ការផ្គត់ផ្គង់ប្រេងយន្តហោះអន្តរជាតិ អាចប្រើពេលរាប់ខែ ដើម្បីដូចដើមវិញ ក្រោយបើកច្រកហ័រមូហ្ស ​

សមាគមដឹកជញ្ជូនផ្លូវអាកាសអន្តរជាតិ (IATA) បាន​ព្រមាន​កាលពីថ្ងៃពុធ (៨ មេសា) ថា ទោះបីជាអ៊ីរ៉ង់បើកច្រកសមុទ្រ​ហ័រមូហ្សឡើងវិញ​ក្ដី ក៏វាត្រូវចំណាយពេលច្រើនខែដែរ ដើម្បីឱ្យ​ការផ្គត់ផ្គង់ប្រេង​ឥន្ធនៈយន្តហោះ​វិលត្រឡប់ទៅដូចដើមវិញ ដោយសារតែ​ផលប៉ះពាល់លើកន្លែង​ចម្រាញ់ប្រេងនៅមជ្ឈិមបូព៌ា។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។ ​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមាន​បែបនេះ ធ្វើឡើងក្រោយ​តម្លៃប្រេងអន្តរជាតិសំខាន់ៗបាន​ធ្លាក់ចុះក្រោយ ១០០ ដុល្លារ/បារ៉ែល ​បន្ទាប់​ប្រធានាធិបតីសហរដ្ឋអាមេរិក លោក​ ដូណាល់ ត្រាំ ​បាន​ប្រកាសពីបទឈប់បាញ់ជាមួយអ៊ីរ៉ង់រយៈពេល ២ សប្ដាហ៍ ហើយអ៊ីរ៉ង់យល់ព្រមបើកច្រកហ័រមូហ្សឡើងវិញតាមលក្ខខណ្ឌរបស់ខ្លួន។ ​ច្រកហ័រមូហ្សដែលជាផ្លូវដឹកជញ្ជូនប្រេងកាត និងឧស្ម័នធម្មជាតិ ១/៥ នៃតម្រូវការពិភព​លោក​ប្រចាំថ្ងៃ ត្រូវបាន​បិទស្ទើរទាំងស្រុង ក្រោយជម្លោះផ្ទុះឡើងនៅចុងខែកុម្ភៈ។

លោក Willie Walsh អគ្គនាយក​ IATA​ បានប្រាប់អ្នកយកព័ត៌មាននៅប្រទេសសិង្ហបុរីថា ​លោករំពឹង​ពីការធ្លាក់ចុះនៃតម្លៃប្រេងឆៅ ប៉ុន្តែតម្លៃប្រេង​យន្តហោះទំនងជានៅតែខ្ពស់បន្តិច ដោយសារតែផលប៉ះពាល់លើរោងចក្រចម្រាញ់ប្រេង។

លោក Walsh ​បាន​ថ្លែងយ៉ាងដូច្នេះថា៖ «ប្រសិនបើវា(ហ័រមូហ្ស)​បើកដំណើរការឡើងវិញ ​ខ្ញុំគិតថាវានៅតែត្រូវការរយៈពេលជាច្រើនខែដើម្បីត្រឡប់ទៅរកការផ្គត់ផ្គង់ដូចដើមវិញ ​ដោយសារតែការរំខានដល់សមត្ថភាពចម្រាញ់ប្រេងនៅមជ្ឈិមបូព៌ា ដែលជាផ្នែកសំខាន់មួយនៃការផ្គត់ផ្គង់ផលិតផលចម្រាញ់ជាសកល មិនមែនគ្រាន់តែប្រេងឥន្ធនៈយន្តហោះប៉ុណ្ណោះទេ ប៉ុន្តែក៏សម្រាប់ផលិតផលប្រេង​ផ្សេងទៀត​ផងដែរ»។

គួរគូសបញ្ជាក់ថា ក្រុមហ៊ុនអាកាសចរណ៍នៅទូទាំងទ្វីបអាស៊ីបានកាត់បន្ថយជើងហោះហើរ ដំឡើង​ថ្លៃសំបុត្រ បង្កើនស្ដុកប្រេងមុនហោះហើរ និង​បន្ថែមចំណតចាក់ប្រេងឥន្ធនៈ ​ចំពេល​ជម្លោះនៅមជ្ឈិមបូព៌ាបានធ្វើឱ្យការផ្គត់ផ្គង់ប្រេងឥន្ធនៈយន្តហោះកាន់តែតឹងតែង ដែលបន្ថែមសម្ពាធទៅលើឧស្សាហកម្មអាកាសចរណ៍ដែលរងផលប៉ះពាល់រួចហើយ​ដោយកំណើនតម្លៃប្រេងយន្តហោះ។

ផលប៉ះពាល់លើវិស័យអាកាសចរណ៍ធ្ងន់ធ្ងរបំផុតនៅបណ្ដាប្រទេសដែលពឹងផ្អែកលើការនាំចូលប្រេងយន្តហោះដូចជា​វៀតណាម មីយ៉ាន់ម៉ា និងប៉ាគីស្ថានជាដើម ក្រោយ​ចិន និងថៃ បានបញ្ឈប់ការនាំចេញប្រេងឥន្ធនៈយន្តហោះ។

មែនទែនទៅជម្លោះមជ្ឈិមបូព៌ា មិនត្រឹមតែបង្កការគំរាមកំហែងសម្រាប់ប្រេងយន្តហោះប៉ុណ្ណោះទេ តែក៏សម្រាប់ថាមពលទូទៅផងដែរ។ កាលពីចុងខែមីនា ប្រធានភ្នាក់ងារថាមពលអន្តរជាតិលោក Fatih Birol បានព្រមានថា ពិភព​លោកអាចប្រឈមមុខនឹង​វិបត្តិថាមពលដ៏ធ្ងន់ធ្ងរបំផុតក្នុងប្រវត្តិសាស្រ្ត ហើយលំហូរប្រេង និងឧស្ម័នធម្មជាតិ​ចេញពីកន្លែងមួយចំនួននៃ​តំបន់ឈូងសមុទ្រពែរ្សអាចចំណាយពេលយ៉ាងហោចណាស់ ៦ ខែ ឬកន្លះឆ្នាំ ដើម្បីបើកប្រតិបត្តិការឡើងវិញ ខណៈហេដ្ឋារចនាសម្ព័ន្ធថាមពលទូទាំងតំបន់រងការវាយប្រហារពីអ៊ីរ៉ង់​៕