ព័ត៌មានអន្ដរជាតិ

របាយការណ៍អេស្បាញ៖ ពូទីន ណេតាន់យ៉ាហ៊ូ និងត្រាំ ឈរលំដាប់កំពូលបង្កអសន្តិសុខសកល

បានផុស

៣ សប្តាហ៍ មុន

នៅ

ថ្ងៃអង្គារ ៧ មេសា ២០២៦

ដោយ

យោងតាមរបាយការណ៍ស្ទង់មតិមួយចេញផ្សាយដោយសារព័ត៌មានអេស្ប៉ាញ El País កាលពីថ្ងៃចន្ទ ទី៦ ខែមេសា ពលរដ្ឋអេស្ប៉ាញយល់ឃើញថា ប្រធានាធិបតីអាមេរិក លោក ដូណាល់ ត្រាំ (Donald Trump) ជាមេដឹកនាំពិភពលោកដែលបង្កការគំរាមកំហែងខ្លាំងបំផុតដល់សន្តិភាពពិភពលោក បន្ទាប់មកគឺលោក វ្ល៉ាឌីមៀរ ពូទីន (Vladimir Putin) មេដឹកនាំរុស្ស៊ី និង នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu)។

លោក ណេតាន់យ៉ាហ៊ូ លោក ពូទីន និង ត្រាំ។ រូបភាព៖ Reuters

ទាំង លោក ត្រាំ និង លោក ណេតាន់យ៉ាហ៊ូ ត្រូវបានគេចាត់ថ្នាក់ថា ជាការគំរាមកំហែងដ៏ខ្លាំង ចំពោះសន្តិភាពពិភព លោកជាងមេដឹកនាំកំពូលអ៊ីរ៉ង់ លោក អាយ៉ាតូឡាស់ អាលី ខាមេណៃ (Ayatollah Ali Khamenei) និងមេដឹកនាំកូរ៉េខាងជើង លោក គីម ជុងអ៊ុន។

ពេលសួរពីឈ្មោះមេដឹកនាំណាដែលបង្កគ្រោះថ្នាក់ដល់សន្តិភាពពិភពលោកខ្លាំងបំផុត អ្នកឆ្លើយតប ៨១% បង្ហាញថាគឺ លោក ត្រាំ ជាមេដឹកនាំបង្កការគ្រោះថ្នាក់ ឈរនៅលេខរៀងទីមួយ បន្ទាប់មកគឺ លោក ពូទីន ៧៩.២% និង លោក ណេតាន់យ៉ាហ៊ូ ៧១.២% ឈរនៅលេខរៀងទី៣។

ចំណែក លោក អាយ៉ាតូឡាស់ អាលី ខាមេណៃ ដែលត្រូវបានសម្លាប់ដោយសារការវាយប្រហាររបស់អាមេរិកនិងអ៊ីស្រាអែលកាលថ្ងៃទី២៨ខែកុម្ភ់ៈ មានចំណែក ៦២.៩% ហើយ លោក គីម ជុងអ៊ុន មានចំនួន ៦២.២៥% ។

ទោះបីយ៉ាងណា របាយការណ៍របស់ El País បានបញ្ជាក់ថា អ្នកនយោបាយដែលអ្នកចូលរួមក្នុងការស្ទង់មតិមកពីគណបក្សទាំងពីររបស់អេស្បាញ El Partido Popular និង Vox ទំនងកំណត់អត្តសញ្ញាណ លោក វ្ល៉ាឌីមៀរ ពូទីន ជាមេដឹកនាំគំរាមកំហែងដ៏ធំបំផុត លើសពីលោក ត្រាំ និង ណេតាន់យ៉ាហ៊ូ។

ក្រៅពីការចាត់ថ្នាក់មេដឹកនាំពិភពលោកតាមកម្រិតនៃការគំរាមកំហែងដល់សន្តិភាពពិភពលោក ការស្ទង់មតិរបស់ El País ក៏បានសួរអ្នកចូលរួមការស្ទង់មតិនូវសំណួរមួយចំនួនពីស្ថានភាពភូមិសាស្ត្រនយោបាយបច្ចុប្បន្នផងដែរ។

ពេលសួរថា៖ « តើសហគមន៍អន្តរជាតិគួរតែដាក់សម្ពាធបន្ថែមទៀតដើម្បីបញ្ចប់ជម្លោះអ៊ីស្រាអែល-ប៉ាឡេស្ទីនឬអត់? មាន ៧៥% ឆ្លើយថាយល់ព្រម»។

យ៉ាងណា មានតែ ៣២% នៃអ្នកស្ទង់មតិប៉ុណ្ណោះដែលយល់ស្របនឹងសេចក្តីថ្លែងការណ៍មួយថា «សហរដ្ឋអាមេរិកនិងអ៊ីស្រាអែលគួរតែបន្តការវាយប្រហាររហូតដល់របបនៅអ៊ីរ៉ង់ដួលរលំ»៕

ប្រែសម្រួល៖ ណឺ មិនា