ព័ត៌មានអន្ដរជាតិ

លោក ស៊ី បញ្ជាឲ្យស៊ើបអង្កេតរកមូលហេតុផ្ទុះឆេះអណ្តូងរ៉ែធ្យូងថ្ម ដែលសម្លាប់កម្មករយ៉ាងហោច៩០នាក់ ដល់ពេលនេះ

បានផុស

២ ខែ មុន

នៅ

ថ្ងៃសៅរ៍ ២៣ ឧសភា ២០២៦

ដោយ

ការផ្ទុះអណ្តូងរ៉ែធ្យូងថ្មមួយនៅភាគខាងជើងប្រទេសចិនដែលរហូតមកដល់ពេលនេះ បណ្តាលឲ្យមនុស្ស យ៉ាងហោចណាស់ ៩០នាក់បានស្លាប់នៅក្នុងហេតុការណ៍នេះ ដែលមានកម្មករជិត២៥០នាក់ធ្វើការក្នុងអណ្តូងរ៉ែនោះ។ ប្រធានាធិបតីចិន ស៊ី ជិនពីង ក៏បានចេញបញ្ជាឲ្យមានការស៊ើបអង្កេតបន្ទាន់លើការផ្ទុះឆេះនេះ។

ការផ្ទុះឧស្ម័ននេះបានកើតឡើងនៅអណ្តូងរ៉ែធ្យូងថ្ម Liushenyu ដែលគ្រប់គ្រងដោយក្រុមហ៊ុន Tongzhou Group ក្នុងខេត្ត Shanxi។ នេះបើយោងតាមការចុះផ្សាយរបស់សារព័ត៌មានចិន People’s Daily ក៏ដូចជា សារព័ត៌មានបស្ចឹមប្រទេស នៅថ្ងៃទី ២៣ ឧសភា ឆ្នាំ២០២៦។

រថយន្តសង្គ្រោះកម្មករអណ្តូងរ៉ែដែលផ្ទុះឆេះ។ AP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍ បានឲ្យដឹងថា អាជ្ញាធរចិន និង ក្រុមសង្គ្រោះ កំពុងបញ្ជូនកម្លាំងសង្គ្រោះរាប់សិបនាក់ទៅកាន់ទីតាំងកើតហេតុ ដើម្បីស្វែងរកអ្នកបាត់ខ្លួន និង គ្រប់គ្រងស្ថានការណ៍នៅកន្លែងកើតហេតុ ។

វីដេអូពីប្រព័ន្ធផ្សព្វផ្សាយរដ្ឋ បានបង្ហាញពីក្រុមសង្គ្រោះបន្ទាន់កំពុងដឹករទេះរុញនៅកន្លែងកើតហេតុ ដោយមានរថយន្តសង្គ្រោះបន្ទាន់នៅផ្ទៃខាងក្រោយ។ មនុស្សជាង ១០០នាក់ត្រូវបានគេនិយាយថា ត្រូវបានបញ្ជូនទៅមន្ទីរពេទ្យ ដោយការងារជួយសង្គ្រោះនៅកន្លែងកើតហេតុនៅតែកំពុងបន្តដំណើរការ។

ការផ្ទុះនេះបានកើតឡើងនៅម៉ោង ១៩៖២៩នាទី ម៉ោងក្នុងស្រុកថ្ងៃសុក្រ (ត្រូវម៉ោង ១១៖២៩ ម៉ោងសកល (GMT) )នៅអណ្តូងរ៉ែធ្យូងថ្មមួយក្នុងខេត្ត Shanxi ដោយមានកម្មករចំនួន ២៤៧ នាក់កំពុងបំពេញការងារនៅពេលកើតហេតុ។

យោងតាម BBC បន្ទាប់ពីហេតុការណ៍នេះ ប្រធានាធិបតីចិន ស៊ី ជីនពីង បានអំពាវនាវឱ្យមានការខិតខំប្រឹងប្រែងឲ្យបានខ្លាំងក្លានិងយកចិត្តទុកដាក់ក្នុងការព្យាបាលអ្នករងរបួស និងស្វែងរកអ្នករស់រានមានជីវិត។

ប្រធានាធិបតី ចិនក៏បានតម្រូវឱ្យរដ្ឋាភិបាលស៊ើបអង្កេតមូលហេតុនៃគ្រោះថ្នាក់នេះ និងចោទប្រកាន់អ្នកដែលទទួលខុសត្រូវផងដែរ។

យោងតាមប្រព័ន្ធផ្សព្វផ្សាយរដ្ឋ មន្ត្រីដែលគ្រប់គ្រងអណ្តូងរ៉ែធ្យូងថ្មត្រូវបានឃុំខ្លួន។ មូលហេតុនៃការផ្ទុះឧស្ម័នមិនទាន់ត្រូវបានបង្ហាញនៅឡើយទេ ប៉ុន្តែប្រព័ន្ធផ្សព្វផ្សាយរដ្ឋបានរាយការណ៍ថា កម្រិតនៃកាបូនម៉ូណូអុកស៊ីត – ដែលជាឧស្ម័នពុលខ្លាំង គ្មានក្លិន – នៅក្នុងអណ្តូងរ៉ែត្រូវបានគេរកឃើញថា «លើសពីកម្រិតកំណត់»។

ក្រសួងគ្រប់គ្រងគ្រាអាសន្នរបស់ប្រទេសចិនបានបញ្ជូនបុគ្គលិកចំនួន 345 នាក់មកពីក្រុមជួយសង្គ្រោះចំនួនប្រាំមួយក្រុមដើម្បីជួយក្នុងប្រតិបត្តិការនេះ។

BBC បានពិពណ៌នាថា ខេត្តសានស៊ី ដែលជាខេត្តក្រីក្របំផុតមួយរបស់ប្រទេសចិន ត្រូវបានគេស្គាល់ថាជារដ្ឋធានីរ៉ែធ្យូងថ្មរបស់ប្រទេស។

នៅដើមទសវត្សរ៍ឆ្នាំ ២០០០ គ្រោះថ្នាក់ដ៏សាហាវគឺជារឿងធម្មតានៅក្នុងឧស្សាហកម្មរ៉ែធ្យូងថ្មរបស់ប្រទេសចិន។ ស្តង់ដារសុវត្ថិភាពត្រូវបានរឹតបន្តឹងក្នុងប៉ុន្មានឆ្នាំថ្មីៗនេះ ប៉ុន្តែគ្រោះថ្នាក់នៅតែកើតឡើង។

នៅឆ្នាំ ២០២៣ ការដួលរលំនៅអណ្តូងរ៉ែធ្យូងថ្មបើកចំហមួយនៅក្នុងតំបន់ម៉ុងហ្គោលីខាងក្នុងភាគខាងជើងបានសម្លាប់មនុស្ស ៥៣ នាក់។

ត្រលប់ទៅឆ្នាំ ២០០៩ ការផ្ទុះនៅអណ្តូងរ៉ែមួយក្នុងខេត្តហីឡុងជាំងនៅភាគឦសានបានសម្លាប់មនុស្សជាង ១០០ នាក់។

ប្រទេសចិនគឺជាអ្នកប្រើប្រាស់ធ្យូងថ្មធំជាងគេបំផុតរបស់ពិភពលោក និងជាប្រទេសដែលបញ្ចេញឧស្ម័នផ្ទះកញ្ចក់ច្រើនជាងគេ ទោះបីជាវាបានដំឡើងសមត្ថភាពថាមពលកកើតឡើងវិញក្នុងល្បឿនកំណត់ត្រាក៏ដោយ៕

ប្រែសម្រួល រើយ