការ ប្រកួតវគ្គជម្រុះកីឡាតេក្វាន់ដូ WT នៃព្រឹត្តិការណ៍ការប្រកួតកីឡាអូឡាំពិកតូក្យូទ្វីប អាស៊ី “Asia n qualification Tournament for Tokyo 2020 Olympic Game” នៅប្រទេស Jordan នាខែឧសភាខាងមុខនេះ៕

អត្ថបទ៖ វិសិទ្ធ